ధరలు భగ్గుమంటయ్‌

• ఆర్బీఐ హెచ్చరిక
• కీలక వడ్డీ రేట్లు యథాతథం
• ద్రవ్యోల్బణం లక్ష్యం పెంపు
• ద్రవ్య పరపతి విధాన సమీక్షలో నిర్ణయాలు

న్యూఢిల్లీ, ఏప్రిల్‌ 8: భౌగోళిక రాజకీయ ఉద్రిక్తతలు మన ఆర్థిక వ్యవస్థపై ప్రతికూల ప్రభావాన్ని చూపుతాయని, వృద్ధి మందగించడంతో పాటు ధరలు పెరుగుతాయని ఆర్బీఐ గవర్నర్‌ శక్తికాంత్‌ దాస్‌ హెచ్చరించారు. ఒమిక్రాన్‌ వేవ్‌ నెమ్మదించడంతో ఆర్థిక వ్యవస్థ సానుకూల ప్రయోజనాలు పొందుతుందంటూ 2022 ఫిబ్రవరి మీటింగ్‌లో తాము వేసిన అంచనాలు.. రష్యా-ఉక్రెయిన్‌ సంక్షోభంతో మారిపోయాయని దాస్‌ తెలిపారు. ద్రవ్య పరపతి విధాన నిర్ణయాల్ని శుక్రవారం ఆర్బీఐ గవర్నర్‌ శక్తికాంత్‌ దాస్‌ మీడియాకు వెల్లడించారు. ఈ సందర్భంగా మాట్లాడుతూ ముడి చమురు, సహజవాయువు, అల్యూమినియం, పల్లాడియం, గోధుమ, మొక్కజొన్న, వంటనూనెలు, ఎరువులు వంటి కమోడిటీలు ఉత్పత్తి, ఎగుమతిలో ప్రధాన దేశాలైన రష్యా-ఉక్రయిన్‌ల మధ్య తలెత్తిన యుద్ధంతో రానున్న రోజుల్లో పలు ఆహారోత్పత్తుల ధరలు పెరుగుతాయని అంచనా వేస్తున్నామన్నారు. దీంతో ఆర్బీఐ 2022-23 ఆర్థిక సంవత్సరానికి ద్రవ్యోల్బణం అంచనాను 5.7 శాతానికి పెంచింది. ఇది 4.5 శాతంగా ఉంటుందని గత సమీక్షలో ఆర్బీఐ అంచనా వేసింది. ప్రస్తుత ఆర్థిక సంవత్సరం క్రూడ్‌ ధర సగటున 100 డాలర్లు ఉంటుందన్న అంచనాల ఆధారంగా ద్రవ్యోల్బణం లక్ష్యాన్ని ఆర్బీఐ పెంచింది.

సరళతర విధానానికి స్వస్తి
ద్రవ్యోల్బణం కోరలు చాస్తున్నప్పటికీ, ఆర్బీఐ తాజా సమీక్షలో కీలక వడ్డీ రేట్లలో ఎటువంటి మార్పులూ చేయలేదు.వరుసగా 11వ సమీక్షలోనూ రేట్లను యథాతథంగా కొనసాగించడం గమనార్హం. మూడు రోజులపాటు సమావేశమైన ఆరుగురు సభ్యులతో కూడిన మానిటరీ పాలసీ కమిటీ రెపో రేటును స్థిరంగా 4 శాతం వద్దే ఉంచాలని ఏకగ్రీవంగా ఓటు చేసిందని దాస్‌ తెలిపారు. అయితే సమీప భవిష్యత్తులో వృద్ధికి మద్దతునిస్తూనే ద్రవ్యోల్బణం లక్ష్యంగా చేసుకోవాలని, సరళతర విధానాన్ని క్రమేపీ ఉపసంహరించే దిశగా పనిచేయాలని కమిటీ నిర్ణయించినట్టు వెల్లడించారు. దీంతో సమీప భవిష్యత్తులో వడ్డీ రేట్లను పెంచే సంకేతాల్ని ఇచ్చినట్లయ్యింది.

కొత్త గృహ రుణాలకు కనిష్ఠ రేట్లే
తాజా సమీక్షలో గృహ కొనుగోలుదార్లకు ఆర్బీఐ ఊరటనిచ్చింది. బ్యాంక్‌లు ఇచ్చే రుణాలపై వడ్డీ రేట్లను ప్రభావితం చేసే రెపో, రివర్స్‌ రెపోలను కనిష్ఠస్థాయి వద్దే అట్టిపెట్టడంతో ఎలాగూ తక్కువ వడ్డీకి గృహ రుణాలు లభిస్తాయి. అలాగే హౌసింగ్‌ లోన్లపై రిస్క్‌ వెయిటేజిపై హేతుబద్దీకరించిన నిబంధనలు మరో ఏడాదిపాటు వర్తించేలా ఆర్బీఐ నిర్ణయం తీసుకుంది. ఈ నిబంధనల ప్రకారం కొత్త గృహ కొనుగోలుదార్లకు తక్కువ వడ్డీపై బ్యాంక్‌లు రుణాలిచ్చే వెసులుబాటు ఉంటుంది. సమీప భవిష్యత్‌లో కీలక రేట్లను ఆర్బీఐ పెంచినా, కొత్తగా ఇల్లు కొనేవారికి మాత్రం 2023 మార్చి వరకూ కనిష్ఠ వడ్డీ రేట్లకే రుణాలు లభిస్తాయి.

ఆర్బీఐ విధాన నిర్ణయాలు

• రెపో రేటు 4 శాతం, రివర్స్‌ రెపో రేటు 3.35 శాతం వద్ద యథాతథం. బ్యాంక్‌లకు ఆర్బీఐ ఇచ్చే రుణాలపై వసూలు చేసే వడ్డీని రెపోగా, బ్యాంక్‌లు ఆర్బీఐ వద్ద ఉంచే నగదుకు పొందే వడ్డీని రివర్స్‌ రెపోగా వ్యవహరిస్తారు.
• కీలక రేట్లను అక్కడక్కడే అట్టిపెట్టినప్పటికీ, స్టాండింగ్‌ డిపాజిట్‌ ఫెసిలిటీ (ఎస్‌డీఎఫ్‌) పేరిట 3.75 శాతం వడ్డీ రేటుతో ఒక కొత్త సదుపాయాన్ని ప్రవేశపెట్టింది. రివర్స్‌రెపో విండోకంటే బ్యాంక్‌లు 40 బేసిస్‌ పాయింట్లు అధిక వడ్డీని ఎస్‌డీఎఫ్‌తో పొందుతాయి. ఇది బ్యాంకింగ్‌ వ్యవస్థలో ఉన్న అధిక ద్రవ్యాన్ని తగ్గించేందుకు ఉద్దేశించారు.
• ఈ ఏడాది నుంచి ప్రారంభించి, వచ్చే కొద్ది సంవత్సరాల్లో బ్యాంకింగ్‌ వ్యవస్థలో ఉన్న అధిక ద్రవ్యాన్ని క్రమేపీ తగ్గిస్తామని దాస్‌ ప్రకటించారు. ఈ దిశగానే ఎస్‌డీఎఫ్‌తో పాటు కొవిడ్‌కంటే ముందు ఉన్న లిక్విడిటీ అడ్జస్ట్‌మెంట్‌ ఫెసిలిటీ (ఎల్‌ఏఎఫ్‌)ని ప్రవేశపెడుతున్నట్టు ఆర్బీఐ గవర్నర్‌ తెలిపారు. ఎల్‌ఏఎఫ్‌..కీలకరేట్లతో పోలిస్తే 50 బేసిస్‌ పాయింట్ల వ్యత్యాసంతో బ్యాంక్‌లకు లభిస్తుంది.
• కొవిడ్‌ కారణంగా ఆర్బీఐ వివిధ కార్యకలాపాల ద్వారా బ్యాంకింగ్‌ వ్యవస్థకు అపారమైన లిక్విడిటీని అందించిందని, అందులో కొంత వెనక్కురాగా, ఇంకా బ్యాంక్‌ల వద్ద రూ. 8.5 లక్షల కోట్ల ద్రవ్యం అధికంగా ఉందని దాస్‌ తెలిపారు. దీనిని క్రమేపీ వెనక్కు తీసుకుంటామన్నారు.

ధరల పెరుగుదలకు ఆర్బీఐ కారణాలివీ..

• వంటనూనెల సరఫరాలో ఉక్రెయిన్‌ కీలకదేశంకావడంతో నల్ల సముద్రం ప్రాంతం నుంచి సరఫరాలు నిలిచిపోయి ధరలు పెరుగుతాయి.
• మొక్కజొన్న సరఫరాల్లో అవాంతరాల కారణంగా పశు దాణా ధర కూడా భారీగా అధికమైనందున, చికెన్‌, పౌల్ట్రీ, పాల ఉత్పత్తుల ధరలు ఈ ఏడాది గరిష్ఠంగానే ఉంటాయి.
• దేశంలో డీజిల్‌, పెట్రోల్‌ ధరల పెరుగుదలతో ఇతర ఉత్పత్తుల ధరలన్నీ మరో రౌండ్‌ పెరుగుతాయి.