Stock Markets | మార్కెట్లపై యుద్ధమేఘాలు.. రూ.9 లక్షల కోట్లు ఆవిరి

దేశీయ స్టాక్‌ మార్కెట్లపై యుద్ధమేఘాలు కమ్ముకున్నాయి. భారత్‌-పాకిస్థాన్‌ సరిహద్దు ప్రాంతాల్లో ఉద్రిక్తత పరిస్థితులు నెలకొనడంతో మదుపరులు అమ్మకాలకు మొగ్గుచూపారు. నష్టాల్లో ప్రారంభమైన సూచీలు చివరి వరకు అదే ట్రెండ్‌ను కొనసాగించాయి.

• ఒక దశలో 1,200 పాయింట్లు.. చివర్లో 590 పాయింట్లు డౌన్‌

Stock Markets | ముంబై, ఏప్రిల్‌ 25 : దేశీయ స్టాక్‌ మార్కెట్లపై యుద్ధమేఘాలు కమ్ముకున్నాయి. భారత్‌-పాకిస్థాన్‌ సరిహద్దు ప్రాంతాల్లో ఉద్రిక్తత పరిస్థితులు నెలకొనడంతో మదుపరులు అమ్మకాలకు మొగ్గుచూపారు. నష్టాల్లో ప్రారంభమైన సూచీలు చివరి వరకు అదే ట్రెండ్‌ను కొనసాగించాయి. ఒక దశలో వెయ్యి పాయింట్లకు పైగా నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు వారాంతం ట్రేడింగ్‌ ముగిసే సరికి 588.90 పాయింట్లు కోల్పోయి 79,212.53 వద్ద ముగిసింది. మరో సూచీ నిఫ్టీ 207.35 పాయింట్లు పతనం చెంది 24,039.35 వద్ద ముగిసింది. పహల్గాంపై తీవ్రవాదులు దాడులు చేయడంతో భారత్‌-పాకిస్థాన్‌ దేశాల మధ్య మళ్లీ యుద్ధమేఘాలు కమ్ముకోవడం మార్కెట్‌ సెంటిమెంట్‌ను నిరాశపరిచిందని జియోజిట్‌ ఇన్వెస్ట్‌మెంట్‌ హెడ్‌ వినోద్‌ నాయర్‌ తెలిపారు. ఐటీ రంగ సూచీ మినహా అన్ని రంగాల సూచీలు తీవ్ర ఒత్తిడికి గురయ్యాయి.

• అదానీ పోర్ట్స్‌ షేరు 3.61 శాతం నష్టపోయి టాప్‌ లూజర్‌గా నిలిచింది. దీంతోపాటు యాక్సిస్‌ బ్యాంక్‌, బజాజ్‌ ఫైనాన్స్‌, టాటా మోటర్స్‌ షేర్లు రెండు శాతానికి పైగా కోల్పోయాయి.
• అలాగే టాటా స్టీల్‌, ఎన్‌టీపీసీ, మారుతి, ఎస్బీఐ, భారతీ ఎయిర్‌టెల్‌, ఏషియన్‌ పెయింట్స్‌, మహీంద్రా అండ్‌ మహీం ద్రా, సన్‌ఫార్మా, కొటక్‌ బ్యాంక్‌, ఎల్‌అండ్‌టీ, నెస్లె, టైటాన్‌, హెచ్‌సీఎల్‌ టెక్నాలజీ, ఐటీసీ, హెచ్‌డీఎఫ్‌సీ బ్యాంక్‌, రిలయన్స్‌ షేర్లు కూడా నష్టాల్లో ముగిశాయి.
• టీసీఎస్‌, టెక్‌ మహీంద్రా, అల్ట్రాటెక్‌ సిమెంట్‌, ఇన్ఫోసిస్‌, ఇండస్‌ఇండ్‌ బ్యాంక్‌, హెచ్‌యూఎల్‌, ఐసీఐసీఐ బ్యాంక్‌ షేర్లు లాభాల్లో ముగిశాయి.
• బీఎస్‌ఈ స్మాల్‌క్యాప్‌ 2.56 శాతం, మిడ్‌క్యాప్‌ కూడా 2.44 శాతం కోల్పోయింది.
• రంగాలవారీగా చూస్తే సర్వీసెస్‌ 3.11 శాతం నష్టపోగా, యుటిలిటీ 2.96 శాతం, రియల్టీ 2.87 శాతం, పవర్‌ 2.77 శాతం, ఇండస్ట్రీయల్స్‌ 2.19 శాతం, క్యాపిటల్‌ గూడ్స్‌ 2.06 శాతం నష్టపోయింది. కానీ, ఐటీ రంగ సూచీ లాభా ల్లో ముగిసింది.

రూ.9 లక్షల కోట్లు ఆవిరి

స్టాక్‌ మార్కెట్లు వరుస నష్టాలతో మదుపరులు లక్షల కోట్ల సంపదను కోల్పోయారు. వరుసగా రెండు రోజుల్లో ఇన్వెస్టర్లు రూ.8.88 లక్షల కోట్ల సంపద హారతి కర్పూరంలా కరిగిపోయింది. దీంతో బీఎస్‌ఈలో లిైస్టెన కంపెనీల మార్కెట్‌ విలువ రూ.8,88,975.14 కోట్లు కరిగిపోయి రూ.4,21,58,900.91 కోట్లు(4.93 ట్రిలియన్‌ డాలర్లు)కు పరిమితమైంది.