థియేటర్స్‌లోనే ‘SR క‌ళ్యాణమండపం’ రిలీజ్‌

థియేటర్స్ లో కళ్యాణమండపం ఏంటి అనుకుంటున్నారా..? ఇదే సినిమా టైటిల్ మరి. SR కళ్యాణమండపం అనే సినిమాతో ప్రేక్షకుల ముందుకొస్తున్నాడు కుర్ర హీరో కిరణ్ అబ్బవరం.

July 12, 2021 / 09:54 PM IST

థియేటర్స్‌లోనే ‘SR క‌ళ్యాణమండపం’ రిలీజ్‌

థియేటర్స్ లో కళ్యాణమండపం ఏంటి అనుకుంటున్నారా..? ఇదే సినిమా టైటిల్ మరి. SR కళ్యాణమండపం అనే సినిమాతో ప్రేక్షకుల ముందుకొస్తున్నాడు కుర్ర హీరో కిరణ్ అబ్బవరం. ఈయన గతంలో రాజావారు రాణిగారు సినిమాలో నటించాడు. ఎలైట్ ఎంట‌ర్ టైన్మెంట్స్ ప‌తాకంపై ప్ర‌మోద్ – రాజు నిర్మాత‌లుగా.. నూత‌న దర్శ‌కుడు శ్రీధ‌ర్ గాదే తెరకెక్కించిన సినిమా ‘ SR క‌ళ్యాణమండపం’ EST 1975. టాక్సీవాలా ఫేమ్ ప్రియాంక జ‌వాల్క‌ర్ ఇందులో హీరోయిన్ గా నటించింది. ఈ సినిమా టైటిల్ ఎనౌన్స్ మెంట్ ద‌గ్గ‌ర నుంచి అన్ని వ‌ర్గాల ప్రేక్ష‌కుల్లో అస‌క్తిని క్రియేట్ చేసుకుంది.

ఆ ఉత్కంఠ‌ని మ‌రింత పెంచుతూ ఆ త‌రువాత విడుద‌ల చేసిన చుక్క‌ల చున్ని, చూసాలే క‌ళ్లార వంటి పాట‌లు యూట్యూబ్ లో మిలియ‌న్స్ కొద్దీ వ్యూస్ తెచ్చుకోవ‌డ‌మే కాకుండా సోష‌ల్ మీడియాలో సైతం ట్రెండ్ అవుతున్నాయి. వీటితో పాటే విడుద‌ల చేసిన టీజ‌ర్ కి సైతం అంతటా అనూహ్య స్పంద‌న ల‌భించ‌డ‌మే కాకుండా, టాలీవుడ్ ట్రేడ్ వ‌ర్గాల్లో SR క‌ళ్యాణమండపం EST 1975 చిత్రం హాట్ టాపిక్‌గా మారడం విశేషం. ఇటీవ‌లే SR క‌ళ్యాణమండంపం EST 1975 చిత్రాన్ని మాత్రం థియేట‌ర్ లో విడుద‌ల చేస్తున్నామంటూ అధికారికంగా ప్ర‌క‌టించ‌డ‌మే కాకుండా అందుకు త‌గ్గ‌ట్లుగా నిర్మాత‌లు ప్ర‌మోద్ – రాజులు సన్నాహాలు చేస్తున్నారు. ఈ నేప‌థ్యంలో కొన్ని రోజుల కింద శంక‌ర్ పిక్చ‌ర్స్ వాళ్ళు ఈ చిత్రానికి సంబంధించిన వ‌ర‌ల్డ్ వైడ్ రైట్స్ ఫ్యాన్సీ రేటుకి ద‌క్కించుకున్నారు.

ఇక ఈ సినిమాలో హీరోగా న‌టించ‌డ‌మే కాకుండా క‌థ‌, స్క్రీన్ ప్లే, డైలాగ్స్ సైతం కిర‌ణ్ అబ్బ‌వ‌రం అందించ‌డం విశేషం. విల‌క్ష‌ణ న‌టుడు, డైలాగ్ కింగ్ సాయికుమార్ ఈ సినిమాలో కీల‌క పాత్ర పోషిస్తున్నారు. ఆయ‌న పాత్ర ఈ చిత్రానికి ప్ర‌ధాన ఆకర్ష‌ణ‌గా నిల‌వ‌నుంద‌ని ద‌ర్శ‌కుడు శ్రీధ‌ర్ గాదే తెలిపారు. ఈ సినిమాను ఆగస్ట్ 6న ప్రపంచ వ్యాప్తంగా థియేటర్స్‌లో విడుదల చేయనున్నట్లు మేకర్స్ ప్రకటించారు. సినిమాకు సంబంధించిన మరిన్ని వివరాలు త్వరలోనే తెలియజేయనున్నారు దర్శక నిర్మాతలు.