కొత్తగా ప్రయత్నించాలనే కసి పెరిగింది!

‘నేను ఇప్పటివరకు మాస్‌, కమర్షియల్‌ సినిమాలే చేశాను. కానీ స్వతహాగా నాకు డిఫరెంట్‌ కాన్సెప్ట్‌ మూవీస్‌ అంటే ఇష్టం. హారర్‌తో పాటు మిస్టరీ కలబోసిన సినిమా ఇది. హారర్‌ మూవీలో ఈ స్థాయి కథ కుదరడం అరుదైన విషయం’ అన్నారు బెల్లంకొండ సాయిశ్రీనివాస్‌.

‘నేను ఇప్పటివరకు మాస్‌, కమర్షియల్‌ సినిమాలే చేశాను. కానీ స్వతహాగా నాకు డిఫరెంట్‌ కాన్సెప్ట్‌ మూవీస్‌ అంటే ఇష్టం. హారర్‌తో పాటు మిస్టరీ కలబోసిన సినిమా ఇది. హారర్‌ మూవీలో ఈ స్థాయి కథ కుదరడం అరుదైన విషయం’ అన్నారు బెల్లంకొండ సాయిశ్రీనివాస్‌. ఆయన కథానాయకుడిగా కౌశిక్‌ పెగల్లపాటి దర్శకత్వంలో రూపొందిన ‘కిష్కింధపురి’ చిత్రం ఈ నెల 12న ప్రేక్షకుల ముందుకురానుంది. ఈ సందర్భంగా బుధవారం బెల్లంకొండ సాయిశ్రీనివాస్‌ పాత్రికేయులతో ముచ్చటిస్తూ పంచుకున్న విశేషాలు..

• హారర్‌ జోనర్‌లో ‘కిష్కింధపురి’ ఓ విభిన్నమైన కథ. ఇందులోని మిస్టరీ అంశాలు ప్రేక్షకుల్ని ఉత్కంఠకు గురిచేస్తాయి. ప్రేక్షకులకు సీట్‌ ఎడ్జ్‌ థ్రిల్లర్‌ ఎక్స్‌పీరియన్స్‌ను అందిస్తుంది. ఇంత సీరియస్‌ హారర్‌ సినిమా చూసి చాలా రోజులైందని సెన్సార్‌ వారు ప్రశంసించారు.
• ఇటీవల మా యూనిట్‌ అంతా సినిమా చూశాం. నిజంగా అదిరిపోయింది. సలార్‌, యానిమల్‌, కాంతార చిత్రాలకు పనిచేసిన సౌండ్‌ డిజైనర్‌ రాధాకృష్ణ సౌండ్‌ ఎఫెక్ట్స్‌ని అద్భుతంగా డిజైన్‌ చేశారు. సాంకేతికంగా ప్రతీ అంశంలో ఈ సినిమా ఉన్నత విలువలతో ఉంటుంది. గ్రాఫిక్స్‌ అబ్బురపరుస్తాయి.
• ఈ సినిమా కోసం సువర్ణమాయ అనే ఓ హాంటింగ్‌ రేడియో స్టేషన్‌ సెట్‌ని వేశాం. అలాగే ఓ రియల్‌ హాంటెడ్‌ హౌజ్‌గా పేరున్న ఓ పాడుబడ్డ భవంతిలో చిత్రీకరణ జరిపాం. అక్కడ షూటింగ్‌ చేస్తున్నప్పుడు మా యూనిట్‌కు కొన్నిసార్లు విచిత్రమైన అనుభవాలు ఎదురయ్యాయి.
• సినిమాల ఎంపికలో కంటెంట్‌కే తొలిప్రాధాన్యతనిస్తా. ఏదైనా కొత్తగా ప్రయత్నించాలి..నటుడిగా ఇంకా ప్రూవ్‌ చేసుకోవాలనే కసి పెరిగింది. ఒక కొత్త పాత్ర చేస్తున్నప్పుడు సెట్‌లో ఆ ఎనర్జీని ఫీలవుతాం. ఇటీవలకాలంలో నేను అంగీకరించిన సినిమాలన్నీ వైవిధ్యమే కథలతో కూడుకున్నవే.
• నా తదుపరి సినిమా విషయాలకొస్తే..‘టైసన్‌ నాయుడు’ షూటింగ్‌ అయిపోయింది. ప్రస్తుతం పోస్ట్‌ప్రొడక్షన్‌ వర్క్‌ జరుగుతున్నది. ‘హైందవ’ షూటింగ్‌ చివరి దశకు వచ్చింది. ఇవి రెండు కూడా డిఫరెంట్‌ కాన్సెప్ట్స్‌. అలాగే ‘పొలిమేర’ దర్శకుడు అనిల్‌తో కూడా ఓ సినిమాకు ఓకే చేశాను. అది న్యూ ఏజ్‌ థ్రిల్లర్‌.