PPF | పొదుపునకు.. దీర్ఘకాలిక మదుపునకు చక్కని సాధనం పీపీఎఫ్‌ ఖాతా

పొదుపునకు, దీర్ఘకాలిక మదుపునకు పబ్లిక్‌ ప్రావిడెంట్‌ ఫండ్‌ (పీపీఎఫ్‌) చక్కని సాధనం. పన్ను ప్రయోజనాలను కల్పిస్తూ వ్యక్తుల ఆదాయ వృద్ధికి దోహదం చేస్తుంది.

PPF | పొదుపునకు, దీర్ఘకాలిక మదుపునకు పబ్లిక్‌ ప్రావిడెంట్‌ ఫండ్‌ (పీపీఎఫ్‌) చక్కని సాధనం. పన్ను ప్రయోజనాలను కల్పిస్తూ వ్యక్తుల ఆదాయ వృద్ధికి దోహదం చేస్తుంది. పీపీఎఫ్‌ వడ్డీరేట్లను కేంద్ర ప్రభుత్వం నిర్ణయిస్తుంది. 3 నెలలకోసారి సమీక్ష జరుగుతుంది. ప్రస్తుత వార్షిక వడ్డీరేటు 7.1 శాతం. కనీసం 15 ఏండ్ల లాకిన్‌ పీరియడ్‌తో ఐదేండ్లు నిరవధికంగా ఖాతాను పొడిగించుకోవచ్చు. ఈ ఖాతా లాభాలను పరిశీలిస్తే..

అధిక వడ్డీరేట్లు

పీపీఎఫ్‌లో వడ్డీరేట్లు సాధారణంగా 7-8 శాతంగా ఉంటాయి. సేవిం గ్స్‌ ఖాతా వడ్డీరేటు 3-4 శాతమే. అందుకే పీపీఎఫ్‌ ఖాతా లు ఆకర్షణీయంగా మారాయి.

పన్ను ప్రయోజనాలు

ఖాతాలో జమయ్యే మొత్తాలతోపాటు వాటిపై పొందే వడ్డీ ఆదాయానికీ ఆదాయ పన్ను (ఐటీ) చట్టంలోని సెక్షన్‌ 80సీ కింద పన్ను మినహాయింపులుంటాయి. ప్రతీ ఆర్థిక సంవత్సరం తమ పీపీఎఫ్‌కు ఖాతాదారులు రూ.500కు తగ్గకుండా, రూ.1.5 లక్షలకు మించకుండా జమ చేసుకోవచ్చు.

సురక్షిత పెట్టుబడి

కేంద్ర ప్రభుత్వం అందిస్తున్న పథకమే పీపీఎఫ్‌. కాబట్టి ఇదో సురక్షిత పెట్టుబడి. కచ్ఛితమైన, స్థిరమైన రాబడులుంటాయి. స్టాక్‌ మార్కెట్‌ లేదా మ్యూచువల్‌ ఫండ్స్‌ల్లో పెట్టుబడులకున్న రిస్క్‌ ఇక్కడ ఉండదు.

రుణ సౌకర్యం

ఖాతాదారులు తమ ఖాతాలో ఉన్న నిల్వల్లో 25 శాతం వరకు రుణంగా తీసుకోవచ్చు. ఖాతా తెరిచిన ఐదేండ్ల తర్వాత కొద్దికొద్దిగా (బ్యాలెన్స్‌లో 50 శాతం వరకు) నగదునూ ఉపసంహరించుకోవచ్చు.

పీపీఎఫ్‌ ఖాతాకు ఎవరు అర్హులు?

• భారతీయ పౌరులై ఉండాలి.
• ఖాతాను కేవలం ఒక్కసారే తెరవగలం.
• మేజర్లు అయ్యేదాకా మైనర్ల పేరిట వారి తల్లిదండ్రులు లేదా సంరక్షకులు పీపీఎఫ్‌ ఖాతా తెరిచి నిర్వహించవచ్చు.

ఏయే పత్రాలు కావాలి?

• ఓటర్‌ ఐడీ, పాస్‌పోర్ట్‌, ఆధార్‌ కార్డ్‌, పాన్‌ కార్డ్‌ తదితర కేవైసీ ధ్రువీకరణలు.
• ఇటీవలి పాస్‌పోర్ట్‌ సైజ్‌ ఫోటోలు.
• అకౌంట్‌ తెరిచే ఫారం.
• నామినీ వివరాలు.

ఖాతాను ఎలా తెరవాలి?

• ప్రధాన బ్యాంకులన్నింటిలో ఈ ఖాతా సౌకర్యం ఉంటుంది.
• బ్యాంక్‌ వెబ్‌సైట్‌ లేదా మొబైల్‌ బ్యాంకింగ్‌ యాప్‌లోకి లాగిన్‌ అవ్వాలి.
• ‘ఓపెన్‌ ఏ పీపీఎఫ్‌ అకౌంట్‌’ ట్యాబ్‌ను ఎంచుకోవాలి.
• మైనర్ల కోసం అయితే ‘మైనర్‌ అకౌంట్‌’, మీ కోసమే అయితే ‘సెల్ఫ్‌ అకౌంట్‌’ను ఎంచుకోవాలి.
• ఆపై అడిగిన వివరాలన్నీ దరఖాస్తు ఫారంలో నింపి సరిచూసుకోవాలి.
• ప్రతీ ఆర్థిక సంవత్సరం మీరు డిపాజిట్‌ చేసే మొత్తాన్ని పేర్కొనాలి.
• పీపీఎఫ్‌ ఖాతాలోకి మీ సేవింగ్స్‌ ఖాతా నుంచి డిపాజిట్లు వెళ్లేందుకు అనుమతులివ్వాలి.
• ఓటీపీని పొందేందుకు మీ రిజిస్టర్డ్‌ మొబైల్‌ నెంబర్‌ను ఎంటర్‌ చేయాలి.
• ఓటీపీని ఎంటర్‌ చేసి ధ్రువీకరించుకోవాలి.
• ఆపై మీ ఖాతా మొదలవుతుంది. ఈ సమాచారం మీకు ఫోన్‌ మెసేజ్‌ లేదా ఈ-మెయిల్‌ ద్వారా వస్తుంది.