ఎట‌మ‌టం

రాష్ట్రంలో బీజేపీ గ్రాఫ్‌ పడిపోయిందనే విషయంలో ఆ పార్టీ నాయకులకున్నంత క్లారిటీ మరెవరికీ లేదు. రాష్ట్ర నాయకుల కంటే జాతీయ నాయకత్వానికి మరింత స్పష్టత ఉన్నది. తెలంగాణలో బీజేపీది థర్డ్‌ ప్లేస్‌ అని ఆరు నెలల కిందటే చెప్పారు. మేము ఎలాగూ గెలిచే పరిస్థితి లేదు కాబట్టి బీఆర్‌ఎస్‌ గెలవాలని కోరుకుంటున్నట్టు మురళీధర్‌రావు అన్నారు. ఇంత స్పష్టత ఉన్నాక పోటీకి ఎవరైనా దరఖాస్తు చేసుకుంటారా? అని సీనియర్లు ప్రశ్నిస్తున్నారు.

ఠాక్రే: ఎలా ఉన్నారు?

తనకు రాజకీయ గురువు ఎవరూ లేరని రేవంత్‌రెడ్డి అంటారు కానీ, ఆయన పక్కా బాలయ్యబాబును ఫాలో అవుతుంటరని చెప్తున్నారు. సినిమా ఫంక్షన్స్‌లో అభిమానులను తోసేయడం, కొట్టడం బాలయ్యకు అలవాటు. రేవంత్‌ కూడా కార్యకర్తలపై చేయి చేసుకోవడం, వేదికల నుంచి కిందకి తోసేయడం వంటి చర్యలతో బాలయ్య బాబును తలపిస్తున్నారని విశ్లేషకులు అంటున్నారు.

పాదాల మీద నడిచే యాత్ర పాదయాత్ర అని కొత్తభాష్యం చెప్పిన వైఎస్‌ షర్మిల తాజాగా ద్రోహానికి కూడా ఎక్స్‌పైర్‌ టైమ్‌ ఉంటుందని చెప్తున్నారు. కాంగ్రెస్‌ పార్టీ వైఎస్‌ఆర్‌ కుటుంబానికి ద్రోహం చేసి పద్నాలుగేండ్లు దాటింది. బైబిల్‌ ప్రకారం.. ఏడేండ్లు దాటితే క్షమించవచ్చు. ఈ లెక్కన రెండు పర్యాయాలు క్షమించినట్టయింది కాబట్టి, ఆ పార్టీలో విలీనం కావాలని నిర్ణయం తీసుకున్నట్టు షర్మిల చెప్పుకొచ్చారు.
– వెల్జాల