ఫలితాలకు ముందు అప్రమత్తత

సార్వత్రిక ఎన్నికల ఫలితాలు వచ్చేవారం విడుదలకానుండటంతో మదుపరుల్లో టెన్షన్‌ నెలకొన్నది. దీంతో అమ్మకాలకు మొగ్గుచూపడంతో వరుసగా మూడోరోజు మంగళవారం సూచీలు నష్టపోయాయి.

• వరుసగా మూడోరోజూ నష్టపోయిన స్టాక్‌ మార్కెట్లు

ముంబై, మే 28:సార్వత్రిక ఎన్నికల ఫలితాలు వచ్చేవారం విడుదలకానుండటంతో మదుపరుల్లో టెన్షన్‌ నెలకొన్నది. దీంతో అమ్మకాలకు మొగ్గుచూపడంతో వరుసగా మూడోరోజు మంగళవారం సూచీలు నష్టపోయాయి. పవర్‌, ఆయిల్‌, క్యాపిటల్‌ గూడ్స్‌ రంగ షేర్లు అమ్మకాల ఒత్తిడికి గురికావడంతో 30 షేర్ల ఇండెక్స్‌ సూచీ సెన్సెక్స్‌ 220 పాయింట్లు నష్టపోయి 75,170.45 వద్ద స్థిరపడింది. 75,585 నుంచి 75,083 శ్రేణిలో కదలాడిన సూచీలు చివరకు నష్టాల్లోకి జారుకున్నాయి. అటు ఎన్‌ఎస్‌ఈ నిఫ్టీ సైతం 44.30 పాయింట్లు కోల్పోయి 22,888.15 వద్దకు పడిపోయింది. ఎన్నికల ఫలితాల వరకు స్టాక్‌ మార్కెట్లు ఒడిదుడుకుల్లో కొనసాగనున్నాయని దలాల్‌స్ట్రీట్‌ వర్గాలు వెల్లడించాయి.

• పవర్‌గ్రిడ్‌, ఎన్‌టీపీసీ, టాటా మోటర్స్‌లు ఒక్క శాతానికిపైగా నష్టపోయాయి.
• వీటితోపాటు టెక్‌ మహీంద్రా, భారతీ ఎయిర్‌టెల్‌, రిలయన్స్‌, మారుతి, ఐటీసీ, కొటక్‌ బ్యాంక్‌, ఇండస్‌ఇండ్‌ బ్యాంక్‌, యాక్సిస్‌ బ్యాంక్‌, ఎస్బీఐ, ఇన్ఫోసిస్‌, టాటా స్టీల్‌, నెస్లె, బజాజ్‌ ఫైనాన్స్‌, ఐసీఐసీఐ బ్యాంక్‌, టీసీఎస్‌, సన్‌ఫార్మాలు కూడా పతనం చెందాయి.
• కానీ, ఏషియన్‌ పెయింట్స్‌, విప్రో, హెచ్‌సీఎల్‌ టెక్‌, మహీంద్రా, ఎల్‌అండ్‌టీ, హెచ్‌డీఎఫ్‌సీలు ఆకట్టుకున్నాయి.
• బీఎస్‌ఈ స్మాల్‌క్యాప్‌, మిడ్‌క్యాప్‌ ఇండెక్స్‌లు నష్టాల్లో ట్రేడయ్యాయి.
• రియల్టీ రంగ షేర్లు అత్యధికంగా 2.22 శాతం నష్టపోగా..పవర్‌ 1.86 శాతం, యుటిలిటీ 1.55 శాతం, సేవలు 1.37 శాతం, టెలికమ్యూనికేషన్‌ 1.26 శాతం, ఇండస్ట్రీయల్స్‌ 1.08 శాతం, క్యాపిటల్‌ గూడ్స్‌ షేర్లు తగ్గాయి.

డిసెంబర్‌ నాటికి 24,500కి నిఫ్టీ
ఈ ఏడాది చివరినాటికి నిఫ్టీ 24,500 పాయింట్లకు చేరుకునే అవకాశం ఉన్నదని ఎంకీ ఇన్వెస్ట్‌మెంట్‌ మేనేజర్స్‌ అంచనావేస్తున్నారు. ఇదే క్రమంలో వచ్చే ఏడాది డిసెంబర్‌ నాటికి 26,500 పాయింట్లను అధిగమించవచ్చునని అభిప్రాయపడింది. ప్రస్తుతం 22,888 పాయింట్ల స్థాయిలో ఉన్నది. ఇటీవల రికార్డు స్థాయి 23,110 పాయింట్లకు చేరుకున్న విషయం తెలిసిందే.