నటన కంటే దర్శకత్వానికే ప్రాధాన్యం!

‘నేను కాలేజీలో చూసిన ఓ సంఘటన ఆధారంగా ఈ కథ రాసుకున్నా. అప్పట్లో వచ్చిన ఓ పాట కూడా కథ విషయంలో స్ఫూర్తినిచ్చింది. రష్మిక మందన్న ఈ కథ విని బాగా ఎక్సైట్‌ అయింది. ‘ఓ అమ్మాయిగా ఈ స్టోరీకి నేను బాగా కనెక్ట్‌ అయ్యాను.

‘నేను కాలేజీలో చూసిన ఓ సంఘటన ఆధారంగా ఈ కథ రాసుకున్నా. అప్పట్లో వచ్చిన ఓ పాట కూడా కథ విషయంలో స్ఫూర్తినిచ్చింది. రష్మిక మందన్న ఈ కథ విని బాగా ఎక్సైట్‌ అయింది. ‘ఓ అమ్మాయిగా ఈ స్టోరీకి నేను బాగా కనెక్ట్‌ అయ్యాను. అందరికి చెప్పాల్సిన కథ ఇది’ అంటూ నన్ను ప్రోత్సహించింది’ అని అన్నారు నటుడు, దర్శకుడు రాహుల్‌ రవీంద్రన్‌. ఆయన నిర్ధేశకత్వంలో రష్మిక మందన్న, దీక్షిత్‌శెట్టి ప్రధాన పాత్రల్లో నటించిన ప్రేమకథా చిత్రం ‘ది గర్ల్‌ఫ్రెండ్‌’ నవంబర్‌ 7న ప్రేక్షకుల ముందుకురానుంది. ఈ సందర్భంగా గురువారం రాహుల్‌ రవీంద్రన్‌ విలేకరులతో సినిమా విశేషాలను పంచుకున్నారు.

• నేటికాలంలో యువతీయువకుల మధ్య సంబంధాలను కొత్త కోణంలో ఆవిష్కరించే చిత్రమిది. సంఘర్షణతో కూడిన రిలేషన్‌షిప్‌ డ్రామాగా ఆకట్టుకుంటుంది. ట్రైలర్‌లో సినిమా కథ గురించి ఎలాంటి హింట్‌ ఇవ్వలేదు. ఓ జంట జీవితంలో చోటుచేసుకునే సంఘటనలు, వారి ప్రయాణంలోని మలుపులు ప్రేక్షకుల్ని సర్‌ప్రైజ్‌ చేస్తాయి.
• ఈ సినిమాలో రష్మిక మందన్న పాత్ర రియలిస్టిక్‌గా ఉంటుంది. ఆమె దృక్కోణంలో ఈ కథ సాగుతుంది. ఈ రిలేషన్‌షిప్‌ డ్రామా ద్వారా ప్రేక్షకులకు ఎలాంటి సందేశాలు ఇవ్వడం లేదు. ఎందుకంటే ఇవాళ మనం మంచిది అనుకున్నది ఓ ఐదేళ్ల తర్వాత తప్పుగా అనిపించవొచ్చు. అందుకే సినిమా ద్వారా సందేశాలు అందించే సాహసం చేయను. ఇంటెన్స్‌ ఎమోషన్స్‌ ఉన్న లవ్‌స్టోరీని రియలిస్టిక్‌గా చూపించే ప్రయత్నం చేశాను.
• దర్శకుడిగా నేను ఎలాంటి ముద్రను కోరుకోవడం లేదు. నేను చూసిన, చదివి తెలుసుకున్న సంఘటనలతో స్ఫూర్తిపొంది కథలు రాసుకుంటాను. తొలినాళ్లలో సహాయ దర్శకుడిగా అవకాశాల కోసం నిరీక్షిస్తున్న సమయంలో హీరోగా ఛాన్స్‌ వచ్చింది. ఇండస్ట్రీలో పరిచయాలు పెరుగుతాయి కదా అని నటించాను. అయితే నా మనసంతా ఎప్పుడూ దర్శకత్వం పైనే ఉండేది. నేను నటించడాన్ని ఎంజాయ్‌ చేస్తాను కానీ నా తొలి ప్రాధాన్యం దర్శకత్వానికే. నేను డైరెక్ట్‌ చేయబోయే రెండు సినిమాలు ఓకే అయ్యాయి. వాటి వివరాలు త్వరలో తెలియజేస్తా.