రాష్ట్రంలో ఈవీల జోరు

• కొత్త పాలసీతో పెరిగిన పెట్టుబడులు
• వేలల్లో ఉద్యోగ, ఉపాధి అవకాశాలు
• కలిసొస్తున్న స్నేహపూర్వక విధానాలు
• ఆకట్టుకుంటున్న మౌలిక వసతులు

హైదరాబాద్‌, సెప్టెంబర్‌ 5 (నమస్తే తెలంగాణ): రాష్ట్రంలో ఎలక్ట్రిక్‌ వాహన (ఈవీ) రంగం జోరందుకున్నది. తెలంగాణ ప్రభుత్వం ప్రకటించిన ఎలక్ట్రిక్‌ వాహనాల పాలసీతో కంపెనీలు పెట్టుబడులు పెట్టేందుకు క్యూ కడుతున్నాయి. గత ఆర్థిక సంవత్సరం (2021-22) ఐదు ప్రముఖ కంపెనీలు రూ.5,147 కోట్ల పెట్టుబడులతో పరిశ్రమలు స్థాపించేందుకు రాష్ట్ర ప్రభుత్వంతో ఒప్పందాలు చేసుకోవడమే ఇందుకు నిదర్శనం.

సెంచరీ దాటిన పెట్రోల్‌ ధరలు, పర్యావరణ ఆందోళనల మధ్య ఈవీలకు గిరాకీ పెరుగుతున్నది. దీన్ని దృష్టిలో ఉంచుకొని భవిష్యత్తు అవసరాలకు తగ్గట్టుగా, ఎలక్ట్రిక్‌ వాహనాల తయారీకి తెలంగాణను కేంద్రంగా తీర్చిదిద్దాలనే సంకల్పంతో రాష్ట్ర ప్రభుత్వం గత ఏడాది ఈవీ పాలసీని ప్రవేశపెట్టింది. రాష్ట్రవ్యాప్తంగా చార్జింగ్‌ కేంద్రాలు, బ్యాటరీ స్టేషన్లూ ఏర్పాటవుతున్నాయి. టీఎస్‌ రెడ్కో ఆధ్వర్యంలో ఇప్పటికే 110 చార్జింగ్‌ కేంద్రాలను ఏర్పాటు చేయగా, పెరుగుతున్న అవసరాలకు తగ్గట్టు వీటి నెట్‌వర్క్‌ను మరింత పెంచేందుకు ప్రణాళికాబద్ధంగా ముందుకు సాగుతున్నారు.

రాయితీలు

ఈవీ పాలసీలో భాగంగా రాష్ట్ర ప్రభుత్వం తెచ్చిన భారీ రాయితీలు కలిసొస్తున్నాయి. ఈవీల కొనుగోళ్లు పెరుగుతున్న నేపథ్యంలో వాహన తయారీ సంస్థలు కూడా తమ పరిశ్రమల స్థాపనకు తెలంగాణను ఎంచుకొంటున్నాయి. రాష్ట్రంలోని పారిశ్రామిక అనుకూల విధానాలకుతోడు స్నేహపూర్వక వాతావరణం సైతం తెలంగాణను ఈవీ-హబ్‌గా మారుస్తున్నాయిప్పుడు. గత ఆర్థిక సంవత్సరం రూ.5 వేల కోట్లకుపైగా పెట్టుబడులు రాగా, తద్వారా 20 వేలకుపైగా ఉద్యోగావకాశాలు లభించనున్నాయి. తెలంగాణలో ఈవీ రంగాన్ని అభివృద్ధి చేసేందుకు రాష్ట్ర పరిశ్రమల శాఖ మంత్రి కే తారక రామారావు ప్రత్యేక శ్రద్ధతో అమెరికా, దావోస్‌ పర్యటనల్లో వివిధ అంతర్జాతీయ కంపెనీలతో సమావేశమైనది తెలిసిందే. ఈ సందర్భంగా భారత్‌లో ఈవీలకున్న మార్కెట్‌ను, రాష్ట్ర ప్రభుత్వం కల్పిస్తున్న రాయితీలను వివరించారు. దీంతో ఆయా సంస్థలు రాష్ట్రంలో పరిశ్రమల ఏర్పాటుకు ఆసక్తి చూపాయి.

భౌగోళిక అనుకూలతలు

తెలంగాణ భౌగోళికంగా భారత్‌కు మధ్యలో ఉండటం పరిశ్రమలకు కలిసొచ్చే అంశంగా చెప్పవచ్చు. ఇటు దక్షిణాది రాష్ర్టాలు, అటు ఉత్తరాది రాష్ర్టాలకు తేలిగ్గా ఎగుమతి చేసేందుకు వీలవుతుంది. అంతేకాదు రాష్ట్రంలో సరిపడా ల్యాండ్‌ బ్యాంక్‌ ఉండటం, ప్రభుత్వం నుంచి పూర్తి సహాయ,సహకారాలు లభించడం కంపెనీలకు ప్రయోజనకరంగా మారింది. ఈజ్‌ ఆఫ్‌ డూయింగ్‌ బిజినెస్‌లో భాగంగా త్వరితగతిన, అత్యంత సులభంగా అనుమతులు మంజూరు చేయడం కూడా పరిశ్రమలను రాష్ట్రం వైపు మొగ్గు చూపేలా చేస్తున్నాయి.

2021-22లో రాష్ట్రానికి వచ్చిన ఈవీ కంపెనీలు

• అమెరికాకు చెందిన ట్రైటాన్‌ ఎలక్ట్రిక్‌ రూ.2,100 కోట్లతో విద్యుత్తు ఆధారిత వాహన తయారీ యూనిట్‌ను రాష్ట్రం లో నెలకొల్పేందుకు ప్రభుత్వంతో ఒప్పందం చేసుకున్నది. జహీరాబాద్‌లోని నిమ్జ్‌లో ఏర్పాటు చేయనున్న ఈ యూనిట్‌తో 2,000 మందికి ఉద్యోగాలు లభించనున్నాయి. ఇక్కడ ఎలక్ట్రిక్‌ సెడాన్‌లు, ట్రక్కులు, ఎస్‌యూవీలు తయారు చేయనున్నారు.
• మెగ్నీషియం ఉత్పత్తుల్లో ప్రఖ్యాతిగాంచిన జర్మనీకి చెందిన లిటౌటో జీఎంబీహెచ్‌ రూ.1,500 కోట్ల పెట్టుబడితో అధునాతన డిజైన్‌, తయారీ యూనిట్‌ను నెలకొల్పేందుకు ప్రభుత్వంతో ఒప్పందం చేసుకున్నది. ఈ ప్లాంట్‌లో సుమారు 9,000 మందికి ప్రత్యక్షంగా, ఇంతకు రెట్టింపు స్థాయిలో పరోక్షంగా ఉద్యోగ, ఉపాధి అవకాశాలు లభించనున్నాయి.
• హైదరాబాద్‌కు చెందిన గ్రావ్టన్‌ మోటర్స్‌ క్వాంటా బ్రాండ్‌తో ఎలక్ట్రిక్‌ బైక్‌ను తయారు చేసింది. ఈ సంస్థ ఈ ఏడాది చివరికల్లా రూ.150 కోట్లతో గ్రీన్‌ఫీల్డ్‌ యూనిట్‌ను ఏర్పాటు చేసేందుకు ముం దుకొచ్చింది. వచ్చే రెండేండ్లలో 3,000 వరకూ ప్రత్యక్షంగా, పరోక్షంగా ఉద్యోగాలు కల్పిస్తామని కంపెనీ ప్రకటించింది.
• ఎలక్ట్రిక్‌ ద్విచక్ర వాహనాల తయారీ సంస్థ వన్‌ మోటో.. దేశంలో తమ మొదటి ఉత్పత్తి ప్లాంట్‌ను రూ.250 కోట్ల పెట్టుబడితో నెలకొల్పేందుకు సిద్ధమైంది. ఈ క్రమంలోనే రాష్ట్ర ప్రభుత్వంతో ఒప్పందం చేసుకున్నది. ఇందులో 500 మందికి ప్రత్యక్షంగా, 2,000 మందికి పరోక్షంగా ఉద్యోగ, ఉపాధి అవకాశాలు దక్కనున్నాయి.
• ఆటోలు, త్రిచక్ర వాహన తయారీలో దిగ్గజ సంస్థ కాలిఫోర్నియాకు చెందిన బిలిటీ ఎలక్ట్రిక్‌.. హైదరాబాద్‌కు చెందిన గాయమ్‌ మోటర్‌ వర్క్స్‌ (జీఎండబ్ల్యూ) జట్టు కట్టింది. ఈ భాగస్వామ్యంలో ప్రపంచంలోనే అతిపెద్ద ఈవీ తయారీ యూనిట్‌ను స్థాపించేందుకు ముందుకొచ్చింది. రూ.1,147 కోట్ల పెట్టుబడితో, ఏటా 2.4 లక్షల వాహన తయారీ సామర్థ్యం గల ప్లాంట్‌ను తేనున్నారు. ఇందులో 3,000 మందికి ఉద్యోగావకాశాలు లభించనున్నాయి.