ఆత్మన్యూనతతో బాధపడేవాళ్లకు స్ఫూర్తి!

‘ఈ సినిమా చూసినవాళ్లందరూ కేరాఫ్‌ కంచరపాలెం, పెళ్లిచూపులు చిత్రాలతో పోల్చుతున్నారు. భావోద్వేగభరితమైన కథ ఇది. ఆత్మన్యూనతతో బాధపడేవారికి స్ఫూర్తిగా ఉంటుంది’ అన్నారు వినయ్‌ రత్నం.

‘ఈ సినిమా చూసినవాళ్లందరూ కేరాఫ్‌ కంచరపాలెం, పెళ్లిచూపులు చిత్రాలతో పోల్చుతున్నారు. భావోద్వేగభరితమైన కథ ఇది. ఆత్మన్యూనతతో బాధపడేవారికి స్ఫూర్తిగా ఉంటుంది’ అన్నారు వినయ్‌ రత్నం. ఆయన దర్శకుడిగా పరిచయమవుతున్న చిత్రం ‘శ్రీ చిదంబరం’. వంశీ తుమ్మల, సంధ్యా వశిష్ట జంటగా నటించారు. ఈ నెల 6న ప్రేక్షకుల ముందుకురానుంది.

ఈ సందర్భంగా మంగళవారం దర్శకుడు వినయ్‌ రత్నం పాత్రికేయులతో మాట్లాడారు. మనల్ని మనం ప్రేమించుకున్నప్పుడే ఎదుటివారిని ప్రేమించగలం అనే కాన్సెప్ట్‌తో ఈ చిత్రాన్ని తెరకెక్కించామన్నారు. తనది రాజమండ్రి అని, దాదాపు 25 లఘు చిత్రాల్ని చేశానని తెలిపారు. మెల్లకన్ను ఉన్నవారిని తూర్పు గోదావరి జిల్లాల్లో చిదంబరం అని పిలుస్తుంటారని, ఈ సినిమాలో కూడా హీరోని అందరూ చిదంబరం అంటుంటారని, దీంతో ఆయన సొంతం పేరును కూడా మర్చిపోతారని చెప్పారు.

అభద్రతాభావంతో, ఆత్మన్యూనతతో బాధపడేవాళ్లందరికీ ఈ కథ స్ఫూర్తినిస్తుందని, బలహీనతల్ని ఎలా జయించాలనే అంశాన్ని బోధపరుస్తుందని పేర్కొన్నారు. 32రోజుల్లో ఆంధ్రప్రదేశ్‌లోని అందమైన లొకేషన్లలో సినిమా తీశామని, విజువల్స్‌ చూసిన వాళ్లు అది కేరళ మాదిరిగా ఉందని ప్రశంసిస్తున్నారని దర్శకుడు వినయ్‌ రత్నం చెప్పారు.