Cancer Treatment | క్యాన్స‌ర్ చికిత్స తీసుకునే రోగుల్లో గుండె ఆరోగ్యంపై ప్ర‌భావం ప‌డుతుందా..? నిపుణులు ఏం చెబుతున్నారు..?

క్యాన్సర్‌ చికిత్సలో గతంతో పోలిస్తే ఎంతో పురోగతి సాధించాం. కీమోథెరపీ, లక్ష్యిత చికిత్సలు, రోగనిరోధక వ్యవస్థ ఆధారిత చికిత్సలు, రేడియేషన్‌ చికిత్సల్లో వచ్చిన అభివృద్ధి వల్ల ఎంతోమంది రోగులు ఎక్కువ కాలం జీవించగలుగుతున్నారు. చికిత్స పూర్తయ్యాక సాధారణ జీవితానికి తిరిగి వస్తున్నారు. అయితే క్యాన్సర్‌ను నియంత్రించడంతోపాటు రోగి గుండె ఆరోగ్యంపై కూడా శ్రద్ధ చూపడం అవసరం.

Cancer Treatment | క్యాన్సర్‌ చికిత్సలో గతంతో పోలిస్తే ఎంతో పురోగతి సాధించాం. కీమోథెరపీ, లక్ష్యిత చికిత్సలు, రోగనిరోధక వ్యవస్థ ఆధారిత చికిత్సలు, రేడియేషన్‌ చికిత్సల్లో వచ్చిన అభివృద్ధి వల్ల ఎంతోమంది రోగులు ఎక్కువ కాలం జీవించగలుగుతున్నారు. చికిత్స పూర్తయ్యాక సాధారణ జీవితానికి తిరిగి వస్తున్నారు. అయితే క్యాన్సర్‌ను నియంత్రించడంతోపాటు రోగి గుండె ఆరోగ్యంపై కూడా శ్రద్ధ చూపడం అవసరం. ఎందుకంటే కొన్ని క్యాన్సర్‌ చికిత్సలు గుండె కండరాలు, రక్తపోటు లేదా గుండె కొట్టుకునే తీరుపై ప్రభావం చూపిస్తాయి. ఈ ప్రమాదం ఉపయోగించే మందులు, వాటి మోతాదు, చికిత్సల కలయిక, రోగి ఆరోగ్య పరిస్థితులపై ఆధారపడి ఉంటుంది. మధుమేహం, అధిక రక్తపోటు, ఊబకాయం లేదా గతంలో గుండె సంబంధిత సమస్యలు ఉన్నవారికి మరింత జాగ్రత్తగా పర్యవేక్షణ అవసరమవుతుంది. అయితే క్యాన్సర్‌ చికిత్స పొందే ప్రతి ఒక్కరికీ గుండె సమస్యలు వస్తాయని కాదు. ముందుగానే మార్పులను గుర్తించి తగిన చర్యలు తీసుకోవడమే గుండె పరీక్షల ముఖ్య ఉద్దేశం.

ఏ మందుల‌తో ఎలాంటి ప్ర‌భావం..

డోక్సోరుబిసిన్‌, ఎపిరుబిసిన్‌ వంటి కొన్ని కీమోథెరపీ మందుల‌ను రొమ్ము క్యాన్సర్‌, లింఫోమా తదితర క్యాన్సర్ల చికిత్సలో ఉపయోగిస్తారు. కొందరిలో ఇవి గుండె కండరాలను బలహీనపరిచి రక్తాన్ని పంప్‌ చేసే సామర్థ్యాన్ని తగ్గిస్తాయి. మందుల మొత్తం మోతాదు పెరిగే కొద్దీ ప్రమాదం కూడా పెరిగే అవ‌కాశం ఉంటుంది. హెచ్‌ఈఆర్‌-2 పాజిటివ్‌ రొమ్ము క్యాన్సర్‌ చికిత్సలో ఉపయోగించే ట్రాస్టుజుమాబ్‌ కూడా కొందరిలో గుండె పనితీరును ప్రభావితం చేస్తుంది. ఇతర లక్ష్యిత చికిత్సలు రక్తపోటును పెంచే అవకాశం ఉంటుంది. రోగనిరోధక వ్యవస్థ ఆధారిత చికిత్సలు అరుదుగా గుండె కండరాల్లో వాపును కలిగిస్తాయి. ఇది అత్యవసర వైద్య సహాయం అవసరమయ్యే పరిస్థితి. ఛాతీ భాగానికి ఇచ్చే రేడియేషన్‌ చికిత్స వల్ల కూడా కొందరిలో గుండెపై ప్రభావం పడుతుంది. కొన్ని సమస్యలు చికిత్స పూర్తయిన సంవత్సరాల తర్వాత కూడా కనిపిస్తాయి. చికిత్సకు ముందు, అవసరాన్ని బట్టి ఈసీజీ, ఎకో పరీక్షలు, గుండె కండరాలపై ఒత్తిడి లేదా నష్టాన్ని సూచించే రక్త పరీక్షలు నిర్వహిస్తారు. చికిత్స సమయంలోనూ గుండె పనితీరును క్రమం తప్పకుండా పరిశీలిస్తారు.

ఇరు విభాగాల వైద్యులు క‌లిసి ప‌నిచేయాలి..

క్యాన్సర్‌ చికిత్సతోపాటు గుండె ఆరోగ్యాన్ని పర్యవేక్షించడంలో క్యాన్సర్‌ వైద్యులు, గుండె వైద్యులు కలిసి పనిచేయడం కీలకం. ఈ రెండు విభాగాలు సమన్వయంతో పనిచేసే ప్రత్యేక వైద్య విధానాన్ని కార్డియో-ఆంకాలజీ అంటారు. క్యాన్సర్‌ వైద్యులు వ్యాధిని నియంత్రించేందుకు అవసరమైన చికిత్సలను అంచనా వేస్తే, గుండె వైద్యులు హృదయ సంబంధిత ప్రమాదాలను గుర్తించి సమస్యలను నిర్వహించడంలో సహాయపడతారు. చికిత్స సమయంలో శ్వాస తీసుకోవడంలో ఇబ్బంది, పాదాల వాపు, అసాధారణ అలసట, ఛాతీలో అసౌకర్యం, గుండె వేగంగా లేదా అసమానంగా కొట్టుకోవడం, స్పృహ కోల్పోవడం వంటి లక్షణాలను నిర్లక్ష్యం చేయకూడదు. ఇవి తప్పనిసరిగా గుండె సమస్యలనే సూచించకపోయినా వెంటనే వైద్యుడిని సంప్రదించాలి. గుండె పనితీరు తగ్గినప్పుడు క్యాన్సర్‌ చికిత్సను వెంటనే నిలిపివేయాల్సిన అవసరం ప్రతిసారీ ఉండదు. పరిస్థితిని బట్టి గుండెకు రక్షణ కల్పించే మందులు, అదనపు పర్యవేక్షణతో చికిత్స కొనసాగించవచ్చు. మరికొన్ని సందర్భాల్లో చికిత్సను తాత్కాలికంగా నిలిపివేయడం లేదా మార్చడం అవసరమవుతుంది.

చికిత్స పూర్తయ్యాక కూడా ప‌ర్య‌వేక్ష‌ణ అవ‌స‌రం..

క్యాన్సర్‌ చికిత్స పూర్తయిన తర్వాత కూడా గుండె ఆరోగ్యంపై శ్రద్ధ కొనసాగాలి. కొన్ని చికిత్సల ప్రభావాలు నెలలు లేదా సంవత్సరాల తర్వాత బయటపడ‌తాయి. అందువల్ల క్యాన్సర్‌ నుంచి కోలుకున్నవారు కూడా తమ ఆరోగ్య పరిస్థితికి అనుగుణంగా గుండె పరీక్షలు చేయించుకోవాలి. చికిత్స సమయంలో ఏ పరీక్షలు అవసరం, వాటి ఫలితాల అర్థం ఏమిటి, తదుపరి చర్యలు ఎలా ఉంటాయి అనే విషయాలను వైద్యులను అడిగి తెలుసుకోవాలి. తమకు గతంలో ఉన్న ఆరోగ్య సమస్యలను తెలియజేయడంతోపాటు కొత్త లక్షణాలు కనిపిస్తే వెంటనే వైద్యుడికి చెప్పాలి. వైద్యుల సలహా లేకుండా క్యాన్సర్‌ మందులను ఆపడం లేదా వాటి మోతాదును మార్చడం చేయకూడదు. క్యాన్సర్‌ను జయించడం మాత్రమే విజయవంతమైన చికిత్సకు కొలమానం కాదు. రోగులు కోలుకుని, రోజువారీ జీవితానికి తిరిగి వచ్చి, దీర్ఘకాలం ఆరోగ్యంగా, సంతోషంగా జీవించేలా చూడడం కూడా అంతే ముఖ్యమ‌ని నిపుణులు సూచిస్తున్నారు.