Ramoji Rao | విలువలే వెండితెర ఉషాకిరణాలు

అక్షర యోధుడు అనంతలోకాలకు చేరాడు. ఉషాకిరణాలను వెండితెరపై ప్రసరింపజేసిన కళాభానుడు అస్తమించాడు.. వేలాదిమందిలో స్ఫూర్తిని నింపిన సృజనమూర్తి పవిత్రాత్మగా మారాడు..

అక్షర యోధుడు అనంతలోకాలకు చేరాడు. ఉషాకిరణాలను వెండితెరపై ప్రసరింపజేసిన కళాభానుడు అస్తమించాడు.. వేలాదిమందిలో స్ఫూర్తిని నింపిన సృజనమూర్తి పవిత్రాత్మగా మారాడు.. రొడ్డకొట్టుడు విధానాలను సంస్కరించి, అడుగుపెట్టిన అన్నిరంగాల్లో విప్లవాత్మక మార్పులకు నాంది పలికి.. ప్రత్యక్షంగా, పరోక్షంగా లక్షలాదిమందికి ఉపాధినిచ్చిన దార్శనికుడు.. పత్రికాధిపతి.. వ్యాపారదిగ్గజం, సినీ నిర్మాత, రామోజీ ఫిల్మ్‌సిటీ అధినేత, పంపిణీదారుడు, పద్మవిభూషణుడు.. చెరుకూరి రామోజీరావు మహాభినిష్క్రమణం చెందారు.

Ramoji Rao | సినిమాలంటే రామోజీరావుకి ప్రత్యేకమైన అభిమానం. ఆ ఇష్టంతోనే ఉషాకిరణ్‌మూవీస్‌ని స్థాపించారాయన. తొలి ప్రయత్నంగా ‘శ్రీవారికి ప్రేమలేఖ’(1984) తీశారు. నరేశ్‌, పూర్ణిమ జంటగా జంధ్యాల దర్శకత్వంలో రూపొందిన ఈ చిత్రం.. తెలుగునాట నవ్వుల వర్షం, రామోజీరావుకు కాసుల వర్షం కురిపించింది. అదే ఏడాది ఆయన ప్రొడక్షన్‌ నుంచి వచ్చిన మరో అద్భుతం ‘మయూరి’. నృత్యకళాకారిణి సుధాచంద్రన్‌ జీవితానికి తెరరూపాన్నిస్తూ సింగీతం శ్రీనివాసరావు దర్శకత్వంలో రూపొందిన ఈ సినిమా అందుకోని గౌరవం లేదు. ఇక అక్కడ్నుంచి నిర్మాతగా వెనుదిరిగి చూసుకోలేదు రామోజీరావు. అలాగే విలువలను కూడా వదులుకోలేదు. ఉషాకిరణ్‌ మూవీస్‌ సంస్థ నుంచి సినిమా వస్తుందంటే.. అది కచ్చితంగా గొప్ప సినిమానే అయ్యుంటుందనే అభిప్రాయం ప్రేక్షకుల్లో కలిగేలా అద్భుతమైన సినిమాలను నిర్మించారు రామోజీరావు. ఆ కోవకు చెందిన సినిమానే టి.కృష్ణ ‘ప్రతిఘటన’(1985). రౌడీ రాజకీయాలపై ఓ ఉపాధ్యాయురాలు చేసిన పోరాటమే ప్రధాన ఇతివృత్తంగా రూపొందిన ఆ సినిమా ఆ రోజుల్లో పెను సంచలనం. దర్శకుడిగా టి.కృష్ణనీ, హీరోయిన్‌గా విజయశాంతిని అగ్రపథాన నిలబెట్టిందీ సినిమా. ఆ ఏడాది అవార్డులపరంగా, రివార్డుల పరంగా తిరుగులేని సినిమాగా నిలిచింది. అంతేకాక, తమిళం, హిందీ భాషల్లో కూడా విడుదలై విజయాలను అందుకున్నది.

ఉషాకిరణ్‌లో మెరిసిన తారలు

• రామోజీ పరిచయం చేసిన సినీ దిగ్గజాలు కేరక్టర్‌ నటుడిగా ఉన్న రాజేంద్రప్రసాద్‌ ‘ప్రేమించు పెళ్లాడు’తో హీరోగా మారారు. ‘ప్రతిఘటన’తో చరణ్‌రాజ్‌, కోటశ్రీనివాసరావు బిజీ విలన్లుగా అవతరించారు. ‘మౌనపోరాటం’తో వినోద్‌కుమార్‌, యమున హీరోహీరోయిన్లుగా పరిచయం అయ్యారు. నటుడు శ్రీకాంత్‌ తొలి సినిమా ‘పీపుల్స్‌ ఎన్‌కౌంటర్‌’. సంగీత దర్శకుడిగా ఎం.ఎం.కీరవాణికీ.. బాలనటులుగా తరుణ్‌, సునయనల తొలి సినిమా ‘మనసు-మమత’. దర్శకుడిగా తేజ తొలి సినిమా ‘చిత్రం’. ఈ సినిమాతోనే ఉదయ్‌కిరణ్‌, రీమాసేన్‌ హీరోహీరోయిన్లు పరిచయం అయ్యారు. ‘నిన్ను చూడాలని’ సినిమాతో జూనియర్‌ ఎన్టీయార్‌ హీరోగా తెరంగేట్రం చేయగా, ‘తొలిచూపులోనే’ సినిమాతో నందమూరి కల్యాణ్‌రామ్‌ హీరోగా తెరకు పరిచయం అయ్యారు. ‘నచ్చావులే’ సినిమాతో తనీష్‌, మాధవీలత హీరోహీరోయిన్లుగా మారారు. ఇవన్నీ రామోజీరావు నిర్మించిన సినిమాలే. శ్రియ, జెనిలియా సైతం ఉషాకిరణ్‌ ద్వారా పరిచయమైన తారలే.

రామోజీ అందుకున్న అవార్డులు

• నిర్మాతగా రామోజీ అందుకున్న అవార్డులు 1985 అంతర్జాతీయ చలనచిత్రోత్సవాలతోపాటు 2014లో జరిగిన అంతర్జాతీయ చిత్రోత్సవాల్లో కూడా రామోజీరావు నిర్మించిన ‘మయూరి’ సినిమా ప్రదర్శించబడటం విశేషం. ఏకంగా 14 నంది అవార్డులు గెలుచుకున్న ఏకైక సినిమాగా చెరగని రికార్డును సొంతం చేసుకుంది ‘మయూరి’. ఈ చిత్రానికి జాతీయ అవార్డు కూడా దక్కింది. టి.కృష్ణ ‘ప్రతిఘటన’ సినిమా ఆరు నంది అవార్డులు, రెండు ఫిల్మ్‌ఫేర్‌ అవార్డులను గెలుకుంది.
• ఇక మౌళీ దర్శకత్వంలో రూపొందిన ‘అశ్వని’ సినిమా అయితే.. గోవా ఫిల్మ్‌ ఫెస్టివల్‌లో ప్రదర్శించబడటమేకాక, 1991వ సంవత్సరానికి గాను ఉత్తమ తృతీయ చిత్రంగా నంది అవార్డును కూడా గెలుగుచుకుంది.
• వీటితోపాటు కాంచనగంగ, మనసు-మమత ఈ చిత్రాలు కూడా అవార్డులు రివార్డులు పొందిన సినిమాలే.

సినిమా జర్నలిజానికి ఊతం

సినిమాపై ఇష్టంతో తన సొంత పత్రిక ఈనాడులో ప్రత్యేకంగా సినిమాకు ఓ పేజీని కేటాయించారు రామోజీరావు. ఈ పద్దతిని తర్వాత అన్ని పత్రికలూ అవలంబించాయి. ‘సితార’ పేరుతో రామోజీరావు సినీ పత్రిక వార పత్రికను నడిపారు.

రామోజీ సినిమా వ్యాపారం

పంపిణీదారుడిగా, ఎగ్జిబిటర్‌గా కూడా తనదైన ముద్ర వేశారు రామోజీ. ఇక రామోజీ ఫిల్మ్‌సిటీ గురించి ఎంత చెప్పుకున్నా తక్కవే. ఇది దేశానికే కాదు, ఆసియా ఖండానికే గర్వకారణం. ఇలా సినీరంగానికి రామోజీరావు చేసిన సేవ సామాన్యమైనది కాదు. రామోజీరావు మరణం సినీరంగానికి నిజంగా తీరని లోటు.

బయోపిక్స్‌తో సంచలనం

• తెలుగు చిత్రసీమలో ఎక్కువ బయోపిక్‌లు నిర్మించిన నిర్మాత రామోజీరావు. ఆయన ప్రొడక్షన్‌ నుంచి మూడు బయోపిక్‌లు వచ్చాయి. అవే మయూరి, మౌనపోరాటం, అశ్వని. వీటిల్లో మమూరి, అశ్వని చిత్రాలకు ఓ ప్రత్యేకత ఉంది.
• చేయించడం ఓ విశేషమైతే.. పరుగులరాణి అశ్వనినాచప్ప జీవిత కథకు తెరరూపంగా ‘అశ్వని’ చిత్రాన్ని నిర్మించి, ఇందులో అశ్వని నాచప్ప పాత్రను అశ్వనినాచప్ప చేతే నటింపజేయడం మరో విశేషం. ఎవరి కథలకైతే తెరరూపాన్నిస్తున్నారో, వారినే కథానాయికలుగా పెట్టి సినిమాలు తీసిన నిర్మాతగా చరిత్ర సృష్టించారు రామోజీరావు. ఇది ఆయనకు మాత్రమే దక్కిన రికార్డ్‌.
• మౌళి దర్శకత్వంలో వచ్చిన ‘అశ్వని’(1991) సినిమా పిల్లల్లో క్రీడలపట్ల అసక్తిని రెట్టింపు చేసింది. వాణిజ్యపరంగా కూడా అమోఘ విజయాన్ని అందుకుంది.
• రామోజీరావు నిర్మించిన మరో బయోపిక్‌ ‘మౌనపోరాటం’(1989). నమ్మించి మోసగించి, గర్భవతిని చేసి వదిలేసిన ఓ కామాంధుడిపై ఓ ఆదివాసీ మహిళ చేసిన న్యాయపోరాటమే ఈ ‘మౌనపోరాటం’. సబిత అనే ఓ అదివాసీ మహిళ జీవితం ఆధారంగా రూపొందిన ఈ చిత్రానికి స్త్రీలు బ్రహ్మరథం పట్టారు.

ఇంకొన్ని విజయాలు..

• ఉషాకిరణ్‌ మూవీస్‌ నుంచి వచ్చిన మరో అద్భుతం ‘చిత్రం’(2000). అందరూ కొత్తవాళ్లతో అతి తక్కువ బడ్జెట్‌తో రామోజీరావు నిర్మించిన ఈ సినిమా వాణిజ్యపరంగా భారీ విజయాన్ని అందుకున్నది.
• ఇవిగాక, కాంచనగంగ, కారు దిద్దిన కాపురం, ఓ భార్యకథ, పైలాపచ్చీస్‌, అమ్మ, డాడీ డాడీ, ఆనందం, నచ్చావులే.. ఎన్నో ప్రజాదరణ పొందిన చిత్రాలను నిర్మించి, అగ్ర నిర్మాతగా తనదైన ముద్ర వేశారు రామోజీరావు. నిర్మాతగా దాదాపుగా 89 సినిమాలు నిర్మించిన ఘనత
  రామోజీరావుది.

నేడు సినిమా షూటింగ్స్‌ బంద్‌

రామోజీ గ్రూపు సంస్థల ఛైర్మన్‌ రామోజీరావు మృతికి సంతాప సూచకంగా ఆదివారం సినిమా షూటింగ్స్‌ బంద్‌ చేయబోతున్నట్లు తెలుగు చలనచిత్ర నిర్మాతల మండలి ఓ ప్రకటనలో పేర్కొంది. మరోవైపు శనివారం ఫిల్మ్‌సిటీలో రామోజీరావు పార్థివ దేహానికి మోహన్‌బాబు, రాఘవేంద్రరావు, శ్యామ్‌ప్రసాద్‌ రెడ్డి, నరేష్‌, కల్యాణ్‌రామ్‌తో పాటు పలువురు సినీ ప్రముఖులు నివాళులర్పించారు.

రామోజీగ్రూపు సంస్థల ఛైర్మన్‌ రామోజీరావు పార్థివ దేహానికి నివాళులర్పిస్తున్న అగ్ర హీరోలు చిరంజీవి, పవన్‌కల్యాణ్‌, నాగార్జున, దర్శకుడు రాజమౌళి, సంగీత దర్శకుడు కీరవాణి.

 

రామోజీరావుగారు ప్రింట్‌ మరియు ఎలక్ట్రానిక్‌ మీడియాలో విప్లవాత్మకమైన మార్పులు తీసుకొచ్చారు. వినోదభరితమైన కార్యక్రమాలకు మార్గదర్శిలా నిలిచారు. ఆయన నిర్మాతగా, డిస్ట్రిబ్యూటర్‌గా, ఎగ్జిబిటర్‌గా మరియు స్టూడియో యజమానిగా పరిశ్రమకు విశేషమైన సేవలందించారు. ఎందరో నటీనటులు, దర్శకులు, సంగీత దర్శకులను పరిశ్రమకు పరిచయం చేశారు. తెలుగువారందరూ ఆయన సేవలను చిరస్థాయిగా గుర్తుంచుకుంటారు.

-తెలుగు చలన చిత్ర నిర్మాతల మండలి

భారతీయ చలన చిత్ర పరిశ్రమ, మీడియా, వినోదరంగాలకు ఆయన చేసిన కృషి ఎప్పటికీ గుర్తుండిపోతుంది. ఆయన ఆత్మకు శాంతి చేకూరాలని భగవంతుడిని ప్రార్థిస్తూ కుటుంబ సభ్యులకు సానుభూతి తెలియజేస్తున్నాం.

-తెలంగాణ రాష్ట్ర ఫిలిం ఛాంబర్‌