Visit:
Sreeleela | శ్రీలీల అంటే వెండితెరపై మెరిసే అందం, ఎనర్జీతో నిండిన డాన్స్, వరుస హిట్ సినిమాలే గుర్తుకు వస్తాయి. కానీ ఈ యువ హీరోయిన్ గ్లామర్కు మాత్రమే పరిమితం కాదని, ఆమె మనసు ఎంత విశాలమో మరోసారి నిరూపించుకుంది. స్టార్ హీరోయిన్గా కెరీర్లో వేగంగా ముందుకెళ్తున్న శ్రీలీల, కేవలం 24 ఏళ్ల వయసులోనే ముగ్గురు పిల్లలను దత్తత తీసుకుని సమాజానికి ఆదర్శంగా నిలిచింది. తెరపై ప్రేక్షకులను అలరిస్తూనే, తెర వెనుక బాధ్యతగల పౌరురాలిగా తన ప్రత్యేక గుర్తింపును చాటుతోంది.ఇటీవల ఓ ఇంటర్వ్యూలో ఈ దత్తత అంశంపై స్పందించిన శ్రీలీల, తన మనసులోని భావాలను ఎంతో ఆత్మీయంగా పంచుకుంది.
ఈ విషయం గురించి మాట్లాడాలంటే నాకు మాటలు రావు. కాస్త భావోద్వేగానికి లోనవుతాను కూడా. కానీ ఆ పిల్లల్ని నేను పూర్తిగా నా బాధ్యతగా చూసుకుంటున్నాను. వాళ్లకు నేను సాధారణంగా మనం ఊహించుకునే అమ్మలా ఉండను. దానికి వెనుక ఒక ప్రత్యేకమైన కథ ఉంది అంటూ తన ప్రయాణాన్ని వివరించింది. తన జీవితంలో ఈ నిర్ణయం ఎలా మార్పు తీసుకొచ్చిందో చెప్పేటప్పుడు ఆమె మాటల్లో స్పష్టమైన భావోద్వేగం కనిపించింది. తన కెరీర్ ప్రారంభ దశలో ‘కిస్’ సినిమా సమయంలో ఒక ఆశ్రమాన్ని సందర్శించిన సందర్భాన్ని శ్రీలీల గుర్తు చేసుకుంది. అక్కడి పిల్లలతో ఏర్పడిన అనుబంధమే తన జీవితాన్ని మలుపు తిప్పిందని ఆమె తెలిపింది. మొదట ఈ విషయాన్ని పూర్తిగా వ్యక్తిగతంగా ఉంచాలనుకున్నప్పటికీ, సమాజంలో మరికొంత మందిలో సేవా భావం పెరగాలనే ఉద్దేశంతోనే ఇప్పుడు ఈ విషయం బయటకు చెప్పినట్లు వెల్లడించింది. తన నిర్ణయం ఎవరికైనా ప్రేరణగా మారితే చాలు అనే ఆలోచనతోనే మాట్లాడుతున్నానని పేర్కొంది.
2022లోనే ఇద్దరు దివ్యాంగ పిల్లలను దత్తత తీసుకున్న శ్రీలీల, తర్వాత మరో పిల్లవాడిని కూడా తన జీవితంలో భాగం చేసుకుంది. సినిమాల షూటింగ్లు, కెరీర్ బిజీ షెడ్యూల్ మధ్యలోనూ పిల్లల భవిష్యత్తుపై ప్రత్యేక శ్రద్ధ తీసుకుంటూ, వారి చదువు, ఆరోగ్యం, జీవనోపాధి విషయంలో పూర్తి బాధ్యత వహిస్తున్నట్లు సమాచారం. స్టార్డమ్ ఉన్నప్పటికీ సాధారణ మనిషిలా, ప్రేమతో కూడిన బంధాన్ని నిర్మించడమే తన లక్ష్యమని ఆమె చెబుతోంది. మొత్తానికి శ్రీలీల తన నటనతోనే కాదు, తన మనసుతో కూడా నిజమైన ‘స్టార్’ అని నిరూపించుకుంటోంది. గ్లామర్ ప్రపంచంలో ఉండి కూడా సేవ, మానవత్వం, బాధ్యతలను మరిచిపోకుండా ముందుకు సాగుతున్న ఈ యువ నటి చర్యలు ఎంతో మందికి ఆదర్శంగా నిలుస్తున్నాయి.
