ఎన్‌పీఎస్‌, ఈపీఎఫ్‌ కొత్త రూల్స్‌

ఉద్యోగ పదవీ విరమణ అనంతర ప్రణాళికపట్ల చాలామంది ఆసక్తి కనబర్చరు. అయితే గత ఏడాది నేషనల్‌ పెన్షన్‌ సిస్టమ్‌ (ఎన్‌పీఎస్‌), ఎంప్లాయీస్‌ ప్రావిడెంట్‌ ఫండ్‌ (ఈపీఎఫ్‌) సబ్‌స్ర్కైబర్లకు ఓ టర్నింగ్‌ పాయింటే.

ఉద్యోగ పదవీ విరమణ అనంతర ప్రణాళికపట్ల చాలామంది ఆసక్తి కనబర్చరు. అయితే గత ఏడాది నేషనల్‌ పెన్షన్‌ సిస్టమ్‌ (ఎన్‌పీఎస్‌), ఎంప్లాయీస్‌ ప్రావిడెంట్‌ ఫండ్‌ (ఈపీఎఫ్‌) సబ్‌స్ర్కైబర్లకు ఓ టర్నింగ్‌ పాయింటే. ఉపసంహరణలు, కష్టమైన పేపర్‌ వర్క్‌ ప్రక్రియ, పెట్టుబడులపై పరిమిత స్వేచ్ఛ వంటి సుదీర్ఘ కాలం నుంచి వేధిస్తున్న సమస్యలకు పరిష్కారం దొరికింది మరి. మొత్తానికి ఇప్పుడు రిటైర్మెంట్‌ వ్యవస్థ చాలా ద్రవ్యపరమైనదిగా, సాంకేతికంగా అయ్యింది. ఆ వివరాల్లోకి వెళ్తే..

• తప్పనిసరిగా అవసరమైన యాన్యుటైజేషన్‌ 40 శాతం నుంచి 20 శాతానికి తగ్గింది. దీంతో ఈపీఎఫ్‌ సబ్‌స్ర్కైబర్లు ఇక తమ రిటైర్మెంట్‌ నిధిలో 80 శాతం వరకు వెనుకకు తీసుకోవచ్చు.
• చిన్నచిన్న రిటైర్మెంట్‌ మొత్తాలుండే సబ్‌స్ర్కైబర్లకు ఎన్‌పీఎస్‌ నిబంధనలు సరళతరమయ్యాయి. మీ మొత్తం కార్పస్‌ రూ.8 లక్షలు, అంతకంటే తక్కువగా ఉన్నా.. మీ సేవింగ్స్‌లో 100 శాతాన్ని ఉపసంహరించుకోవచ్చు.
• 60 ఏండ్లదాకా ఎన్‌పీఎస్‌ ఖాతాదారులు అలాగే ఉండిపోనక్కర్లేదు. సిస్టమ్‌లో 15 ఏండ్లు పూర్తయితే బయటకు రావచ్చు. అంతేగాక ఉపసంహరణల మధ్య నాలుగేండ్ల వ్యత్యాసంతో నాలుగుసార్లు పాక్షికంగా నగదు ఉపసంహరణలు చేసుకోవచ్చు.
• 2025 అక్టోబర్‌ నుంచి ప్రభుత్వేతర ఎన్‌పీఎస్‌ సబ్‌స్ర్కైబర్లు తమ కార్పస్‌లో 100 శాతం వరకు ఈక్విటీకి కేటాయించవచ్చు. ఇంతకుముందు 75 శాతమే. ఇది యువ మదుపరులకు ప్రయోజనకరంగా చెప్పుకోవచ్చు.
• మునుపు ఈపీఎఫ్‌ ఉపసంహరణలకు 13 వేర్వేరు కారణాలను నిర్దేశించారు. ఒక్కోదానికి ఒక్కోలా నిబంధనలు, షరతులున్నాయి. అయితే ఇప్పుడు వీటన్నిటిని 3 సరళతరమైన కేటగిరీలుగా విభజించారు. అత్యవసరాలు, గృహావసరాలు, ప్రత్యేక పరిస్థితులుగా నిర్ణయించారు. అలాగే అన్ని రకాల నగదు ఉపసంహరణలకు కనీస సర్వీస్‌ అర్హతను 12 నెలలకు తగ్గించారు.
• మీ ఆధార్‌తో మీ యూఏఎన్‌ లింకైతే, కేవైసీ వివరాలు ధ్రువీకరిస్తే.. ఈపీఎఫ్‌ బదిలీలకు, ఉపసంహరణలకు మీ సంస్థ యాజమాన్యం ఆమోదం అక్కర్లేదు. అనెక్సర్‌ కే (బదిలీ సర్టిఫికెట్‌)ను ఇప్పుడు నేరుగా మీ మెంబర్‌ పోర్టల్‌ నుంచే డౌన్‌లోడ్‌ చేసుకోవచ్చు. ఉద్యోగాలు మారినవారికి ఇది ఎంతగానో కలిసొచ్చే అంశం.

చివరగా..

పూర్తి ఆటోమేటెడ్‌, సెల్ఫ్‌-సర్వీస్‌ మాడల్‌గా ఈపీఎఫ్‌వో తయారవుతున్నది. రూ.5 లక్షలదాకా ఉన్న క్లెయిమ్‌లు మాన్యువల్‌ ప్రాసెసింగ్‌ లేకుండానే ఆటోమేటిగ్గా డిజిటల్‌ విధానంలోనే సెటిల్మెంట్‌ అవుతున్నాయి. అలాగే సబ్‌స్ర్కైబర్ల భద్రత, సౌకర్యార్థం ఉమాంగ్‌ యాప్‌ ద్వారా ఫేస్‌ అథెంటికేషన్‌ను పరిచయం చేశారు.