ఒక్కో పాట‌కు సిద్ శ్రీరామ్ రెమ్యున‌రేష‌న్ తెలిస్తే ఖంగు తింటారు..!

April 24, 2021 / 04:30 PM IST

ఎక్కడో అమెరికా నుంచి వచ్చి తెలుగు ఇండస్ట్రీలో స్టార్ సింగర్ అయిపోయాడు సిద్ శ్రీరామ్. తమ సినిమాల్లో కనీసం ఒక్క పాటైనా ఈ గాయకుడితో పాడించాలని సంగీత దర్శకులు కూడా పట్టు పడుతున్నారు. నిర్మాతలు కూడా ఈయన పాట చూపించి బిజినెస్ పూర్తి చేస్తున్నారు. తెలుగులో అంత క్రేజ్ సంపాదించుకున్న సింగర్ మరొకరు లేరు. ఒకప్పుడు ఎస్పీ బాలు, యేసుదాస్ లాంటి లెజెండరీ సింగర్స్ విషయంలో మాత్రమే సంగీత దర్శకులు పట్టు పట్టేవాళ్లు. వాళ్లతో పాటలు పాడించడానికి కష్టపడేవాళ్లు. అలాగే ఇప్పుడు సిద్ శ్రీరామ్ విషయంలో ఇదే జరుగుతుంది. ఈయన పాడితే ఆ పాటే సినిమాకు ప్రాణం అవుతుంది. ఒక్క ముక్కలో చెప్పాలంటే సిద్ పాట పాడితే అదే బిజినెస్ మంత్రం. ముందుగా ఒక్క పాటను విడుదల చేసి బిజినెస్ పూర్తి చేస్తున్నారు దర్శక నిర్మాతలు.

యాంకర్ ప్రదీప్ హీరోగా వచ్చిన 30 రోజుల్లో ప్రేమించడం ఎలా సినిమాలో నీలినీలి ఆకాశం.. శశి సినిమాలో ఒకేఒక లోకం నువ్వు.. వకీల్ సాబ్ సినిమాలో మగువ మగువ.. అల వైకుంఠపురంలో సామజవరగమనా ఇలా ఈయన ఏ పాట పాడినా కూడా సంచలనం అనే మాట తప్ప మరోటి లేదు. గీత గోవిందంలో ఇంకేం కావాలి పాట ఇప్పటికీ వింటుంటారు అభిమానులు. సిద్ గళం నుంచి ఏ పాట వచ్చినా కూడా సూపర్ హిట్టే. దానికి మరో మాటే లేదు. అంత క్రేజ్ ఉంది కాబట్టే ఈయన కోసం సంగీత దర్శకులు కూడా ఎగబడుతున్నారు. అయితే మనోడి పాటలో క్లారిటీ ఉండదు.. పదాలు స్పష్టంగా పలకడు అనే విమర్శలు ఉన్నా కూడా సిద్ మాత్రం దూసుకుపోతున్నాడు.

ఈయన ఒక్కో పాట కోసం ఎంత తీసుకుంటాడు అనేది మాత్రం చాలా మందికి కనీసం ఐడియా లేదు. ఈ రోజుల్లో సింగర్స్‌కు ఒక్క పాట పాడితే మహా అయితే 20 వేలు ఇస్తుంటారు.. స్టార్ సింగర్ అయితే 50 వేలు.. మరీ గొప్ప సింగర్ అయితే లక్ష అంతే. కానీ సిద్ ఎంత తీసుకుంటాడో తెలుసా..? అక్షరాలా 4.5 లక్షలు. నమ్మడానికి ఆశ్చర్యంగా ఉన్నా కూడా ఆయన రేట్ ఇంతే అని తెలుస్తుంది. కొన్ని రోజుల కింది వరకు 4 లక్షల వరకు తీసుకున్నా కూడా ఇప్పుడు మరో 50 వేలు పెంచేసాడని ప్రచారం జరుగుతుంది. మిగిలిన వాళ్లు లక్ష కోసం యుద్ధాలు చేస్తుంటే.. సిద్ శ్రీరామ్ మాత్రం నాలుగు రెట్లు ఎక్కువ తీసుకుంటున్నాడు.