ఆడబిడ్డల సంరక్షణకు అరుదైన గుర్తింపు

ఇంటర్‌ పుస్తకంలో సంగారెడ్డి జిల్లా పాఠ్యాంశం
సేవ్‌ గర్ల్‌ చైల్డ్‌, సేవ్‌ మ్యాన్‌ కైండ్‌ పేరిట పాఠం
ఇంటర్‌ పాఠ్య పుస్తకంలో సంగారెడ్డి జిల్లా అంశం
ఇంటర్‌ మొదటి సంవత్సర ఇంగ్లిష్‌ మీడియం పుస్తకంలో ఆడబిడ్డల సంరక్షణపై ప్రత్యేక పాఠ్యాంశం
సేవ్‌ గర్ల్‌ చైల్డ్‌, సేవ్‌ మ్యాన్‌ కైండ్‌ పేరిట పాఠం
ఆదర్శంగా మారిన హరిదాస్‌పూర్‌, ఎద్దుమైలారం గ్రామాలు

ఏదైనా మంచి పనిచేస్తే ప్రతి ఒక్కరూ మెచ్చుకోవడం సహజమే. కానీ, ఆ చేసే మంచిపని కిందిస్థాయి నుంచి రాష్ట్రస్థాయి అధికారులను కదిలించేలా ఉంటే అది గొప్ప విషయమై ఉంటుంది. ఎక్కడో మారుమూల గ్రామంలో జరిగిన ఆ బృహత్తర కార్యక్రమాన్ని ఏకంగా పిల్లలు చదువుకునే పాఠ్య పుస్తకాల్లో అధికారికంగా ప్రచురించారంటే అది ఎంతటి మహత్కార్యమై ఉంటుందో ప్రత్యేకంగా చెప్పనవసరం లేదు. ఆడబిడ్డల సంరక్షణకు సంబంధించి సంగారెడ్డి జిల్లాలోని రెండు గ్రామాల్లో తలపెట్టిన కార్యక్రమాలను వివరిస్తూ రాష్ట్ర ఉన్నత విద్యాశాఖ ఇంటర్‌ మొదటి సంవత్సరం ఆంగ్ల (ఇంగ్లిష్‌) పుస్తకంలో పాఠ్యాంశంగా ప్రచురించింది…

• కంది/కొండాపూర్‌, ఆగస్టు 13: సంగారెడ్డి జిల్లా కొండాపూర్‌ మండలం హరిదాస్‌పూర్‌ గ్రామంలో సర్పంచ్‌ షఫీ, పంచాయతీ కార్యదర్శి రోహిత్‌ కులకర్ణికి కొత్త ఆలోచన పుట్టింది. గ్రామంలో ఎవరికైనా ఆడబిడ్డలు పుడితే ఆ ఇంట్లో సంబురాలు జరుపాలని నిర్ణయించుకున్నారు. అది కాస్తా సంగారెడ్డి జిల్లా కలెక్టర్‌ హనుమంతరావు దృష్టికి వెళ్లడంతో స్వయంగా ఆయనే ఆ గ్రామాన్ని సందర్శించారు. గ్రామంలోని ఆడ్డబిడ్డల సంరక్షణ కోసం కొంత డబ్బును చెక్కురూపంలో అందజేశారు. ఇదే స్ఫూర్తితో కంది మండలం ఎద్దుమైలారం గ్రామంలో స్థానిక సర్పంచ్‌ కాసాల మల్లారెడ్డి ఆధ్వర్యంలో గ్రామంలో పుట్టిన మొత్తం 72 మంది ఆడబిడ్డలకు ఒక్కొక్కరికీ రూ.250 చొప్పున మూడు నెలలకు గాను రూ.54 వేలు సొంత ఖర్చులతో ‘సుకన్య సమృద్ధి యోజన’ పథకంలో భాగంగా ఖాతాలు తెరిపించారు. ఆడబిడ్డల సంరక్షణకు ఈ గ్రామాల్లో శ్రీకారం చుట్టిన కార్యక్రమాలను వివరిస్తూ 2021 సంవత్సరానికి విడుదల చేసిన ఇంటర్‌ ఫస్ట్‌ ఇయర్‌ పాఠ్య పుస్తకాల్లోని ఇంగ్లిష్‌ పుస్తకంలో ప్రత్యేక పాఠ్యాంశంగా ప్రచురించారు. ‘సేవ్‌ గర్ల్‌ చైల్డ్‌, సేవ్‌ మ్యాన్‌ కైండ్‌’ పేరిట పేజీ నెంబరు 253లో పాఠాన్ని పొందుపర్చారు. ప్రతి ఒక్కరూ ఆడ్డబిడ్డలను కాపాడుకోవాలని, ఆడబిడ్డలు పుడితే సంబురాలు చేసుకోవాలనే విషయాలను ఇందులో జోడించారు. ఏదైనా ఓ మంచి సంఘటన ఎక్కడ జరిగినా, అది ఇతరులకు స్ఫూర్తిగా నిలుస్తున్నందనే స్థాయిలో ఉంటే చరిత్రలో నిలిచేలా ఉంటుందనే విషయం దీని ద్వారా స్పష్టమవుతున్నది. పిల్లలు చదువుకునే పాఠ్య పుస్తకాల్లో సంగారెడ్డి జిల్లాలో జరిగిన ఈ అంశం రాష్ట్ర విద్యాశాఖను కదిలించేలా చేసి, ఆ అంశాలను పాఠ్యపుస్తకాల్లో ప్రచురించడంతో ఇక్కడి ప్రాంత ప్రజలు హర్షిస్తున్నారు.