ఎఫ్‌డీపై 8.50 శాతం వడ్డీ.. సీనియర్‌ సిటిజన్లకు ఎస్‌ఎఫ్‌బీల్లో ప్రత్యేక ఆఫర్లు

రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) వరుస ద్రవ్యసమీక్షల్లో రెపోరేటును తగ్గించిన నేపథ్యంలో దేశంలోని చాలా బ్యాంకులు తమ రుణాలపైనేగాక, ఫిక్స్‌డ్‌ డిపాజిట్ల (ఎఫ్‌డీ)పైనా వడ్డీరేట్లను తగ్గించేస్తున్నాయి.

రిజర్వ్‌ బ్యాంక్‌ ఆఫ్‌ ఇండియా (ఆర్బీఐ) వరుస ద్రవ్యసమీక్షల్లో రెపోరేటును తగ్గించిన నేపథ్యంలో దేశంలోని చాలా బ్యాంకులు తమ రుణాలపైనేగాక, ఫిక్స్‌డ్‌ డిపాజిట్ల (ఎఫ్‌డీ)పైనా వడ్డీరేట్లను తగ్గించేస్తున్నాయి. అయితే ఇప్పటికీ కొన్ని బ్యాంకులు అత్యధికంగా 8 శాతంపైనే ఎఫ్‌డీలకు వడ్డీరేట్లను ఆఫర్‌ చేస్తున్నాయి. ముఖ్యంగా పలు స్మాల్‌ ఫైనాన్స్‌ బ్యాంకు (ఎస్‌ఎఫ్‌బీ)లు సీనియర్‌ సిటిజన్లకు 8 శాతం, అంతకంటే ఎక్కువే వార్షిక వడ్డీరేట్లను ఇస్తామంటున్నాయి. కానీ ఈ ప్రత్యేక రేట్లు ఎంపిక చేసిన కాలవ్యవధులకే వర్తిస్తాయి.

ఎస్‌ఎఫ్‌బీలు డీఐసీజీసీ కిందకు వస్తాయా?

చాలామంది డిపాజిటర్లు స్మాల్‌ ఫైనాన్స్‌ బ్యాంకుల్లో ఎఫ్‌డీలు చేయడానికి సంశయిస్తున్నారిప్పుడు. ఇందుకు కారణం తాము చేసే ఎఫ్‌డీలకు బీమా భరోసా ఉందా? లేదా? అన్న అనుమానమే. అయితే ప్రస్తుత నిబంధనల ప్రకారం.. దేశంలోని అన్ని ప్రభుత్వ, ప్రైవేట్‌ రంగ బ్యాంకుల మాదిరిగానే స్మాల్‌ ఫైనాన్స్‌ బ్యాంకుల్లోనూ రూ.5 లక్షలదాకా ఎఫ్‌డీలకు ఆర్బీఐ అనుబంధ సంస్థ డిపాజిట్‌ ఇన్సూరెన్స్‌ అండ్‌ క్రెడిట్‌ గ్యారంటీ కార్పొరేషన్‌ (డీఐసీజీసీ) పూచీకత్తు ఉంటున్నది. దీంతో మదుపరులకు భయం అవసరం లేదనే చెప్పవచ్చు.

ఆర్బీఐ పర్యవేక్షణ ఉంటుందా?

దేశంలోని అన్ని బ్యాంకుల తరహాలోనే స్మాల్‌ ఫైనాన్స్‌ బ్యాంకులపైనా ఆర్బీఐ పర్యవేక్షణ ఉంటుంది. వీటికీ ఎస్‌ఎల్‌ఆర్‌, సీఆర్‌ఆర్‌ రూల్స్‌ వర్తిస్తాయి. ఆర్బీఐ ఆదేశాలు, మార్గదర్శకాలను అనుసరించాల్సిందే.

ఎఫ్‌డీలపై టీడీఎస్‌ రూల్స్‌ ఇవి..

ఏప్రిల్‌ 1 నుంచి సీనియర్‌ సిటిజన్ల ఎఫ్‌డీ లపై టీడీఎస్‌ నిబంధనల్ని సవరించారు. ఒక ఆర్థిక సంవత్సరంలో ఎఫ్‌డీపై వడ్డీ ఆదాయం లక్ష రూపాయలు దాటితే పన్ను కోతలుంటాయి. సాధారణ ప్రజానీకానికైతే రూ.50వేలు దాటితే టీడీఎస్‌ ఉంటుంది.

• ఉత్కర్ష్‌ స్మాల్‌ ఫైనాన్స్‌ బ్యాంక్‌ రెండేండ్ల నుంచి మూడేండ్లదాకా ఉండే ఎఫ్‌డీలపై 8.50 శాతం వార్షిక వడ్డీరేటును ఆఫర్‌ చేస్తున్నది.
• 18 నెలల 1,2 రోజుల కాలపరిమితి కలిగిన ఎఫ్‌డీలకు ైస్లెస్‌ స్మాల్‌ ఫైనాన్స్‌ బ్యాంక్‌ 8.50 శాతం వడ్డీరేటును అందిస్తున్నది.
• సూర్యోదయ్‌ స్మాల్‌ ఫైనాన్స్‌ బ్యాంక్‌ 5 ఏండ్ల ఎఫ్‌డీపై 8.40 శాతం వడ్డీని కట్టిస్తున్నది.
• జన స్మాల్‌ ఫైనాన్స్‌ బ్యాంక్‌ ఏడాది నుంచి మూడేండ్ల కాలపరిమితి కలిగిన ఎఫ్‌డీలపై 8.25 శాతం వడ్డీని చెల్లిస్తున్నది.
• 1001 రోజుల ఎఫ్‌డీకి యునిటి స్మాల్‌ ఫైనాన్స్‌ బ్యాంక్‌ 8.25 శాతం వరకు వడ్డీరేటును ఇస్తున్నది.
• ఈక్విటాస్‌ స్మాల్‌ ఫైనాన్స్‌ బ్యాంక్‌ 888 రోజుల ఎఫ్‌డీపై 8.20 శాతం వడ్డీరేటును ఆఫర్‌ చేస్తున్నది.
• 444 రోజుల ఎఫ్‌డీపై ఈఎస్‌ఏఎఫ్‌ స్మాల్‌ ఫైనాన్స్‌ బ్యాంక్‌ 8.10 శాతం వడ్డీని అందిస్తున్నది.
• ఉజ్జీవన్‌ స్మాల్‌ ఫైనాన్స్‌ బ్యాంక్‌ రెండేండ్ల ఎఫ్‌డీపై 8.10 శాతం వడ్డీరేటును ఇస్తామంటున్నది.
• రెండేండ్ల 1 రోజు నుంచి మూడేండ్లదాకా చేసే ఎఫ్‌డీలపై ఏయూ స్మాల్‌ ఫైనాన్స్‌ బ్యాంక్‌ 7.60 శాతం వడ్డీరేటును చెల్లిస్తున్నది.