రెండోరోజూ అదే తీరు

• భారీగా నష్టపోయిన స్టాక్‌ మార్కెట్లు

ముంబై, ఆగస్టు 20: దేశీయ స్టాక్‌ మార్కెట్ల వరుస లాభాలకు బ్రేక్‌పడింది. అంతర్జాతీయంగా డెల్లా కేసులు పెరుగుతుండటంతోపాటు అమెరికా ఫెడరల్‌ వడ్డీరేట్లను పెంచబోతున్నదని వస్తున్న వార్తలు మదుపరుల్లో ఆందోళన పెంచింది. ఫలితంగా వారాంతం ట్రేడింగ్‌ ముగిసే సరికి 30 షేర్ల ఇండెక్స్‌ సూచీ సెన్సెక్స్‌ నష్టాల్లోకి జారుకున్నది. రూపాయి విలువ కూడా పడిపోవడం మార్కెట్లను పతనాన్ని శాసించింది. దీంతో సెన్సెక్స్‌ 300.17 పాయింట్లు తగ్గి 55,329.32 వద్ద ముగియగా, జాతీయ స్టాక్‌ ఎక్సేంజ్‌ సూచీ నిఫ్టీ సైతం 118.35 పాయింట్లు కోల్పోయి 16,450.50 వద్ద స్థిరపడింది.

• టాటా స్టీల్‌ షేరు అత్యధికంగా 8 శాతం పతనం చెందింది. ఎస్బీఐ, డాక్టర్‌ రెడ్డీస్‌, సన్‌ ఫార్మా, కొటక్‌ బ్యాంక్‌, ఎల్‌అండ్‌టీ, బజాజ్‌ ఆటో షేర్లు కూడా నష్టపోయాయి.
• మరోవైపు హెచ్‌యూఎల్‌, ఏషియన్‌ పెయింట్స్‌, నెస్లె, బజాజ్‌ ఫైనాన్స్‌, హెచ్‌డీఎఫ్‌సీ, హెచ్‌డీఎఫ్‌సీ బ్యాంక్‌, మారుతి, ఐటీసీలు ఐదు శాతానికి పైగా లాభపడ్డాయి.
• ఈవారం మొత్తంలో సెన్సెక్స్‌ 107.97 పాయింట్లు, నిఫ్టీ 78 పాయింట్లు పతనం చెందాయి.
• రంగాలవారీగా చూస్తే మెటల్‌ 6.90 శాతం తగ్గగా, రియల్టీ, ఇండస్ట్రియల్‌, క్యాపిటల్‌ గూడ్స్‌ నష్టపోయాయి.
• బీఎస్‌ఈ మిడ్‌క్యాప్‌, స్మాల్‌క్యాప్‌లు రెండు శాతం వరకు కోల్పోయాయి.
• అంతర్జాతీయ మార్కెట్లో క్రూడాయిల్‌ స్వల్పంగా తగ్గి 66.06 డాలర్ల వద్ద బ్యారెల్‌ ధర ఉన్నది.
• డాలర్‌తో పోలిస్తే రూపాయి విలువ 15 పైసలు తగ్గి 74.39 వద్దకు జారుకున్నది.
• పీ-నోట్స్‌ ద్వారా వచ్చే పెట్టుబడులు 40 నెలల గరిష్ఠ స్థాయిని తాకాయి. రూ.1.02 లక్షల కోట్లుగా ఉన్నాయి.

రూ.3.5 లక్షల కోట్లు ఆవిరి
స్టాక్‌ మార్కెట్ల భారీ పతనంతో మదుపరుల సంపద అమాంతం కరిగిపోయింది. వరుస పతనాలతో లక్షల కోట్ల రూపాయల సంపదను కోల్పోయారు. గడిచిన రెండు రోజుల్లో మదుపరులు రూ.3.5 లక్షల కోట్ల మేర సంపదను కోల్పోయారు. దీంతో బీఎస్‌ఈలో లిైస్టెన కంపెనీల మార్కెట్‌ విలువ రూ.2,38,10,668 కోట్లకు జారుకున్నది.