పాల సంఘానికి ఎన్నికల వేళాయె

• నార్మాక్స్‌లో 6 డైరెక్టర్‌ స్థానాల భర్తీకి నేడు నోటిఫికేషన్‌
• 17 నుంచి నామినేషన్‌ ఫారాల విక్రయం
• 20 నుంచి 22వ తేదీ వరకు నామినేషన్ల స్వీకరణ
• 23న పరిశీలన.. 24న ఉపసంహరణ
• 28న పోలింగ్‌.. అదేరోజు ఫలితాలు
• 29న చైర్మన్‌ ఎన్నిక

నల్లగొండ ప్రతినిధి, ఆగస్టు 31 (నమస్తే తెలంగాణ): నల్లగొండ- రంగారెడ్డి పాల ఉత్పత్తిదారుల పరస్పర సహాయక సహకార యూనియన్‌(నార్మాక్స్‌)లో ఖాళీ అవుతున్న ఆరు డైరెక్టర్‌ స్థానాల భర్తీ కోసం బుధవారం ఎన్నికల నోటిఫికేషన్‌ విడుదల కానుంది. ఈ నెల 17వ తేదీ నుంచి ఎన్నికల నిర్వహణ ప్రక్రియను ప్రారంభించాలని పాలకవర్గం నిర్ణయించింది. గత ఏడాది సెప్టెంబర్‌లో మూడు డైరెక్టర్‌ స్థానాలు ఖాళీ అయ్యాయి. అయితే అదే నెలలో ఎన్నికలు నిర్వహించాల్సి ఉండగా కరోనా నేపథ్యంలో వాయిదా వేస్తూ వచ్చారు. ఇక ఈ నెలలో షెడ్యూల్‌ ప్రకారం మరో మూడు డైరెక్టర్‌ స్థానాలు ఖాళీ కానున్నాయి. దీంతో గతంలో ఖాళీ అయిన మూడు స్థానాలతో పాటు ఈ నెలలో ఖాళీ కానున్న మూ డు డైరెక్టర్‌ స్థానాలకు ఎన్నికలు నిర్వహించాలని నార్మాక్స్‌ పాలకవర్గ సర్వసభ్య సమావేశం నిర్ణయించింది. గత నెల 17వ తేదీన నిర్వహించిన పాలకవర్గ సమావేశంలో ఎన్నికల నిర్వహణపై ఏకగ్రీవ తీర్మానం చేశారు. ఈ తీర్మానం మేరకే ఖాళీ అవుతున్న ఆరు డైరెక్టర్‌ స్థానాలకు ఎన్నికలు నిర్వహించేందుకు నేడు నోటిఫికేషన్‌ జారీ చేయనున్నారు. కాగా పాలకవర్గంలో మొత్తం 15 డైరెక్టర్‌ స్థానాలకుగాను ప్రతి ఏటా మూడు స్థానాలు ఖాళీ అవుతుంటాయి. ఈ మూడింటికీ వెంటనే ఎన్నికలు నిర్వహించి భర్తీ చేయడం ఆనవాయితీ. అదే ప్రకారంగా ఈ సారి కూడా ఎన్నికల నిర్వహణకు ఏర్పాట్లు చేస్తున్నారు.

ఎన్నికల షెడ్యూల్‌ ఇలా ..

నేడు ఎన్నికల నోటిఫికేషన్‌ విడుదల
17 నుంచి 22వరకు ఫారాల విక్రయం
20 నుంచి 22 వరకు నామినేషన్ల స్వీకరణ
23వ తేదీన నామినేషన్‌ పత్రాల పరిశీలన
24వ తేదీన ఉదయం 11గంటల నుంచి సాయంత్రం 5గంటల వరకు ఉపసంహరణ. ఆ వెంటనే అభ్యర్థుల తుదిజాబితా విడుదల.
28వ తేదీ ఉదయం 8.30 గంటల నుంచి మధ్యాహ్నం 1గంట వరకు పోలింగ్‌ (ఏక గ్రీవం కాని పక్షంలో).మధ్యాహ్నం 2గంటల నుంచి ఓట్ల లెక్కింపు, అనంతరం ఫలితాల వెల్లడి.
29వ తేదీ ఉదయం 11గంటలకు కొత్త డైరెక్టర్లతో కలిపి పాలకవర్గ సమావేశం నిర్వహ ణ. చైర్మన్‌ ఎన్నిక.