Visit:
ఆన్‌లైన్‌ ’యాప్‌’లతోనే పోటీ పరీక్షలకు సిద్ధం.. విద్యార్థులకు అందుబాటులో స్టడీ యాప్స్‌, ఆన్‌లైన్‌ తరగతులు
ఇబ్రహీంపట్నం రూరల్‌, ఆగస్టు 21 : పోటీ పరీక్షలకు సన్నద్ధమయ్యే అభ్యర్థులకు కొత్త యాప్‌లు ఎంతో మేలుచేస్తున్నాయి. రోజురోజుకూ విద్యార్థుల్లో, పోటీ పరీక్షలు రాసే అభ్యర్థుల్లో ఈ స్మార్ట్‌ప్రిపరేషన్‌కు ఎంతో ఆదరణ పెరుగుతున్నది. వేల రూపాయల ఖర్చు, రోజుల కొద్దీ సమయం వృథాకాకుండా స్మార్ట్‌ఫోన్‌ ఉంటే మనకు కావాల్సిన సబ్జెక్టులను నిమిషాల్లో తీసుకోవచ్చు. ఒకప్పుడు నోటిఫికేషన్‌ విడుదలైన నాటి నుంచి ఫలితాలు వెలువడే వరకు ఒక అభ్యర్థి ప్రతి సమాచారం కోసం ఎంతో ఇబ్బందులు ఎదుర్కొనాల్సి వచ్చేది. నోటిఫికేషన్‌ విడుదలైతే ఎన్ని పోస్టులు, చివరి గడువు, అర్హతలు, ఇతర సమాచారం కోసం పత్రికల్లో వెతికే పరిస్థితి కనిపించేది. కొన్ని ఉద్యోగాల సమాచారం కూడా క్షేత్రస్థాయికి వచ్చేవికావు. దాని తర్వాత పరీక్షకు దరఖాస్తు చేసుకోవడానికి గంటలకొద్దీ సమయం… అనంతరం చదవడానికి కావాల్సిన పుస్తకాల సేకరణ, వేల రూపాయల ఖర్చులుండేవి. పరీక్ష అనంతరం ఫలితాల కోసం వెతుక్కునే పరిస్థితి. ఇప్పుడు పరిస్థితులు పూర్తిగా మారాయి. నోటిఫికేషన్‌ విడుదలైన నిమిషాల్లోనే మనకున్న స్టడీయాప్స్‌తో సమాచారం అందుతున్నది. అందుకు దరఖాస్తు కూడా నిమిషాల్లో పూర్తవుతున్నది. దరఖాస్తు అనంతరం పరీక్షకు ఎలా సన్నద్ధం కావాలి? ముఖ్యమైన అంశాలు, టైం టేబుల్‌ తదితర సూచనలన్నీ నిపుణులు ఈ యాప్స్‌తో మనకు నిత్యం అందిస్తున్నారు. దీంతో పరీక్షలకు సిద్ధమయ్యే విద్యార్థులకు ఎంతో మేలు చేకూరుతున్నది.
రకరకాల ఫీచర్స్‌తో ఎడ్యుకేషన్‌ అప్లికేషన్లు…
పోటీ పరీక్షలకు సిద్ధమవుతున్న అభ్యర్థులకు ఎంతో విషయపరిజ్ఞానం అవసరం. కరెంట్‌అఫైర్స్‌పై ఎంతో పట్టుండాలి. అప్పుడే సక్సెస్‌ను అందుకోగలరు. మారుతున్న పరిస్థితులకనుగుణంగా పుస్తకాలు కొనుక్కొని చదుకోవడం కొన్నిసార్లు వీలుపడదు. కరెంట్‌అఫైర్స్‌ ఎల్లప్పుడు మారుతూనే ఉంటాయి. వీటి కోసం అందుబాటులో ఉన్న అప్లికేషన్లను ఫోన్లో డౌన్‌లోడ్‌ చేసుకోవచ్చు. యూపీఎస్సీ, టీఎస్‌పీఎస్సీ, బ్యాంకింగ్‌, రైల్వే రిక్రూట్‌మెంట్‌, ఎస్‌ఎస్‌సీ తదితర వాటితో నియమించే అన్ని ఉద్యోగాలకు నేడు అప్లికేషన్లు అందుబాటులోకి వచ్చాయి. ఇందులో జీకే ఇండియా, మనపీఎస్సీ, కౌటిల్యకెరీర్స్‌, బైజూస్‌, మ్రూనాల్‌, అన్‌అకాడమీ, బ్యాంకర్స్‌అడ్డా, ఎస్‌ఎస్‌సీ అడ్డా, గ్రేడ్‌అప్‌, టాప్‌ర్యాంకర్స్‌, ఐప్రూవ్‌స్టడీబడ్డీ, డైలీహంట్‌లాంటి అనేక అప్లికేషన్లతో ఆయా పరీక్షల్లో రాణించాలనుకునే అభ్యర్థులకు ఎంతో మేలు చేకూరుతున్నది. ఈ అప్లికేషన్లతో టీఎస్‌పీఎస్సీ, ఐబీపీఎస్‌, ఆర్‌ఆర్‌బీ, యూపీఎస్సీ తదితర పరీక్షల స్టడీమెటీరియల్‌ను పొందవచ్చు. పోటీ పరీక్షలకు సంబంధించి అన్ని సబ్జెక్టులూ ఇందులో అందుబాటులో ఉంటాయి. బుక్‌మార్క్‌, ఫాంట్‌సైజ్‌, కలర్‌ తదితర అన్ని రకాల ఫీచర్లతో ఇవి పని చేస్తున్నాయి.
‘మనటీవీ’తో విద్యార్థులకెంతో మేలు..
పోటీ పరీక్షలకు సన్నద్ధమయ్యే, పాఠశాల, కళాశాలల, వృత్తివిద్యా కోర్సు కోసం ప్రవేశ పరీక్ష, తదితర పరీక్షలకు సంబంధించి నాణ్యమైన శిక్షణ అందించేందుకు మారుమూల పల్లెలకు సైతం రాష్ట్ర ప్రభుత్వం ‘మనటీవీ’ ప్రసారాలను అందజేస్తున్నది. తెలంగాణ రాష్ట్రంలోని పోటీపరీక్షలే కాకుండా, దేశవ్యాప్తంగా ఏటా క్యాలెండర్‌ ప్రకారం వచ్చే యూపీఎస్సీ, స్టాఫ్‌సెలక్షన్‌ కమిషన్‌, ఐబీపీఎస్‌, రైల్వే, సరిహద్దు భద్రతాదళం తదితర సంస్థల్లోని ఉద్యోగాల పోటీ పరీక్షలకు తెలంగాణ యువతరం పోటీపడేలా మన టీవీ నుంచి నిరంతరం అనుభవజ్ఞులైన అధ్యాపకులు శిక్షణ ఇస్తున్నారు. ఉద్యోగ పరీక్షలే కాకుండా ఐఐటీ, క్యాట్‌, ఎంసెట్‌, నీట్‌.. తదితర పరీక్షలకు శిక్షణ ఇస్తున్నారు. మన టీవీ ఛానెల్‌లో ప్రసారమయ్యే తరగతులను నేడు గ్రామీణ ప్రాంతాల్లోని యువత ఎంతో ఉపయోగించుకుంటున్నారు.
స్టడీసర్కిళ్ల కంటే ఆన్‌లైన్‌ తరగతులకే ప్రాధాన్యత..
డబ్బులుండి కొందరు.. లేకున్నా అప్పులు చేసి మరికొందరు నగరంలోని ప్రైవేటు స్టడీ సర్కిళ్లలో చేరి లక్షల రూపాయలు ఖర్చు చేసుకునేవారు. కానీ మారుతున్న టెక్నాలజీని సద్వినియోగం చేసుకుంటూ ఇంటి వద్ద ఉంటూ పోటీ పరీక్షలకు, ఇతర పరీక్షలకు సిద్ధమవుతున్నారు. ఒకప్పుడు టీవీ ముందు కూర్చుని సమయం వృథా చేసుకుంటున్నారనే తల్లిదండ్రులు… నేడు అదే టీవీ ముందు కూర్చోబెట్టి మరీ తమ పిల్లలను చదువుకోవాలని చెబుతున్నారు. ప్రిపరేషన్‌లో భాగంగా పరీక్షలకు సిద్ధమవుతున్న వారికి కంప్యూటర్‌, ఫోన్లలో ఇంటర్నెట్‌ సాయంతో మాక్‌టెస్ట్‌లను కూడా రాస్తున్నారు.
ఆన్‌లైన్‌ తరగతులతో ఎంతో మేలు…
గతంలో ప్రైవేటు స్టడీ సర్కిళ్లల్లో వేల రూపాయల ఖర్చు చేసి శిక్షణ తీసుకునేవాళ్లం. నాలుగు నెలలపాటు ఇచ్చే ఈ శిక్షణలో వేలాది మంది విద్యార్థులకు ఒకేసారి బోధిస్తుండటంతో ఇబ్బందులు ఎదురయ్యేవి. కానీ నేడు ఆన్‌లైన్‌ తరగతులు, ప్రత్యేక అప్లికేషన్లతో చదువుకునేందుకు చాలా సౌకర్యవంతంగా ఉన్నది. స్మార్ట్‌ఫోన్‌తో ప్రిపేరవుతుంటే ప్రపంచంలోని సమాచారమంతా మన దగ్గరే ఉన్నట్లుగా ఉన్నది.
