రాధే సినిమాకు రికార్డు స్థాయిలో ఫ‌స్ట్ డే క‌లెక్ష‌న్లు.. రెండో రోజు మాత్రం తుస్‌

మే 13న జీ5 యాప్ ద్వారా విడుద‌లైన రాధే సినిమాకు తొలి రోజే 4.2 మిలియ‌న్ వ్యూస్ వచ్చాయి. సినిమాకు డిజాస్ట‌ర్ టాక్ రావ‌డంతో రెండో రోజు క‌లెక్ష‌న్లు దారుణంగా ప‌డిపోయాయి.

May 15, 2021 / 07:01 PM IST

రాధే సినిమాకు రికార్డు స్థాయిలో ఫ‌స్ట్ డే క‌లెక్ష‌న్లు.. రెండో రోజు మాత్రం తుస్‌

బాలీవుడ్ హీరో స‌ల్మాన్ ఖాన్ ప్ర‌తిసారి రంజాన్ పండుగ‌కు ఒక సినిమాను విడుద‌ల చేయ‌డం కొన్నేళ్లుగా ఆన‌వాయితీగా వ‌స్తుంది. వాటికి రికార్డు వ‌సూళ్లు కూడా వ‌స్తుంటాయి. అలాగే ఈసారి ఈద్‌కు రాధే సినిమాతో వ‌చ్చాడు స‌ల్మాన్ ఖాన్‌. ఈ సినిమాను థియేట‌ర్ల‌లో రిలీజ్ చేద్దామ‌ని మొద‌ట అనుకున్నా క‌రోనా కార‌ణంగా కేవ‌లం ఓటీటీలోనే విడుద‌లైంది. మే 13న జీ5 యాప్ ద్వారా విడుద‌లైన రాధే సినిమాకు తొలి రోజే 4.2 మిలియ‌న్ వ్యూస్ వచ్చాయి. ఒక్కొక్క టికెట్ 249 రూపాయ‌లు.. రాధే సినిమా కోసం జీ 5 వాళ్లు వన్ ఇయర్ సబ్క్రిప్షన్ 499 కాంబో ఆఫర్ కూడా ఇచ్చారు. ఈ లెక్క‌న ఫ‌స్ట్ డే రూ.109 కోట్ల వ‌ర‌కు వ‌సూళ్లు వ‌చ్చిన‌ట్లు ట్రేడ్ పండితులు లెక్క క‌డుతున్నారు. అయితే ఈ సినిమాకు డిజాస్ట‌ర్ టాక్ రావ‌డంతో రెండో రోజు క‌లెక్ష‌న్లు దారుణంగా ప‌డిపోయాయి.

ఓటీటీలో పే ప‌ర్ వ్యూ నుంచి కూడా మంచి వ‌సూళ్లు తీసుకురావ‌చ్చు అని రాధే తొలి రోజు క‌లెక్ష‌న్లు నిరూపించాయి. అయితే సినిమాకు అత్యంత చెత్త టాక్ రావ‌డంతో రాధే సినిమాను రెండో రోజు చూడ‌టానికి పెద్ద‌గా ఆస‌క్తి చూపించ‌లేదు. దీనికితోడు బాయ్‌కాట్ సెగ కూడా ఈ సినిమాకు త‌గిలింది. బాయ్‌కాట్‌ రాధే అంటూ సోష‌ల్ మీడియాలో హ్యాష్‌టాగ్ కూడా ట్రెండ్ అయింది. పైగా సినిమా విడుద‌లైన కొద్ది గంట‌ల్లోనే ఈ సినిమా పైర‌సీ బ‌య‌ట‌కొచ్చేసింది. దీంతో రెండో రోజు క‌లెక్ష‌న్లు తుస్ అనిపించాయి. టాక్ బాగుండుంటే మాత్రం కలెక్ష‌న్లు వేరేలా ఉండేవి.

రాధే సినిమాకు ప్ర‌భుదేవా ద‌ర్శ‌కుడు. దిశా ప‌టానీ హీరోయిన్‌గా న‌టించిన ఈ సినిమాలో అల్లు అర్జున్ సిటీమార్ పాట‌ను కాపీ చేశారు. దీంతో మ‌న వాళ్లు కూడా ఈ సినిమాపై కాస్త ఆస‌క్తి చూపించారు. అయితే అంద‌రి అంచ‌నాలను త‌ల‌కిందులు చేస్తూ దారుణంగా నిరాశ ప‌రిచాడు మోస్ట్ వాంటెడ్ భాయ్.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి