‘మత్స్యకారులకు మంచి రోజులు

వంద శాతం సబ్సిడీపై చేప పిల్లలు అందజేత
ఆర్థిక చేయూతతో మత్స్యకారుల జీవితాల్లో వెలుగులు
రూ.89 కోట్లతో 30వేల చెరువుల్లో 93 కోట్ల చేప పిల్లల విడుదల
రూ.25కోట్లతో 200 నీటి వనరుల్లో 10 కోట్ల రొయ్య పిల్లలు
ఐదేండ్లలో రూ.208 కోట్ల నిధులతో రూ.30 వేల కోట్ల ఆదాయం
జిల్లాలో 447 మందికి రూ.40లక్షల రుణాలు ఇచ్చాం
మంత్రి సబితాఇంద్రారెడ్డి
కోట్‌పల్లి ప్రాజెక్టులో ఐదో విడుత చేప పిల్లల విడుదల
త్వరలో టూరిజం బోట్లు ఏర్పాటు చేస్తామన్న మంత్రి

‘మత్స్యకారులకు తెలంగాణ ప్రభుత్వ హయాంలో మంచి రోజులొచ్చాయి.. ఆర్థిక చేయూతనందిస్తూ వంద శాతం సబ్సిడీపై చేప పిల్లలను అందిస్తున్నాం… ఇప్పటికే వాహనాలను అందించాం.. చేపలతో లాభాలను ఆర్జించడంతో వారి జీవితాల్లో వెలుగులు నిండాయి..’ అని విద్యాశాఖ మంత్రి సబితాఇంద్రారెడ్డి అన్నారు. బుధవారం కోట్‌పల్లి ప్రాజెక్టులో జడ్పీ చైర్‌ పర్సన్‌ సునీతామహేందర్‌రెడ్డి, ఎమ్మెల్యేలు రోహిత్‌రెడ్డి, ఆనంద్‌, కాలె యాదయ్యలతో కలిసి ఐదో విడుత చేప పిల్లలను మంత్రి విడుదల చేశారు. ఈ సందర్భంగా మంత్రి మాట్లాడుతూ రూ.89 కోట్ల నిధులతో 30 వేల చెరువులు, రిజర్వాయర్లలో 93 కోట్ల చేప పిల్లలను వదలనున్నట్లు పేర్కొన్నారు. ఇప్పటికే రూ.25 కోట్లతో 10 కోట్ల రొయ్య పిల్లలను 200 నీటి వనరుల్లో విడుదల చేశామన్నారు. కోట్‌పల్లిలో త్వరలోనే టూరిజం బోట్లను ఏర్పాటు చేస్తామన్నారు. ఐదేండ్లుగా రూ.208 కోట్ల నిధులతో 30 వేల కోట్ల ఆదాయం వచ్చిందన్నారు. జిల్లాలో 447 మందికి రూ.40లక్షల రుణాలు ఇచ్చామని తెలిపారు.

కోట్‌పల్లి/ధారూర్‌, సెప్టెంబర్‌ 8 : మత్స్యకారులకు టీఆర్‌ఎస్‌ ప్రభుత్వం పూర్తిగా అండగా నిలుస్తుందని రాష్ట్ర విద్యాశాఖ మంత్రి పి.సబితాఇంద్రారెడ్డి, జడ్పీ చైర్‌పర్సన్‌ సునీతామహేందర్‌రెడ్డి తెలిపారు. బుధవారం కోట్‌పల్లి ప్రాజెక్టులో 5వ విడుత చేప పిల్లలను వదిలే కార్యక్రమాన్ని మంత్రి, చైర్‌పర్సన్‌ హాజరై మత్స్యశాఖ అధ్యక్షుడు ఆనంద్‌, ఎమ్మెల్యేలు రోహిత్‌రెడ్డి, ఆనంద్‌, యాదయ్య, కలెక్టర్‌ నిఖిలతో కలిసి చెరువులో చేపపిల్లలను వదిలే కార్యక్రమాన్ని ప్రారంభించారు. ఈ సందర్భంగా మంత్రి మాట్లాడుతూ.. కోట్‌పల్లి ప్రాజెక్టులో మరో 9 లక్షల చేపపిల్లలను విడుతలవారీగా విడుదల చేస్తామన్నారు. 25 లక్షల పెద్ద సైజు, 14 లక్షల చిన్న సైజు చేప పిల్లలను జిల్లాలో ఉన్న 775 చెరువుల్లో వదులుతామని చెప్పారు. గతేడాది జిల్లాలో ఉన్న 775 చెరువుల్లో రూ.8కోట్ల61లక్షల విలువచేసే చేపపిల్లలు, 93 నీటి వనరుల్లో 4 కోట్ల రొయ్య పిల్లలను వదిలినట్లు తెలిపారు. కోట్‌పల్లిలో త్వరలోనే టూరిజం బోట్లు ఏర్పాటు చేస్తామన్నారు. జిల్లాలో 447 మందికి రూ.40లక్షల రుణాలిచ్చినట్లు తెలిపారు. జిల్లాలోని 105 మత్స్య పారిశ్రామిక సహకార సంఘాల్లో 4429 మంది సభ్యులున్నారని తెలిపారు. చెరువుల్లో వంద శాతం రాయితీపై చేపపిల్లలను వదులుతున్నామని మంత్రి పేర్కొన్నారు.

మత్స్యకారుల ఆర్థిక సంపద పెరిగింది

• సునీతామహేందర్‌రెడ్డి, జడ్పీ చైర్‌పర్సన్‌
  గతంలో చేపల కోసం ఆంధ్రాపై ఆధారపడేవాళ్లు. టీఆర్‌ఎస్‌ ప్రభుత్వం వచ్చాక మత్స్యకారులకు చేయూతనిచ్చి ఆర్థిక సంపదను పెంచింది. మిషన్‌ కాకతీయతో చెరువుల్లో జలకళ పెంచింది. 2016లోనే ఉచిత చేపపిల్లల పంపిణీ కార్యక్రమానికి సీఎం కేసీఆర్‌ శ్రీకారం చుట్టారు. రాష్ట్రవ్యాప్తంగా 500 ఔట్‌లెట్ల ఏర్పాటుతో తెలంగాణ చేప వంటకాలతో బ్రాండ్‌ పేరు అందుబాటులోకి వస్తుంది. గత సంవత్సరం 79.33 లక్షల చేపపిల్లలను ఒక చేప 47 పైసల చొప్పున రూ.34 లక్షల 22వేలు వెచ్చించి చెరువుల్లో వదిలారు. ఈ సంవత్సరం కోటి14లక్షల చిన్నచేపపిల్లలను 775 చెరువుల్లో వదులుతారు.

మత్స్యకారులకు అండ

• ఎమ్మెల్యేలు రోహిత్‌రెడ్డి, ఆనంద్‌, యాదయ్య
  చేపలు పట్టి జీవనం సాగించే మత్స్యకారులకు టీఆర్‌ఎస్‌ పాలనలో మంచి రోజులు వచ్చాయి. చేతివృత్తులపై ఆధారపడి జీవనం సాగించేవారిని ఆదుకుని, వారి జీవితాల్లో వెలుగులు నింపాలనే సంకల్పంతో ముందుకు సాగుతున్నది. దేశంలో ఎక్కడా లేని విధంగా మత్స్యకారులకు నూరు శాతం సబ్సిడీపై చేప పిల్లలను పంపిణీ చేసి వారు ఆర్థికంగా అభివృద్ధి చెందేందుకు భరోసా కల్పిస్తున్నది. గతంలో 35 టీవీఎస్‌, 2 టాటా, 1 అశోక్‌ లేలాండ్‌ వాహనాలను అందించారు. దీంతో మత్స్యకారులు ఉపాధి పొందుతున్నారు.
  కార్యక్రమంలో ఎంపీపీ శ్రీనివాస్‌రెడ్డి, పార్టీ కోట్‌పల్లి, ధారూరు మండల అధ్యక్షులు అనీల్‌కుమార్‌, వేణుగోపాల్‌రెడ్డి, ప్రధాన కార్యదర్శి యూనుస్‌, సర్పంచుల సంఘం అధ్యక్షుడు వెంకటేశం, ఏఎంసీ చైర్మన్‌ రాములు, వైస్‌ చైర్మన్‌ రాజుగుప్తా, పీఏసీఎస్‌ చైర్మన్‌ సత్యనారాయణరెడ్డి, నాయకులు రాజునాయక్‌, హన్మంత్‌రెడ్డి, సంతోష్‌కుమార్‌, అంజయ్య, వెంకటయ్య, హఫీజ్‌, బసప్ప, అమర్‌నాథ్‌, సర్పంచులు ఉన్నారు.

మత్స్యకారుల కుటుంబాల్లో వెలుగులు

• రావిరాల ఆనంద్‌, మత్స్యసంఘం మండలాధ్యక్షుడు
  మత్స్యకారుల జీవనోపాధి గురించి గత ప్రభుత్వాలు పట్టించుకోలేదు. స్వరాష్ట్రంలో మత్స్యకారుల ఆర్థిక చేయూతకు ప్రభుత్వం కృషి చేస్తున్నది. ఏటా ఉచితంగా చేపపిల్లలను పంపిణీ చేసి మత్స్యకారుల కుటుంబాల్లో వెలుగులు నింపుతున్న సీఎం కేసీఆర్‌కు కృతజ్ఞతలు.

చేప పిల్లలతో జీవనోపాధి

• మొగులయ్య, మత్స్యసంఘం మండల ఉపాధ్యక్షుడు
  ఎన్నో ప్రభుత్వాలు వచ్చిపోయాయి. కానీ మా కులవృత్తిని ఎవరూ పట్టించుకోలేదు. చెరువులు, కుంటల్లో నీరున్నా.. చేపలు లేకపోవడంతో ఉపాధి కరువైంది. దీంతో కూలీ పనులు చేసుకుంటూ కాలాన్ని గడిపాం. సీఎం కేసీఆర్‌ సారు నూరు శాతం సబ్సిడీతో చేప పిల్లలను చెరువుల్లో వదలడంతో మాకు ఉపాధి లభించింది. ఆర్థికంగా బాగుపడ్డం. చేయూతన్చిన సీఎం కేసీఆర్‌ సారుకు రుణపడి ఉంటాం.