టీసీఎస్‌ లాభం 12,040 కోట్లు

దేశీయ ఐటీ దిగ్గజం టాటా కన్సల్టెన్సీ సర్వీసెస్‌(టీసీఎస్‌) అంచనాలకుమించి రాణించింది.

• తొలి త్రైమాసికంలో 9 శాతం వృద్ధి
• రూ.10 మధ్యంతర డివిడెండ్‌ ప్రకటన

ముంబై, జూలై 11: దేశీయ ఐటీ దిగ్గజం టాటా కన్సల్టెన్సీ సర్వీసెస్‌(టీసీఎస్‌) అంచనాలకుమించి రాణించింది. ప్రస్తుత ఆర్థిక సంవత్సరం తొలి త్రైమాసికానికిగాను రూ.12,040 కోట్ల కన్సాలిడేటెడ్‌ నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.11,074 కోట్ల కంటే ఇది 8.7 శాతం అధికం.

అలాగే మార్చి త్రైమాసికంలో నమోదైన లాభంతో పోలిస్తే 3.1 శాతం తగ్గింది. ఆదాయం మాత్రం ఏడాది ప్రాతిపదికన 5.4 శాతం ఎగబాకి రూ.62,613 కోట్లకు చేరుకున్నది. గడిచిన త్రైమాసికంలో ఉద్యోగుల వేతనాలు పెంచడంతో కంపెనీ ఆర్థిక వనరులపై ప్రభావం చూపిందని సీఎఫ్‌వో సమీర్‌ తెలిపారు.

• భారత్‌తోపాటు అభివృద్ధి చెందుతున్న మార్కెట్లు రెండంకెల వృద్ధి నమోదైంది.
• సంస్థకు వచ్చిన ఆదాయంలో తయారీ రంగం 9.4 శాతం వృద్ధిని కనబరచగా, ఎనర్జీ-యుటిలిటీ 5.7 శాతం, లైఫ్‌ లైన్సె, హెల్త్‌కేర్‌ 4 శాతం వృద్ధిని నమోదు చేసుకున్నాయి.
• గత త్రైమాసికంలో కొత్తగా 5,452 మంది ఉద్యోగులు చేరడంతో మొత్తం సంఖ్య 6,06,998కి చేరుకున్నారు. వీరిలో 35.5 శాతం మహిళా ఉద్యోగులు కావడం విశేషం.
• సంస్థలో ప్రస్తుతం ఉద్యోగుల వలసలు రేషియో 12.1 శాతంగా ఉన్నది.
• రూపాయి ముఖ విలువ కలిగిన ప్రతిషేరుకు రూ.10 మధ్యంతర డివిడెండ్‌ను సంస్థ ప్రకటించింది.
• ప్రస్తుతం కంపెనీ వద్ద రూ.11,168 కోట్ల విలువైన నగదు నిల్వలు ఉన్నాయి.
• 2023-24 ఆర్థిక సంవత్సరంలో ఉద్యోగులు 13,249 మంది తగ్గారు. గడిచిన 19 ఏండ్లలో ఇలా తగ్గడం ఇదే తొలిసారి కావడం విశేషం.