Stock markets | ఆవిరైపోతున్న లక్షల కోట్లు.. 79 వేల దిగువకు సెన్సెక్స్‌..భారీగా నష్టపోయిన స్టాక్‌ మార్కెట్లు

దేశీయ స్టాక్‌ మార్కెట్లు నష్టాల పరంపరలో కొనసాగుతున్నాయి. పశ్చిమాసియాలోని యుద్ధ ప్రకంపనాలు మార్కెట్లో అలజడిని సృష్టిస్తున్నాయి. ఇరాన్‌పై అమెరికా-ఇజ్రాయిల్‌ దేశాలు సంయుక్తంగా దాడులు మరింత తీవ్రతరం చేయడంతో సూచీలు వరుసగా మూడోరోజు భారీగా పతనం చెందాయి.

• భారీగా నష్టపోయిన స్టాక్‌ మార్కెట్లు

ముంబై, మార్చి 4 : దేశీయ స్టాక్‌ మార్కెట్లు నష్టాల పరంపరలో కొనసాగుతున్నాయి. పశ్చిమాసియాలోని యుద్ధ ప్రకంపనాలు మార్కెట్లో అలజడిని సృష్టిస్తున్నాయి. ఇరాన్‌పై అమెరికా-ఇజ్రాయిల్‌ దేశాలు సంయుక్తంగా దాడులు మరింత తీవ్రతరం చేయడంతో సూచీలు వరుసగా మూడోరోజు భారీగా పతనం చెందాయి. మరోవైపు అంతర్జాతీయ మార్కెట్లో క్రూడాయిల్‌ ధరలు భగ్గుమనడం కూడా పతనానికి ఆజ్యంపోశాయి. నష్టాల్లో ప్రారంభమైన సూచీలు చివరి వరకు అదే ట్రెండ్‌ను కొనసాగించాయి. ఇంట్రాడేలో 1,795 పాయింట్లు లేదా 2.23 శాతం నష్టపోయి 78,443 పాయింట్లకు జారుకున్న 30 షేర్ల ఇండెక్స్‌ సూచీ సెన్సెక్స్‌ చివరికి మార్కెట్‌ ముగిసే సమయానికి 1,122.66 పాయింట్లు లేదా 1.40 శాతం నష్టపోయింది. చివరకు 79,116.19 వద్ద ముగిసింది. మరో సూచీ నిఫ్టీ 385.20 పాయింట్లు లేదా 1.55 శాతం నష్టపోయి 24,480.50 వద్ద ముగిసింది. వరుసగా మూడు రోజులుగా తగ్గుముఖం పట్టడంతో ఇరు సూచీలు ఆరు నెలల కనిష్ఠ స్థాయిని తాకాయి. అమెరికా-ఇరాన్‌ దేశాల మధ్య జరుగుతున్న యుద్ధంతోపాటు రూపాయి చారిత్రక కనిష్ఠ స్థాయికి పడిపోవడం, విదేశీ సంస్థాగత మదుపరుల విక్రయాలు సూచీల పతనాన్ని శాసించాయని దలాల్‌స్ట్రీట్‌ వర్గాలు వెల్లడించాయి. గ్లోబల్‌ మార్కెట్లో బ్యారెల్‌ చమురు ధర 3 శాతం ఎగబాకి 83.91 డాలర్లకు చేరుకున్నది.

చమురు, పెయింట్స్‌ షేర్లు డౌన్‌

క్రూడాయిల్‌ ధరలు భగ్గుమనడంతో చమురు కంపెనీల షేర్లతోపాటు పెయింట్స్‌ షేర్లు కూడా భారీగా పతనం చెందాయి. హెచ్‌పీసీఎల్‌ షేరు 5.41 శాతం పతనం చెందగా, బీపీసీఎల్‌ షేరు 4.94 శాతం, ఐవోసీ షేరు 4.78 శాతం చొప్పున దిగువకు పడిపోయాయి. వీటితోపాటు శాలిమర్‌ పెయింట్స్‌ షేరు 2.60 శాతం, బర్గర్‌ పెయింట్‌ షేరు 2.22 శాతం, ఇండిగో పెయింట్స్‌ 1.49 శాతం, ఏషియన్‌ పెయింట్స్‌. కన్సాయి నెరోలాక్‌ పెయింట్స్‌, అక్జో నోబెల్‌ ఇండియా షేర్లు కూడా క్షీణించాయి.

రెండు రోజుల్లో 16 లక్షల కోట్లు..

దేశీయ స్టాక్‌ మార్కెట్ల వరుస నష్టాలతో మదుపరులు ఉక్కిరిబిక్కిరి అవుతున్నారు. వరుసగా రెండు రోజుల్లో వీరు రూ.16 లక్షల కోట్లకు పైగా సంపద కోల్పోయారు. ఇరాన్‌పై అమెరికా-ఇజ్రాయిల్‌ దేశాలు జరుపుతున్న యుద్ధంతో స్టాక్‌ మార్కెట్లు భీకర నష్టాల పాలవుతున్నాయి. గత శుక్ర, సోమ, బుధవారాల్లో సెన్సెక్స్‌ 2,171 పాయింట్లు లేదా 2.67 శాతం నష్టపోయింది. దీంతో బీఎస్‌ఈలో లిైస్టెన కంపెనీల మార్కెట్‌ క్యాపిటలైజేషన్‌ విలువ రూ.16,32,428.12 కోట్లు కరిగిపోయి రూ.4,47,18,243.15 కోట్లు లేదా 4.85 ట్రిలియన్‌ డాలర్లకు పడిపోయింది. పశ్చిమాసియా దేశాల్లో రోజురోజుకూ యుద్ధమేఘాలు కమ్ముకుంటుండటంతో సూచీలు తీవ్ర ఆటుపోట్లకు గురవుతున్నాయని, గ్లోబల్‌ మార్కెట్ల నుంచి వచ్చిన ప్రతికూల సంకేతాలు మదుపరుల్లో సెంటిమెంట్‌ను నీరుగారుస్తున్నదని రెలిగేర్‌ బ్రోకింగ్‌ సీనియర్‌ వైస్‌ ప్రెసిడెంట్‌ అజిత్‌ మిశ్రా తెలిపారు. మరోవైపు, క్రూడాయిల్‌ ధరలు భగ్గుమంటుండటం, విదేశీ సంస్థాగత పెట్టుబడిదారులు భారీగా నిధులను తరలించుకుపోవడం కూడా పతనానికి ఆజ్యంపోసిందన్నారు.

• టాటా స్టీల్‌ షేరు ధర 6.76 శాతం పడిపోయి టాప్‌ లూజర్‌గా నిలిచింది.
• దీంతోపాటు ఎల్‌అండ్‌టీ, బజాజ్‌ ఫైనాన్స్‌, అల్ట్రాటెక్‌ సిమెంట్‌, ఎన్‌టీపీసీ, ఇండిగో, బజాజ్‌ ఫిన్‌సర్వ్‌, హెచ్‌యూఎల్‌, అదానీపోర్ట్స్‌, కొటక్‌ బ్యాంక్‌, ట్రెంట్‌, మహీంద్రా అండ్‌ మహీంద్రా షేర్లు రెండు శాతానికి పైగా కోల్పోయాయి.
• అలాగే పవర్‌గ్రిడ్‌, యాక్సిస్‌ బ్యాంక్‌, మారుతి, బీఈఎల్‌, హెచ్‌డీఎఫ్‌సీ బ్యాంక్‌, టైటాన్‌, ఎస్బీఐ, టీసీఎస్‌, ఎటర్నల్‌, ఏషియన్‌ పెయింట్‌, రిలయన్స్‌, ఐటీసీ, ఐసీఐసీఐ బ్యాంక్‌, హెచ్‌సీఎల్‌ టెక్నాలజీ, సన్‌ఫార్మా షేర్లు నష్టపోయాయి.
• భారతీ ఎయిర్‌టెల్‌, ఇన్ఫోసిస్‌, టెక్‌ మహీంద్రా షేర్లు లాభాల్లో ముగిశాయి.
• రంగాలవారీగా మెటల్‌ సూచీ అత్యధికంగా 4 శాతం నష్టపోయింది. దీంతోపాటు బీఎస్‌యూ బ్యాంకింగ్‌ 3.50 శాతం, ఇండస్ట్రియల్స్‌ 3.29 శాతం, రియల్టీ 3.16 శాతం, కమోడిటీస్‌ 3.12 శాతం, క్యాపిటల్‌ గూడ్స్‌ 2.64 శాతం, పవర్‌ 2.59 శాతం, సర్వీసెస్‌ 2.25 శాతం, ఎనర్జీ 2.23 శాతం చొప్పున పతనం చెందాయి.