సెన్సెక్స్‌ హుషారు

• రెండోరోజూ లాభాల జోరు 611 పాయింట్లు వృద్ధి

ముంబై, డిసెంబర్‌ 22: దేశీయ ఈక్విటీ మార్కెట్లు వరుసగా రెండోరోజు లాభాల్లో ముగిశాయి. ఒమిక్రాన్‌ వైరస్‌ విజృంభిస్తున్నప్పటికీ అంతర్జాతీయ మార్కెట్లు భారీగా లాభపడం దేశీయ సూచీలకు దన్నుగా నిలిచాయి. గత కొన్ని రోజులుగా భారీగా పతనమైన రూపాయి కోలుకోవడం మార్కెట్‌ సెంటిమెంట్‌ను బలపరిచింది. 30 షేర్ల ఇండెక్స్‌ సూచీ సెన్సెక్స్‌ 611.55 పాయింట్లు(1.09 శాతం) లాభపడి 56,930.56లకు చేరుకోగా, జాతీయ స్టాక్‌ ఎక్సేంజ్‌ సూచీ నిఫ్టీ 184.60 పాయింట్లు అందుకొని 16,955.45 వద్ద ముగిసింది. మార్కెట్లో అత్యధికంగా బజాజ్‌ ఫైనాన్స్‌ 2.94 శాతం పెరిగి టాప్‌ గెయినర్‌గా నిలిచింది. దీంతోపాటు భారతీ ఎయిర్‌టెల్‌, సన్‌ఫార్మా, రిలయన్స్‌ ఇండస్ట్రీస్‌, ఎస్బీఐ, ఎల్‌అండ్‌టీ, టాటా స్టీల్‌, ఐసీఐసీఐ బ్యాంక్‌, మారుతి, టెక్‌ మహీంద్రా, హెచ్‌సీఎల్‌ టెక్‌, మహీంద్రా, ఇన్ఫోసిస్‌, రెడ్డీస్‌, టీసీఎస్‌, టైటాన్‌లు లాభపడ్డాయి. కానీ, విప్రో, ఐటీసీలు మాత్రం స్వల్పంగా నష్టపోయాయి.

రెండు రోజుల్లో 6.56 లక్షల కోట్లు

వరుస నష్టాలతో భారీగా సంపదను కోల్పోయిన మదుపరులకు గత రెండు రోజుల్లో భారీగా కలిసొచ్చింది. వరుసగా రెండు రోజుల్లో సెన్సెక్స్‌ వెయ్యి పాయింట్లకుపైగా లాభపడటంతో మదుపరుల సంపద కూడా రూ.6,56,828.59 కోట్లు పెరిగింది. దీంతో బీఎస్‌ఈలో లిైస్టెన సంస్థల మార్కెట్‌ విలువ రూ.2,59,14,409.64 కోట్లకు చేరింది.

• రంగాలవారీగా చూస్తే రియల్టీ, ఎనర్జీ, క్యాపిటల్‌ గూడ్స్‌, వాహన రంగాల షేర్లు మూడు శాతం వరకు పెరిగాయి.
• బీఎస్‌ఈ మిడ్‌క్యాప్‌, స్మాల్‌క్యాప్‌ ఇండెక్స్‌లు రెండు శాతం వరకు బలపడ్డాయి.
• ఒకవైపు ఒమిక్రాన్‌ వైరస్‌ బారిన పడేవారి సంఖ్య పెరుగుతున్నప్పటికీ అంతర్జాతీయంగా స్టాక్‌ మార్కెట్లు భారీగా లాభపడ్డాయి.
• డాలర్‌తో పోలిస్తే రూపాయి మారకం విలువ 5 పైసలు పెరిగి 75.54 వద్ద నిలిచింది.
• అంతర్జాతీయ మార్కెట్లో బ్యారెల్‌ క్రూడాయిల్‌ ధర స్వల్పంగా పెరిగి 74.24 డాలర్లు పలికింది.