రాధేతో నిరాశ‌ప‌ర‌చిన ప్ర‌భుదేవా..డైరెక్ష‌న్‌కు బైబై చెప్పాలంటూ సూచ‌న‌!

May 14, 2021 / 05:23 PM IST

నువ్వొస్తానంటే నేనొద్దంటానా వంటి బ్లాక్ బస్టర్ సినిమాతో దర్శకుడిగా పరిచయమయ్యాడు ప్రభుదేవా. సిద్ధార్థ్, త్రిష జంటగా నటించిన ఈ సినిమా సంచలన విజయం సాధించడమే కాకుండా తమిళం, హిందీ, కన్నడ భాషల్లో కూడా రీమేక్ అయ్యింది. ఈ సినిమా తర్వాత ఈయన డైరెక్టర్ గా బిజీ అయ్యాడు. అయితే తెలుగులో నువ్వొస్తానంటే నేనొద్దంటానా తర్వాత చేసిన పౌర్ణమి, శంకర్ దాదా జిందాబాద్ సినిమాలు ఫ్లాప్ అయ్యాయి. అదే సమయంలో తమిళంలో పోకిరి సినిమాను రీమేక్ చేశాడు ప్రభుదేవా. విజయ్ హీరోగా తెరకెక్కిన ఈ సినిమా విజయం సాధించింది. తర్వాత అదే సినిమాను హిందీలో సల్మాన్ ఖాన్ తో వాంటెడ్ పేరుతో రీమేక్ చేసాడు. అక్కడ కూడా ఈ సినిమా అద్భుతమైన విజయం సాధించింది.

దాంతో బాలీవుడ్ హీరోలకు బాగా కనెక్ట్ అయిపోయాడు ప్రభుదేవా. విక్రమార్కుడు రీమేక్ రౌడీ రాథోడ్, రాంబో రాజ్ కుమార్, యాక్షన్ జాక్సన్, దబాంగ్ 3 లాంటి సినిమాలు అక్కడ తెరకెక్కించాడు. అందులో రౌడీ రాథోడ్ మాత్రమే విజయం సాధించింది. మిగిలిన మూడు సినిమాలు డిజాస్టర్. ఇలాంటి సమయంలో సల్మాన్ ఖాన్ మరోసారి ఆయన చేసిన సినిమా రాధే రంజాన్ సందర్భంగా నేరుగా డిజిటల్ ప్లాట్ ఫాంలో విడుదలైంది. ఈ సినిమాకు డిజాస్టర్ టాక్ వచ్చింది. ప్రభుదేవా దర్శకుడిగా ఏ మాత్రం సూట్ అవ్వడు హాయిగా వెళ్లి నటుడిగా.. డాన్స్ మాస్టర్ గా చేసుకుంటే బెటర్ అంటూ సల్మాన్ వీరాభిమానులు ఉచిత సలహాలు ఇస్తున్నారు.

సినిమాలో అసలు విషయం లేకుండా చేయడం కంటే ఖాళీగా రెస్ట్ తీసుకోవడం నయం అంటూ ఫాన్స్ మండి పడుతున్నారు. ఇప్పటివరకు ప్రభుదేవాకు అవకాశాలు ఇచ్చింది చాలు.. ఇకపై వద్దు అంటూ తమ హీరోలకు అభిమానులు అర్జీ పెట్టుకుంటున్నారు. ఏదేమైనా రాధే సినిమా ఫలితం చూసిన తర్వాత ప్రభుదేవాను దర్శకుడిగా మరిచిపోతారేమో..!