Stock Market | మార్కెట్లో ఫెడ్‌ ప్రకంపనలు.. 10 లక్షల కోట్ల సంపద ఆవిరి

దేశీయ స్టాక్‌ మార్కెట్లు కుప్పకూలాయి. అమెరికా ఫెడరల్‌ రిజర్వు వడ్డీరేట్లను పావు శాతం మేర తగ్గిస్తూ తీసుకున్న నిర్ణయంతోపాటు వచ్చే ఏడాది రేట్లను ఆశించిన స్థాయిలో కోత ఉండకపోవచ్చన్న సంకేతాలు ఇవ్వడం మదుపరుల్లో సెంటిమెంట్‌ను దెబ్బతీసింది.

• సెన్సెక్స్‌ 965, నిఫ్టీ 247 పాయింట్ల పతనం

Stock Market | ముంబై, డిసెంబర్‌ 19: దేశీయ స్టాక్‌ మార్కెట్లు కుప్పకూలాయి. అమెరికా ఫెడరల్‌ రిజర్వు వడ్డీరేట్లను పావు శాతం మేర తగ్గిస్తూ తీసుకున్న నిర్ణయంతోపాటు వచ్చే ఏడాది రేట్లను ఆశించిన స్థాయిలో కోత ఉండకపోవచ్చన్న సంకేతాలు ఇవ్వడం మదుపరుల్లో సెంటిమెంట్‌ను దెబ్బతీసింది. ఫలితంగా నష్టాల బటన్‌ నొక్కిన మదుపరులు చివరి వరకు ఇదే పంతాను కొనసాగించడంతో రోజంతా నష్టాల్లో ట్రేడయ్యాయి.

కన్జ్యూమర్‌ డ్యూరబుల్‌, బ్యాంకింగ్‌, ఐటీ రంగ షేర్లు భారీ నష్టాల్లో కూరుకుపోవడంతోపాటు విదేశీ సంస్థాగత పెట్టుబడిదారులు భారీగా నిధులను తరలించుకుపోవడంతో సెన్సెక్స్‌ 80 వేల కీలక మైలురాయిని కోల్పోయింది. ఇంట్రాడేలో 1,100 పాయింట్లకు పైగా నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు 964.15 పాయింట్లు లేదా 1.20 శాతం నష్టపోయి 79,218.05 వద్ద నిలిచింది. మరో సూచీ నిఫ్టీ 247.15 పాయింట్లు లేదా 1.02 శాతం నష్టపోయి 24 వేల పాయింట్ల దిగువకు 23,951.70 వద్దకు జారుకున్నది. గత నాలుగు రోజుల్లో సెన్సెక్స్‌ 2,915.07 పాయింట్లు లేదా 3.54 శాతం, నిఫ్టీ 816.60 పాయింట్లు లేదా 3.29 శాతం నష్టపోయింది.

10 లక్షల కోట్ల సంపద ఆవిరి

స్టాక్‌ మార్కెట్ల వరుస నష్టాలతో లక్షల కోట్ల మదుపరుల సంపద హారతి కర్పూరంలా కరిగిపోయింది. గత నాలుగు రోజులుగా సూచీలు నష్టాల్లో ట్రేడవడంతో మదుపరులు రూ.10 లక్షల కోట్ల వరకు సంపదను కోల్పోయారు. దీంతో బీఎస్‌ఈలో లిైస్టెన సంస్థల మార్కెట్‌ విలువ రూ.9,65,935.96 కోట్లు కరిగిపోయి రూ.4,49,76,402.63 కోట్లు (5.29 ట్రిలియన్‌ డాలర్లు)కు పడిపోయింది.

• ఇన్ఫోసిస్‌, బజాజ్‌ ఫిన్‌సర్వ్‌, జేఎస్‌డబ్ల్యూ స్టీల్‌, బజాజ్‌ ఫైనాన్స్‌, ఏషియన్‌ పెయింట్స్‌, ఐసీఐసీఐ బ్యాంక్‌, రిలయన్స్‌ ఇండస్ట్రీస్‌, టీసీఎస్‌, టాటా మోటర్స్‌, మహీంద్రా అండ్‌ మహీంద్రా షేర్లు భారీగా నష్టపోయాయి.
• మరోవైపు, సన్‌ఫార్మా, పవర్‌గ్రిడ్‌, హెచ్‌యూఎల్‌ షేర్లు లాభాల్లో ముగిశాయి.
• రంగాలవారీగా చూస్తే ఐటీ రంగ సూచీ అత్యధికంగా 1.20 శాతం నష్టపోగా, కన్జ్యూమర్‌ డ్యూరబుల్‌ 1.15 శాతం, ఐటీ 1.13 శాతం, క్యాపిటల్‌ గూడ్స్‌ 1.07 శాతం, టెక్‌, ఆర్థిక సేవలు నష్టపోగా.. హెల్త్‌కేర్‌ సూచీ లాభాల్లో ముగిసింది.
• మొత్తం షేర్లలో 2,315 షేర్లు నష్టపోగా, 1,680 షేర్లు లాభాల్లో ముగిశాయి.