నా దృష్టిలో కింగ్డమ్‌ అంటే మన ఇల్లు

తొలి ప్రయత్నం ‘మళ్లీ రావా’తో ఆడియన్స్‌ని మళ్లీ మళ్లీ థియేటర్లకు రప్పించిన ఘనత దర్శకుడు గౌతమ్‌ తిన్ననూరిది. ‘జెర్సీ’తో ద్వితీయ విఘ్నాన్ని కూడా అధిగమించి, బాక్సాఫీస్‌ వసూళ్లతోపాటు విమర్శకుల ప్రశంసలు కూడా అందుకున్నారాయన. ఇదే కథతో బాలీవుడ్‌లోనూ విజయకేతనం ఎగరేశారు.

తొలి ప్రయత్నం ‘మళ్లీ రావా’తో ఆడియన్స్‌ని మళ్లీ మళ్లీ థియేటర్లకు రప్పించిన ఘనత దర్శకుడు గౌతమ్‌ తిన్ననూరిది. ‘జెర్సీ’తో ద్వితీయ విఘ్నాన్ని కూడా అధిగమించి, బాక్సాఫీస్‌ వసూళ్లతోపాటు విమర్శకుల ప్రశంసలు కూడా అందుకున్నారాయన. ఇదే కథతో బాలీవుడ్‌లోనూ విజయకేతనం ఎగరేశారు. ఇప్పుడు ముచ్చటగా మూడో కథతో, నాలుగో ప్రయత్నంగా ‘కింగ్డమ్‌’తో ప్రేక్షకుల ముందుకొచ్చిన ఈ యువదర్శకునికి ప్రేక్షకుల నుంచి ప్రశంసలు వెల్లువెత్తుతున్నాయి. విజయ్‌ దేవరకొండ హీరోగా సూర్యదేవర నాగవంశీ, సాయిసౌజన్య నిర్మించిన ఈ చిత్రం జూలై 31న విడుదలై విజయవంతంగా ప్రదర్శింపబడుతున్న నేపథ్యంలో సోమవారం హైదరాబాద్‌లో విలేకరులతో ముచ్చటించారు దర్శకుడు గౌతమ్‌ తిన్ననూరి.

• కథ రాసేటప్పుడు ముందు టైటిల్‌ అనుకుంటాం. ‘జెర్సీ’ కథకు ముందు అనుకున్న టైటిల్‌ ‘36’. తర్వాత దాన్ని ‘జెర్సీ’గా మార్చాల్సొచ్చింది. ‘కింగ్డమ్‌’కు ముందు అనుకున్న టైటిల్‌ ‘దేవర నాయక’. ఇందులో తెగ నాయకుడి పేరు అదే. అందుకే ఆ టైటిల్‌ అనుకున్నా. కానీ ఎన్టీఆర్‌ ‘దేవర’ రావడంతో ఆ టైటిల్‌ మార్చేసి ‘యుద్ధకాండ’ అనే టైటిల్‌ అనుకున్నాను. చివరకు ‘కింగ్డమ్‌’ ఖరారైంది. ఇది పాన్‌ ఇండియా సినిమా కాబట్టి అన్ని భాషలకూ కనెక్ట్‌ అయ్యేలా ఉంటుందని ‘కింగ్డమ్‌’నే ఫైనల్‌ చేశాం. నా దృష్టిలో ‘కింగ్డమ్‌’ అంటే మనవాళ్లంతా ఉండే ప్రాంతం. ఒక్కమాటలో చెప్పాలంటే మన ఇల్లు.
• ఈ సినిమాను జనరంజకంగా తీర్చిదిద్దే క్రమంలో కొన్ని త్యాగాలు కూడా చేయాల్సొచ్చింది. కథకు అడ్డంకి అనిపిస్తే బాగున్న వాటిని కూడా తొలిగించాల్సొస్తుంది. ఉదాహరణకు ‘హృదయం లోపల..’ సాంగ్‌ చాలా పాపులర్‌ అయ్యింది. కానీ కథకు అడ్డం అనిపించి ఆ పాటను తొలగించాం. ఓటీటీ వెర్షన్‌లో మాత్రం ఆ పాటతోపాటు కొన్ని సీన్స్‌ కూడా జోడించాలనే ఆలోచన ఉంది.
• ‘కింగ్డమ్‌’లో యాక్షన్‌ ఉన్నప్పటికీ దానిచుట్టూ బలమైన ఎమోషన్‌ ఉంటుంది. ఆ ఎమోషన్‌ కనెక్ట్‌ అయ్యింది కాబట్టే ఈ విజయం. విజయ్‌ దేవరకొండ ఈ కథను విపరీతంగా ప్రేమించేశారు. ఇష్టపడి నటించారు. ఈ కథ రాసేటప్పుడు ఇందులో విజయ్‌ అన్న పాత్రకు సత్యదేవ్‌నే అనుకున్నా. ఆయన్నే ఊహించి ఆ పాత్ర రాశా. షూటింగ్‌ మొదలవుతుందనగా, ఆయనే ఆ పాత్రకు సెట్‌ అయ్యారు. విజయ్‌, సత్యదేవ్‌ కాంబినేషన్‌ సీన్స్‌ ఆడియన్స్‌కి బాగా నచ్చేశాయి.
• ‘కింగ్డమ్‌ 2’కు మూల కథ సిద్ధంగా ఉంది. స్క్రిప్ట్‌ వర్క్‌ త్వరలో ప్రారంభిస్తాం. అయితే.. దానికంటే ముందు మురుగన్‌, సేతు పాత్రల నేపథ్యంలో ఓటీటీ కోసం ఓ వెబ్‌ ఫిల్మ్‌ చేయాలనుకుంటున్నాం.