ఎదిగిన మహా వృక్షం

నీడనిచ్చే చెట్టును ఈసడించుకునే వారు ఎవరైనా ఉంటారా? ప్రభువు కూడా మహావృక్షం లాంటి వాడే. ఆయన దిగొచ్చింది..

నీడనిచ్చే చెట్టును ఈసడించుకునే వారు ఎవరైనా ఉంటారా? ప్రభువు కూడా మహావృక్షం లాంటి వాడే. ఆయన దిగొచ్చింది.. ప్రేమను ప్రబోధించడానికి కాదు! అనుభవంలోకి తీసుకురావడానికి. ప్రభువు మానవుడిగా రావడానికి కారణం.. మనిషిని మనిషిగా మార్చడానికి. ఆ మారిన మానవుణ్ని మహోన్నతుడిగా తీర్చిదిద్దడానికి. అలా తీర్చిదిద్దిన వాడిని తనతో సమానుడిగా నిలబెట్టడానికి. ఇందులో ఎలాంటి సంశయానికీ తావు లేదు. తనయుణ్ని తనంతవాణ్ని చేయాలని ఏ తండ్రికి మాత్రం ఉండదు? ఆయన బోధనలు ఇదే విషయాన్ని స్పష్టం చేస్తాయి.

అందులోనే త్యాగం, సేవ, నీతి ఒకటేమిటి అన్నీ నిబిడీకృతమై ఉన్నాయి. మానవుణ్ని భద్రంగా చేర్చి సుఖవంతంగా కూర్చోమని చెప్పిన వృక్షం ఇదే మరి! ఈ నీడలో కూర్చుంటే మనిషి మనసు ఆహ్లాదంగా, స్వేచ్ఛగా ఎంత ఆనందిస్తుందో అనుభవిస్తే గానీ తెలియదు! అది సాదాసీదా మాను కాదు. కొండపై సాటి మానవుడి కోసమై ప్రాణాలు విడిచి సజీవంగా నిలిచిన మహావృక్షమది. ఆ చెట్టు నీడలో సదా సేదతీరుదాం!