IT Returns | ఆరోగ్య బీమా ప్రీమియంలపై ట్యాక్స్‌ రిబేటు.. ట్యాక్స్‌పేయర్స్‌ ఈ సదుపాయాన్ని ఉపయోగించుకోండి!

ఆరోగ్య బీమా ఉంటే.. అత్యవసర సమయాల్లో దవాఖాన ఖర్చులు, వైద్య చికిత్స వ్యయాల నుంచి గొప్ప రక్షణను పొందవచ్చు. అయితే ఈ బీమా ఖరీదెక్కడంతో చాలామందికి ప్రీమియంలు భారంగా మారుతున్నాయి. దీంతో సమగ్ర ఆరోగ్య బీమా అందరికీ దక్కని పరిస్థితులు నెలకొంటున్నాయి.

IT Returns | ఆరోగ్య బీమా ఉంటే.. అత్యవసర సమయాల్లో దవాఖాన ఖర్చులు, వైద్య చికిత్స వ్యయాల నుంచి గొప్ప రక్షణను పొందవచ్చు. అయితే ఈ బీమా ఖరీదెక్కడంతో చాలామందికి ప్రీమియంలు భారంగా మారుతున్నాయి. దీంతో సమగ్ర ఆరోగ్య బీమా అందరికీ దక్కని పరిస్థితులు నెలకొంటున్నాయి. దీన్ని అధిగమించేలా ఆరోగ్య బీమా ప్రీమియంలపై పన్ను మినహాయింపులను కల్పించారు.

ఆదాయ పన్ను (ఐటీ) చట్టం (1961)లోని సెక్షన్‌ 80డీ కింద పాలసీదారులు ప్రతీ ఆర్థిక సంవత్సరంలో తమ ఆరోగ్య బీమాకు చెల్లించే ప్రీమియంలపై ట్యాక్స్‌ రిబేటును కోరవచ్చు. ఐటీ రిటర్నులు దాఖలు చేసేటప్పుడు ఈ సదుపాయాన్ని ట్యాక్స్‌పేయర్స్‌ ఉపయోగించుకోవచ్చు.

• పాలసీదారులు అందరూ 60 ఏండ్లలోపుంటే వ్యక్తిగత, కుటుంబ బీమా ప్రీమియంలపై ట్యాక్స్‌పేయర్లు ఏటా రూ.25వేలదాకా పన్ను మినహాయింపును అందుకోవచ్చు.
• తల్లిదండ్రుల వయసు 60 ఏండ్లలోపే ఉంటే వారి కోసం ట్యాక్స్‌పేయర్‌ తీసుకునే బీమాపై మరో రూ.25వేలదాకా పన్ను ప్రయోజనం పొందవచ్చు. 60 ఏండ్లు దాటితే ట్యాక్స్‌ రిబేటు రూ.50వేలదాకా వస్తుంది.
• పాలసీదారులు అందరూ 60 ఏండ్లపైనే ఉంటే లక్ష రూపాయలదాకా పన్ను మినహాయింపు కోరవచ్చు.
• వ్యక్తులు, హిందూ అవిభాజ్య కుటుంబాలకే సెక్షన్‌ 80డీ కింద ఈ ప్రయోజనాలుంటాయి. కంపెనీలిచ్చే గ్రూప్‌ ఇన్సూరెన్స్‌లకు వర్తించవు.
• హిందూ అవిభాజ్య కుటుంబాల్లో పాలసీదారులు అందరూ 60 ఏండ్లలోపే ఉంటే రూ.25,000, ఒక్కరి వయసు 60 ఏండ్లు దాటినా రూ.50,000 పన్ను ప్రయోజనం దక్కుతుంది.
• నగదు రూపంలో ఆరోగ్య బీమా ప్రీమియంలు చెల్లిస్తే పన్ను మినహాయింపులను కోరలేము.