ప్యాసింజర్‌కు ఎస్‌యూవీ కిక్కు

దేశవ్యాప్తంగా ప్యాసింజర్‌ వాహన విక్రయాలు టాప్‌గేర్‌లో దూసుకుపోతున్నాయి. 2023లో తొలిసారిగా దేశీయంగా 40 లక్షల యూనిట్లు అమ్ముడయ్యాయి.

• 2023లో అమ్ముడైన 40 లక్షల వాహన విక్రయాలు: సియామ్‌

న్యూఢిల్లీ, జనవరి 13: దేశవ్యాప్తంగా ప్యాసింజర్‌ వాహన విక్రయాలు టాప్‌గేర్‌లో దూసుకుపోతున్నాయి. 2023లో తొలిసారిగా దేశీయంగా 40 లక్షల యూనిట్లు అమ్ముడయ్యాయి. యుటిలిటీ వాహనాలకు డిమాండ్‌ అధికంగా ఉండటం వల్లనే రికార్డు స్థాయికి చేరుకున్నాయని భారత్‌ ఆటోమొబైల్‌ తయారీదారుల సంఘం(సియామ్‌) వెల్లడించింది. 2023లో 41,01,600 యూనిట్ల ప్యాసింజర్‌ వాహనాలు అమ్ముడయ్యాయి. 2022లో నమోదైన 37,92,444 యూనిట్లతో పోలిస్తే 8 శాతం అధికమని పేర్కొంది.

• యుటిలిటీ వాహన విక్రయాలు 19,22,805 యూనిట్ల నుంచి 22 శాతం అధికమై 23,53,605లకు చేరుకున్నాయి.
• వ్యాన్ల అమ్మకాలు 1,32,468 యూనిట్ల నుంచి 1,46,122లకు పెరిగాయి.
• హోల్‌సేల్‌ ప్యాసింజర్‌ కార్ల అమ్మకాలు ఏడాది ప్రాతిపదికన 8 శాతం తగ్గి 17,37,171 నుంచి 16,01,873లకు పడిపోయాయి.
• త్రి చక్ర వాహన సేల్స్‌ 4,18,510 యూనిట్ల నుంచి 6,80,550లకు చేరాయి.