54 వేలపైకి సెన్సెక్స్‌

దేశీయ స్టాక్‌ మార్కెట్లు వరుసగా రెండోరోజు భారీగా లాభపడ్డాయి. అంతర్జాతీయ మార్కెట్ల నుంచి వచ్చిన సానుకూల అంశాలతో ఐటీ, చమురు అండ్‌ గ్యాస్‌, బ్యాంకింగ్‌ షేర్లకు మదుపరుల నుంచి లభించిన మద్దతుతో సెన్సెక్స్‌ మళ్లీ 54 వేల పాయింట్ల మార్క్‌ దాటింది.

• 760 పాయింట్లు పెరిగిన సూచీ

ముంబై, జూలై 18: దేశీయ స్టాక్‌ మార్కెట్లు వరుసగా రెండోరోజు భారీగా లాభపడ్డాయి. అంతర్జాతీయ మార్కెట్ల నుంచి వచ్చిన సానుకూల అంశాలతో ఐటీ, చమురు అండ్‌ గ్యాస్‌, బ్యాంకింగ్‌ షేర్లకు మదుపరుల నుంచి లభించిన మద్దతుతో సెన్సెక్స్‌ మళ్లీ 54 వేల పాయింట్ల మార్క్‌ దాటింది. మార్కెట్‌ ముగిసే సమయానికి 30 షేర్ల ఇండెక్స్‌ సూచీ సెన్సెక్స్‌ 760.37 పాయింట్లు లేదా 1.41 శాతం లాభపడి 54,521.15 వద్ద ముగిసింది. ఎన్‌ఎస్‌ఈ నిఫ్టీ 229.30 పాయింట్లు లేదా 1.43 శాతం అందుకొని 16,278.50 వద్ద నిలిచింది. ఆసియన్‌ మార్కెట్ల లాభాల్లో ట్రేడవడంతో దేశీయ సూచీలు కదంతొక్కాయి.

4.73 లక్షల కోట్లు పెరిగిన సంపద
స్టాక్‌ మార్కెట్లు భారీగా లాభపడటంతో మదుపరులు లాభాల జడివానలో తడిసి ముద్దవుతున్నారు. వరుస రెండు ట్రేడింగ్‌ సెషన్లలో మదుపరుల సంపద ఏకంగా రూ.4 లక్షల కోట్లకు పైగా పెరిగింది. దీంతో బీఎస్‌ఈలో లిైస్టెన సంస్థల మార్కెట్‌ విలువ రూ.4,73,814.10 కోట్లు పెరిగి రూ.2,55,39, 794.75 కోట్లకు చేరుకున్నది.

• ఇండస్‌ఇండ్‌ బ్యాంక్‌ 4.36 శాతం పెరిగి టాప్‌ గెయినర్‌గా నిలిచింది. ఇన్ఫోసిస్‌ 4.16 శాతం, టెక్‌ మహీంద్రా 3.67 శాతం, విప్రో 2.77 శాతం, టీసీఎస్‌ 2.23 శాతం చొప్పున పెరిగాయి. రిలయన్స్‌ ఇంండస్ట్రీస్‌ ఒక్క శాతం అధికమైంది.
• బజాజ్‌ ఫిన్‌సర్వ్‌ 3.46 శాతం, యాక్సిస్‌ బ్యాంక్‌ 3.31 శాతం, కొటక్‌ బ్యాంక్‌ 3.25 శాతం, ఐసీఐసీఐ బ్యాంక్‌ 2.78 శాతం, ఎస్బీఐ 2.35 శాతం చొప్పున పెరిగాయి.
• అల్ట్రాటెక్‌ సిమెంట్‌, ఎల్‌అండ్‌టీ, టాటా స్టీల్‌, హెచ్‌సీఎల్‌ టెక్‌, భారతీ ఎయిర్‌టెల్‌, బజాజ్‌ ఫైనాన్స్‌ షేర్లు అధికమయ్యాయి.
• మరోవైపు, డాక్టర్‌ రెడ్డీస్‌ 1.7 శాతం పతనమవగా, హెచ్‌డీఎఫ్‌సీ ద్వయం 1.19 శాతం, మహీంద్రా అండ్‌ మహీంద్రా, మారుతిలు పతనం చెందాయి.
• రంగాలవారీగా చూస్తే ఐటీ 3.07 శాతం, టెక్‌ 2.96 శాతం, మెటల్‌ 2.72 శాతం, బ్యాంకింగ్‌ 2.08 శాతం, క్యాపిటల్‌ గూడ్స్‌ రంగాల షేర్లకు మదుపరుల నుంచి మద్దతు లభించింది. కానీ ఎఫ్‌ఎంసీజీ రంగ షేర్లు కుదేలయ్యాయి.
• బీఎస్‌ఈల్లో 3,612 షేర్లు ట్రేడవగా..వీటిలో 2,350 షేర్లు లాభపడగా..1,095 షేర్లు నష్టపోయాయి.

సెబీ ఫీజుపై 18% జీఎస్టీ
సెక్యూరిటీ మార్కెట్లలో లావాదేవీలు నిర్వహించే స్టాక్‌ ఎక్సేంజీలు, వ్యక్తులు తదితర మార్కెట్‌ ఇన్‌ఫ్రాస్ట్రక్చర్‌ ఇనిస్టిట్యూషన్లు సెబీ ఫీజుపై సోమవారం నుంచి 18 శాతం వస్తు, సేవల పన్ను (జీఎస్టీ)ను చెల్లించాల్సి వస్తున్నది. ఈ మేరకు మార్కెట్‌ రెగ్యులేటర్‌ సెబీ ఓ సర్క్యులర్‌ విడుదల చేసింది. గత నెల జీఎస్టీ మండలి సిఫార్సుల నేపథ్యంలోనే ఈ భారం పడింది. ఇప్పటిదాకా సెబీ సేవలపై జీఎస్టీ మినహాయింపు ఉండేది. కానీ ఇటీవలి సమావేశంలో దాన్ని మండలి ఎత్తేసింది. దీంతో 18 శాతం జీఎస్టీ వర్తిస్తున్నది.