Nishad Kumar | చరిత్ర సృష్టించిన నిషద్ కుమార్.. నిన్న లాంగ్ జంప్, ఇవాళ హైజంప్‌లో గోల్డ్‌మెడల్

Nishad Kumar | ఆసియా పారా గేమ్స్‌ 2026లో భారత పారా అథ్లెట్ నిషాద్ కుమార్ సత్తా చాటాడు. పురుషుల హైజంప్‌ T47 విభాగంలో 2.04 మీటర్ల ఎత్తు దూకి స్వర్ణ పతకాన్ని కైవసం చేసుకుని చరిత్ర సృష్టించాడు.

Nishad Kumar | ఆసియా పారా గేమ్స్‌ 2026లో భారత పారా అథ్లెట్ నిషాద్ కుమార్ సత్తా చాటాడు. పురుషుల హైజంప్‌ T47 విభాగంలో 2.04 మీటర్ల ఎత్తు దూకి స్వర్ణ పతకాన్ని కైవసం చేసుకుని చరిత్ర సృష్టించాడు. ఆయన దరిదాపుల్లో మరే అథ్లెట్ నిలవలేకపోయారు. ఇక నిన్న నిషద్ మెన్స్ లాంగ్ జంప్ T47లోనూ బంగారు పతకం సాధించారు దీంతో ఒకే ఏషియన్ గేమ్స్ ఎడిషన్‌లో రెండు గోల్డ్ మెడల్స్ సాధించిన మూడో భారత అథ్లెట్‌గా నిలిచాడు.

పలు విభాగాల్లో భారత అథ్లెట్ల పతకాల పంట

ఆసియా పారా గేమ్స్‌లో భారత క్రీడాకారులు పలు విభాగాల్లో స్వర్ణ, రజత, కాంస్య పతకాలను సాధించారు. పారా అథ్లెటిక్స్‌లో దీప్తి జీవాంజి మహిళల 400 మీటర్ల T20 విభాగంలో స్వర్ణం గెలిచింది. పురుషుల డిస్కస్ త్రో F51/F52/F53 విభాగంలో ప్రణవ్ సూర్మ స్వర్ణం సాధించగా, రామ్ రతన్ సింగ్ రజత పతకాన్ని అందుకున్నాడు. మహిళల 200 మీటర్ల T12 విభాగంలో సిమ్రన్ స్వర్ణం గెలవగా, తేజల్‌బెన్ దామోర్ కాంస్యం సాధించింది.

మహిళల 200 మీటర్ల T35 విభాగంలో ప్రీతి పాల్ రజత పతకం గెలుచుకుంది. పురుషుల జావెలిన్ త్రో F53/F54 విభాగంలో ప్రదీప్ కుమార్ రజతం, ఆయుష్ వర్మ కాంస్యం సాధించారు. పురుషుల షాట్‌పుట్ F11 విభాగంలో ప్రవీణ్ శర్మ కాంస్య పతకాన్ని గెలుచుకున్నాడు.

పురుషుల పారా పవర్‌లిఫ్టింగ్ 65 కిలోల లోపు విభాగంలో అశోక్ రజత పతకాన్ని సాధించాడు. పురుషుల 10 మీటర్ల ఎయిర్ పిస్టల్ SH1 విభాగంలో మనీష్ నర్వాల్ రజతం గెలవగా, మహిళల 10 మీటర్ల ఎయిర్ పిస్టల్ SH1 విభాగంలో సృష్టి అరోరా కాంస్య పతకాన్ని అందుకుంది.

పారా టేబుల్ టెన్నిస్‌లో సోనల్‌బెన్ పటేల్, భావినా పటేల్, ప్రాచీ పాండే, సహానా రవి, జెహాన్ మదన్ కాంస్య పతకాలను సాధించారు. పారా స్విమ్మింగ్‌లో పురుషుల 400 మీటర్ల ఫ్రీస్టైల్ S11 విభాగంలో హిమాన్షు నందల్, పురుషుల 200 మీటర్ల వ్యక్తిగత మెడ్లీ SM7 విభాగంలో నిరంజన్ ముకుందన్ కాంస్య పతకాలు గెలుచుకున్నారు.

భారత పారా బ్యాడ్మింటన్ క్రీడాకారులు నితేశ్ కుమార్, ప్రమోద్ భగత్, సంజన కుమారి తమ సింగిల్స్ క్వార్టర్ ఫైనల్ మ్యాచ్‌ల్లో విజయం సాధించి తదుపరి దశకు చేరుకున్నారు. పారా ఆర్చరీలో షీతల్ దేవి మహిళల వ్యక్తిగత కాంపౌండ్ విభాగంలో ఫైనల్‌కు చేరుకుంది. భారత జట్లు కూడా పలు విభాగాల్లో ఫైనల్స్‌కు చేరడం లేదా నాకౌట్ దశల్లో ముందుకు సాగడం ద్వారా సత్తా చాటాయి.

మొత్తంగా, అథ్లెటిక్స్ నుంచి స్విమ్మింగ్ వరకు పలు క్రీడాంశాల్లో భారత క్రీడాకారులు మెరుగైన ప్రదర్శన కనబరుస్తున్నారు. నిషాద్ కుమార్ సాధించిన స్వర్ణం, గేమ్స్ రికార్డు భారత పారా క్రీడా బృందానికి ప్రత్యేక ఆకర్షణగా నిలిచాయి.