NTR | సీనియ‌ర్ ఎన్టీఆర్ జయంతి .. ఘాట్ వద్ద నివాళులు అర్పించిన జూనియర్ ఎన్టీఆర్

NTR | తెలుగు ప్రజల ఆరాధ్య దైవం, మాజీ ముఖ్యమంత్రి, నటసార్వభౌముడు నందమూరి తారకరామారావు జయంతి సందర్భంగా హైదరాబాద్‌లోని ఎన్టీఆర్ ఘాట్ వద్ద భావోద్వేగ వాతావరణం నెలకొంది. ఈ సందర్భంగా ప్రముఖ నటుడు జూనియర్ ఎన్టీఆర్ నేడు ఉదయం ఎన్టీఆర్ ఘాట్‌కు చేరుకుని తన తాతయ్య ఎన్టీఆర్‌కు ఘనంగా నివాళులు అర్పించారు.

NTR | తెలుగు ప్రజల ఆరాధ్య దైవం, మాజీ ముఖ్యమంత్రి, నటసార్వభౌముడు నందమూరి తారకరామారావు జయంతి సందర్భంగా హైదరాబాద్‌లోని ఎన్టీఆర్ ఘాట్ వద్ద భావోద్వేగ వాతావరణం నెలకొంది. ఈ సందర్భంగా ప్రముఖ నటుడు జూనియర్ ఎన్టీఆర్ నేడు ఉదయం ఎన్టీఆర్ ఘాట్‌కు చేరుకుని తన తాతయ్య ఎన్టీఆర్‌కు ఘనంగా నివాళులు అర్పించారు. తెల్లవారుజామునే ఘాట్ వద్దకు చేరుకున్న తారక్ పూలమాల వేసి, నివాళులు సమర్పించి కొద్దిసేపు అక్కడే మౌనంగా నిలబడి తాతయ్య జ్ఞాపకాలను స్మరించుకున్నారు.

జూనియర్ ఎన్టీఆర్ రాకతో ఘాట్ పరిసరాలు అభిమానులతో కిక్కిరిశాయి. తారక్‌ను చూడాలని అభిమానులు పెద్ద ఎత్తున అక్కడికి తరలివచ్చారు. “అన్నా.. అన్నా” అంటూ అభిమానులు నినాదాలు చేయడంతో ఆ ప్రాంతం మొత్తం సందడిగా మారింది. అభిమానులకు చేతులు ఊపుతూ అభివాదం చేసిన తారక్, అనంతరం అక్కడి నుంచి వెళ్లిపోయారు. ఆయన వెంట భద్రతా సిబ్బంది భారీగా మోహరించారు.నందమూరి కుటుంబ సభ్యులు, టీడీపీ నేతలు, సినీ ప్రముఖులు కూడా ఎన్టీఆర్ ఘాట్ వద్దకు చేరుకుని మహానేతకు నివాళులు అర్పించారు. ఎన్టీఆర్ తెలుగు ప్రజల గుండెల్లో చిరస్థాయిగా నిలిచిపోయే మహానుభావుడని పలువురు కొనియాడారు. సినీ రంగంలోనూ, రాజకీయ రంగంలోనూ ఆయన చేసిన సేవలు మరువలేనివని గుర్తుచేశారు.

ఇక జూనియర్ ఎన్టీఆర్ ప్రస్తుతం వరుస సినిమాలతో బిజీగా ఉన్నప్పటికీ, ప్రతి ఏడాది ఎన్టీఆర్ జయంతి, వర్ధంతి సందర్భంగా ఘాట్ వద్దకు వచ్చి నివాళులు అర్పించడం ఆనవాయితీగా కొనసాగిస్తున్నారు. తాతయ్యపై తనకున్న అపారమైన గౌరవాన్ని తారక్ పలుమార్లు బహిరంగంగా వ్యక్తం చేసిన సంగతి తెలిసిందే. ఎన్టీఆర్ జయంతి సందర్భంగా రాష్ట్రవ్యాప్తంగా అభిమానులు సేవా కార్యక్రమాలు, అన్నదానాలు, రక్తదాన శిబిరాలు నిర్వహిస్తూ మహానేతను స్మరించుకుంటున్నారు. సోషల్ మీడియాలో కూడా ఎన్టీఆర్‌కు సంబంధించిన అరుదైన ఫొటోలు, వీడియోలు వైరల్ అవుతూ అభిమానుల్లో భావోద్వేగాన్ని కలిగిస్తున్నాయి.