సైంధవ్‌.. ఓ భావోద్వేగ ప్రయాణం

‘హిట్‌' సిరీస్‌ చిత్రాలతో ప్రతిభావంతుడైన దర్శకుడిగా గుర్తింపును తెచ్చుకున్నారు శైలేష్‌ కొలను. ఆయన దర్శకత్వంలో వెంకటేష్‌ కథానాయకుడిగా నటించిన ‘సైంధవ్‌' చిత్రం ఈ నెల 13న విడుదలకు సిద్ధమవుతున్నది.

‘హిట్‌’ సిరీస్‌ చిత్రాలతో ప్రతిభావంతుడైన దర్శకుడిగా గుర్తింపును తెచ్చుకున్నారు శైలేష్‌ కొలను. ఆయన దర్శకత్వంలో వెంకటేష్‌ కథానాయకుడిగా నటించిన ‘సైంధవ్‌’ చిత్రం ఈ నెల 13న విడుదలకు సిద్ధమవుతున్నది. ఈ సందర్భంగా శైలేష్‌ కొలను పాత్రికేయులతో ముచ్చటించారు. ఆ విశేషాలివి..

• ‘హిట్‌-2’ తర్వాత ఓ సందర్భంలో వెంకటేష్‌గారిని కలిశాను. ఆ తర్వాత జరిగిన రెండుమూడు మీటింగ్స్‌లోనే మా మధ్య మంచి బాండ్‌ ఏర్పడింది. అప్పుడే ‘సైంధవ్‌’ కథ చెప్పాను. ‘కథ చాలా బాగుంది. ఇది నా 75వ సినిమా అనిపిస్తోంది’ అంటూ వెంకటేష్‌గారు గ్రీన్‌ సిగ్నల్‌ ఇచ్చారు. అలా ఈ సినిమా మొదలైంది.
• ఇప్పటివరకు నేను ఇన్వెస్టిగేటివ్‌ థ్రిల్లర్స్‌ చేశాను. భావోద్వేగాలు కలబోసిన కథను డైరెక్ట్‌ చేయడం ఇదే తొలిసారి. తమ కూతురుని రక్షించుకునే క్రమంలో 17కోట్ల రూపాయల విలువైన ఇంజక్షన్‌ కోసం తపన పడే పేరెంట్స్‌, ఈ క్రమంలో వచ్చే ఎమోషనల్‌ సన్నివేశాలు సినిమాకు ఆయువుపట్టులా ఉంటాయి.
• ఈ కథ 70శాతం రాత్రివేళలో జరుగుతుంది. దాంతో నైట్‌ సీక్వెన్స్‌లు ఎక్కువగా ఉంటాయి. ఈ సినిమాలో ప్రతినాయకుడిగా నటించిన నవాజుద్దీన్‌ సిద్ధిఖీ పాత్ర చాలా యూనిక్‌గా ఉంటుంది. ‘ఇంద్రప్రస్థ’ అనే ఫిక్షనల్‌ సిటీలో ఈ కథ నడిచినట్లు చూపించాం. డ్రగ్స్‌, గన్‌ బిజినెస్‌ కార్యకలాపాల నేపథ్యంలో ఇంద్రప్రస్థ నగరం మరో ప్రపంచాన్ని తలపిస్తుంది.
• వెంకటేష్‌గారి 75వ చిత్రమిది. అయితే ఈ విషయంలో నేను ఎలాంటి ఒత్తిడిగా ఫీల్‌ కాలేదు. నిజాయితీగా సినిమాలు తీయడమే నా పని. జయాపజయాల కంటే ప్రయాణాన్ని ఆస్వాదించే తత్వం నాది. ‘సైంధవ్‌’ కథను ఎంతగానో ప్రేమించి కమిట్‌మెంట్‌తో తీశాను. తప్పకుండా విజయం సాధిస్తుందనే నమ్మకం ఉంది. ప్రస్తుతం ‘హిట్‌-3’ స్క్రిప్ట్‌ వర్క్‌ జరుగుతున్నది. అయితే ఆ సినిమా రావడానికి మాత్రం మరో ఏడాదిన్నర పడుతుందని అనుకుంటున్నా.