మళ్లీ 72 వేలపైకి సెన్సెక్స్‌

దేశీయ స్టాక్‌ మార్కెట్లు వరుసగా రెండో రోజూ లాభాల్లో ముగిశాయి. ఐటీ, టెక్నాలజీ, క్యాపిటల్‌ గూడ్స్‌ షేర్లకు మదుపరుల నుంచి లభించిన మద్దతుతోపాటు విదేశీ సంస్థాగత పెట్టుబడిదారులు భారీగా నిధులు కుమ్మరించడం సూచీలకు కలిసొచ్చింది.

• వరుసగా రెండోరోజూ లాభపడిన సూచీలు

ముంబై, జనవరి 5: దేశీయ స్టాక్‌ మార్కెట్లు వరుసగా రెండో రోజూ లాభాల్లో ముగిశాయి. ఐటీ, టెక్నాలజీ, క్యాపిటల్‌ గూడ్స్‌ షేర్లకు మదుపరుల నుంచి లభించిన మద్దతుతోపాటు విదేశీ సంస్థాగత పెట్టుబడిదారులు భారీగా నిధులు కుమ్మరించడం సూచీలకు కలిసొచ్చింది. ప్రారంభంలో తీవ్ర ఒత్తిడికి గురైన సూచీలకు అంతర్జాతీయ మార్కెట్ల నుంచి వచ్చిన సంకేతాలతో మదుపరులు కొనుగోళ్‌లకు మొగ్గుచూపారు. ఫలితంగా వారాంతం మార్కెట్‌ ముగిసే సమయానికి 30 షేర్ల ఇండెక్స్‌ సూచీ సెన్సెక్స్‌ 178.58 పాయింట్లు అందుకొని 72,026.15 వద్ద ముగిసింది. మరో సూచీ నిఫ్టీ 52.20 పాయింట్లు పెరిగి 21,710.80 వద్ద స్థిరపడింది. వారాంతం ట్రేడింగ్‌లో సూచీలు తీవ్ర ఒడిదుడుకులకు గురయ్యాయని, ఒక దశలో నష్టాల్లోకి జారుకున్న ఇరు సూచీలు చివర్లో కోలుకున్నాయని రెలిగేర్‌ బ్రోకింగ్‌ సీనియర్‌ వైస్‌ ప్రెసిడెంట్‌ అజిత్‌ మిశ్రా తెలిపారు.

• టీసీఎస్‌ 1.93 శాతం, ఎల్‌అండ్‌టీ 1.62 శాతం, ఇన్ఫోసిస్‌ 1.37 శాతం, యాక్సిస్‌ బ్యాంక్‌ 1.16 శాతం, హెచ్‌యూఎల్‌ 1.08 శాతం చొప్పున బలపడ్డాయి.
• వీటితోపాటు విప్రో, హెచ్‌సీఎల్‌ టెక్నాలజీ, ఐసీఐసీఐ బ్యాంక్‌, బజాజ్‌ ఫిన్‌సర్వ్‌, రిలయన్స్‌, టెక్‌ మహీంద్రా, బజాజ్‌ ఫైనాన్స్‌, మహీంద్రా అండ్‌ మహీంద్రా, మారుతి, అల్ట్రాటెక్‌ సిమెంట్‌ షేర్లు లాభాల్లో ముగిశాయి.
• ఇదే సమయంలో నెస్లె, సన్‌ఫార్మా, జేఎస్‌డబ్ల్యూ స్టీల్‌, కొటక్‌ బ్యాంక్‌, ఏషియన్‌ పెయింట్స్‌, ఎన్‌టీపీసీ, టాటా మోటర్స్‌, హెచ్‌డీఎఫ్‌సీ బ్యాంక్‌, టాటా స్టీల్‌, ఐటీసీ, ఇండస్‌ఇండ్‌ బ్యాంక్‌, టైటాన్‌, ఎయిర్‌టెల్‌, ఎస్బీఐ, పవర్‌గ్రిడ్‌ షేర్లు నష్టపోయాయి.
• మొత్తంమీద ఈ వారంలో సెన్సెక్స్‌ 214.11 పాయింట్లు, నిఫ్టీ 20.6 పాయింట్ల చొప్పున అధికమయ్యాయి.
• రంగాలవారీగా చూస్తే ఐటీ సూచీ 1.28 శాతం అధికమవగా, క్యాపిటల్‌ గూడ్స్‌ 1.27 శాతం, టెక్‌ 1.03 శాతం, ఇండస్ట్రీయల్స్‌, టెలికమ్యూనికేషన్‌ షేర్లు లాభాల్లో ముగిశాయి.
• కానీ, కమోడిటీస్‌, కన్జ్యూమర్‌ డ్యూరబుల్‌, మెటల్‌ రంగ షేర్లు పడిపోయాయి.