Tollywood | వాణి విశ్వ‌నాథ్ కూతురితో కోటి కొడుకు సినిమా

September 22, 2021 / 08:30 PM IST

సినిమా ఇండస్ట్రీలో వారసులు ఎంత మంది ఉన్నారో ప్రత్యేకంగా లెక్కలు వేసి మరీ చెప్పాల్సిన అవసరం లేదు. హీరోల కొడుకులు హీరోలు అవుతున్నారు. అలాగే ఇతర డిపార్ట్‌మెంట్‌లో ఉన్న వాళ్లు కూడా తమ వారసులను హీరోలుగానే తీసుకొస్తున్నారు. ఈ నేపథ్యంలోనే సీనియర్ సంగీత దర్శకుడు కోటి వారసుడు రాజీవ్ సాలూరి హీరోగా గుర్తింపు కోసం చాలా సంవత్సరాలుగా ప్రయత్నిస్తున్నాడు. ఎప్పుడో 15 ఏళ్ల కింద నోట్‌బుక్‌ సినిమాతో హీరోగా ఎంట్రీ ఇచ్చినా కూడా ఆయనకు పెద్దగా గుర్తింపు రాలేదు. చాలా రోజుల తర్వాత మళ్లీ ఇంకో సినిమాతో వస్తున్నాడు ఈయన. ఇందులో సీనియర్ హీరోయిన్ వాణి విశ్వనాథ్ కూతురు వర్ష విశ్వనాథ్ హీరోయిన్‌గా పరిచయం అవుతుంది. ఈ సినిమాలో కోటి కూడా ఓ కీలక పాత్రలో న‌టిస్తుండ‌టం విశేషం.

రాజీవ్ సాలూరి, వర్ష విశ్వనాథ్ జంటగా టైగర్ హిల్స్ ప్రొడక్షన్, స్వస్తిక ఫిలిమ్స్ పతాకాలపై గాజుల వీరేష్ (బళ్లారి) నిర్మాతగా, కిట్టు నల్లూరి దర్శకత్వంలో తెరకెక్కుతున్న ‘ప్రొడక్షన్ నెంబర్ 1’ చిత్రం షూటింగ్ సెకండ్ షెడ్యూల్ ఇటీవలే వైజాగ్‌లో ప్రారంభం అయ్యింది. మణిశర్మ సంగీతం అందిస్తున్న ఈ చిత్రానికి ఈశ్వర్ సినిమాటోగ్రఫీ అందిస్తున్నాడు. పవన్ కె అచల మాటలందిస్తున్న ఈ సినిమాలో సదన్, లావణ్య‌, రాజా రవీంద్ర, రాజా శ్రీ తదితరులు ఇతర పాత్రలు పోషిస్తున్నారు. విష్ణుసూర్య గుంత ఎక్జిగ్యూటివ్ ప్రొడ్యూసర్‌గా చేస్తున్న ఈ చిత్రానికి సంబంధించిన కొన్ని కీలక సన్నివేశాలను వైజాగ్‌లో అందమైన లొకేషన్స్‌లో చిత్రీకరణ చేస్తున్నారు. త్వరలోనే ఈ సినిమాకు సంబందించిన మరిన్ని వివరాలు బయటకు రానున్నాయి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి