కుక్క కరిస్తే జాగ్రత్త సుమా!

కుక్క కరిచిందంటే ఎంతో ఆందోళనగా ఉంటుంది. పిల్లలకు ఈ ప్రమాదం మరీ ఎక్కువగా పొంచి ఉంటుంది. కుక్క కాటుకు గురైనప్పుడు ఆందోళన చెందకూడదు. ఇన్ఫెక్షన్‌ను నివారించుకోవడానికి వీలైనంత త్వరగా వైద్య సహాయం పొందాలి.

కుక్క కరిచిందంటే ఎంతో ఆందోళనగా ఉంటుంది. పిల్లలకు ఈ ప్రమాదం మరీ ఎక్కువగా పొంచి ఉంటుంది. కుక్క కాటుకు గురైనప్పుడు ఆందోళన చెందకూడదు. ఇన్ఫెక్షన్‌ను నివారించుకోవడానికి వీలైనంత త్వరగా వైద్య సహాయం పొందాలి. ఆలస్యం చేస్తే దీర్ఘకాలిక ప్రభావాలకు గురికావాల్సి వస్తుంది.

ఏంచేయాలి?

• కుక్క కరిచిన వెంటనే దాన్నుంచి వీలైనంత దూరంగా ఉండాలి. మళ్లీ కరవకుండా జాగ్రత్త వహించాలి.
• ఆ తర్వాత కుక్కకు రేబిస్‌ వ్యాక్సిన్‌ వేశారో లేదో (పెంపుడు కుక్క అయితే) కనుక్కోవాలి. దాన్నిబట్టి చికిత్స ఆధారపడి ఉంటుంది.

ఎలాంటి సమస్యలు?

రోగ నిరోధక శక్తి బలహీనంగా ఉన్నవాళ్లు, మధుమేహ వ్యాధిగ్రస్తులకు కుక్క కరిచిన తర్వాత మరిన్ని ఇబ్బందులు తలెత్తే ప్రమాదం ఉంది. ఇక కుక్క కాటు చర్మంపై లోతుగా ఉంటే నరాలు, కండరాలు, రక్త నాళాలు ధ్వంసమవుతాయి. మరీ పెద్ద కుక్కలైతే ఎముకల మీద కూడా ప్రభావం పడుతుంది. ఎలా ఉన్నా మరిన్ని సమస్యలు తలెత్తకుండా వైద్య సహాయం పొందడం మాత్రం తప్పనిసరి.

కుక్క కాటుతో వచ్చే సమస్యలు..

• స్టెఫలోకోకస్‌, పాస్టురెల్లా, కాప్నోసైటోఫాగా లాంటి బ్యాక్టీరియల్‌ ఇన్ఫెక్షన్స్‌ వస్తాయి.
• నరాలు, కండరాలు దెబ్బతింటాయి.
• కాళ్లు, పాదాలు, చేతుల ఎముకలు పగుళ్లిచ్చేఅవకాశం ఉంది.
• కుక్కకు వ్యాక్సిన్లు వేయించకపోతే రేబిస్‌ ప్రమాదం ఉంటుంది.
• కుక్క కాటు గీతలు శాశ్వతంగా ఉండిపోతాయి. కాకపోతే వైద్య చికిత్సతో అవి కనిపించడాన్ని తగ్గించుకోవచ్చు.
• మరణాలు అరుదుగా ఉంటాయి. 10 ఏండ్ల లోపు పిల్లల్లో మరణాలకు ఆస్కారం ఉంది.

ఇన్ఫెక్షన్‌ నివారణ ఎలా?

• కుక్క కాట్లు ప్రమాదకరమైన బ్యాక్టీరియాను శరీరంలోకి చొప్పిస్తాయి. తగిన చికిత్స తీసుకోకపోతే తీవ్ర ఇన్ఫెక్షన్లకు దారితీయొచ్చు. కొన్ని జాగ్రత్తలతో ఇన్ఫెక్షన్లను నివారించుకోవాలి.
• కుక్క కరిచిన వెంటనే గాయాన్ని సబ్బు, నీళ్లతో కడిగేయాలి.
• పోవిడన్‌ అయోడిన్‌ లాంటి టాపికల్‌ యాంటిబయాటిక్స్‌ను గాయంపై పూయాలి.
• గాయానికి కట్టు కట్టాలి. బ్యాండేజీలను రోజూ మారుస్తూ ఉండాలి.
• కందిపోవడం, వాపు, నొప్పి పెరగడం లాంటి ఇన్ఫెక్షన్‌ సంకేతాలను గమనిస్తూ ఉండాలి.
• ఈ లక్షణాలు గుర్తిస్తే వైద్యుడిని సంప్రదించాలి. ఇవి కుక్క కరిచిన తర్వాత 24 గంటల నుంచి 14 రోజుల వరకు ఎప్పుడైనా బయటపడొచ్చు.
• లక్షణాలు తగ్గినప్పటికీ డాక్టర్లు సూచించిన యాంటిబయాటిక్స్‌ను పూర్తి కోర్సు (సాధారణంగా 1 2 వారాలు) వాడాలి.