santosham awards | సంతోషం అవార్డులు ఇలాగే ఇంకో రెండు ద‌శాబ్దాలు కొన‌సాగాలి

November 14, 2021 / 05:14 AM IST

santosham awards | ‘ఎన్ని కష్టాలు, అవరోధాలు ఎదురైనా అధిగమిస్తూ ఇరవై ఏళ్లుగా నిర్విరామంగా అవార్డుల్ని ఇస్తుండటం అభినందనీయం. సంతోషం అవార్డుల వేడుకలు మరో రెండు దశాబ్దాల పాటు ఇలాగే దిగ్విజయంగా కొనసాగాలి’ అని అన్నారు నటుడు ఆలీ. సంతోషం-సుమన్‌ టీవీ సౌత్‌ ఇండియన్‌ ఫిలిం అవార్డ్స్‌ కర్టెన్‌ రైజర్‌ కార్యక్రమం శుక్రవారం హైదరాబాద్‌లో జరిగింది. బ్రోచర్‌ను ఆలీ విడుదలచేశారు.

ఈ సందర్భంగా ఆయన మాట్లాడుతూ ‘ఈ సారి జరగబోయే అవార్డుల వేడుకలకు తెలుగు అగ్రనటీనటులతో పాటు తమిళం, కన్నడ, మలయాళం, హిందీ భాషల తారలు పాల్గొనబోతున్నారు’ అని తెలిపారు. సురేష్‌ కొండేటి సంకల్పబలం వల్లే సుదీర్ఘకాలం పాటు ఈ అవార్డు వేడుకలు విజయవంతమవుతున్నాయని హీరో సుశాంత్‌ అన్నారు. సురేష్‌ కొండేటి మాట్లాడుతూ ‘ఈ నెల 14న ఈ అవార్డుల వేడుకను నిర్వహించబోతున్నాం. రెండు దశాబ్దాల పాటు గుర్తుండిపోయేలా ఈ వేడుకలు జరుగనున్నాయి. ఈ వేదికపై దివంగత గాయకుడు ఎస్పీ బాలసుబ్రహ్మణ్యానికి వందమంది గాయనీగాయకులతో నివాళి అర్పించబోతున్నాం’ అని చెప్పారు. ఈ కార్యక్రమంలో ఇంద్రజ, ఆకాష్‌పూరి, మన్నారా చోప్రా తదితరులు పాల్గొన్నారు.