Revant reddy | జూబ్లీహిల్స్​‍లో రేవంత్‌రెడ్డి అరెస్ట్‌..ఉద్రిక్తత

బంజారాహిల్స్​‍ : సీఎం కేసీఆర్ ఫాంహౌజ్‌ వద్దకు వెళ్తానంటూ బయలుదేరేందుకు యత్నించిన పీసీసీ అధ్యక్షుడు రేవంత్‌రెడ్డిని జూబ్లీహిల్స్​‍ పోలీసులు సోమవారం అడ్డుకుని అంబర్‌పేట పోలీస్ స్టేష‌న్‌కు తరలించారు. సోమవారం ఉదయం నుంచి జూబ్లీహిల్స్​‍ రోడ్‌ నెం 46లోని రేవంత్‌ నివాసం వద్ద ఉద్రిక్తత నెలకొంది.

ఎలాంటి అనుమతులు లేకుండా ఎర్ర‌వెల్లికి వెళ్లేందుకు రావాలంటూ రేవంత్‌ కోరడంతో భారీగా కార్యకర్తలు జూబ్లీహిల్స్​‍కు వచ్చారు. దాంతో ఎలాంటి అవాంఛనీయ సంఘటనలు జరగకుండా పోలీసులు పటిష్ట బందోబస్తు ఏర్పాట్లు చేశారు. వెస్ట్‌జోన్‌ ఇన్‌చార్జి డీసీపీ ఏఆర్‌.శ్రీనివాస్‌తో పాటు ఏసీపీ సుదర్శన్‌ ఆధ్వర్యంలో పోలీసులు భారీగా మొహరించారు.

కావాలంటే గాంధీభవన్‌కు వెళ్లడానికి అనుమతి ఇస్తామని పోలీసులు చెప్పినా పట్టించుకోని రేవంత్‌రెడ్డి భారీగా వచ్చిన కార్యకర్తలతో కలిసి ఇంట్లోంచి బయటకు వచ్చారు. తాను ఎలాగైనా గజ్వేల్‌ వెళ్తానంటూ కార్యకర్తలతో కలిసి ముందుకు దూసుకువెళ్లేందుకు ప్రయత్నించాడు. దాంతో పోలీసులు అప్రమత్తమయి రేవంత్‌రెడ్డిని అదుపులోకి తీసుకుని అంబర్‌పేట స్టేష‌న్‌కు తరలించారు.