ఏఎంసీల పనేంటో తెలుసా?

మ్యూచువల్‌ ఫండ్‌ ఇన్వెస్టర్లు తరచూ అసెట్‌ మేనేజ్‌మెంట్‌ కంపెనీ (ఏఎంసీ) అని వింటూ ఉంటారు. అయితే కొద్దిమందికే వాటి పాత్ర ఏంటి? అనేది తెలుసు. అసలు ఈ కంపెనీలు తమ దగ్గరకు వచ్చిన నిధులను ఏం చేస్తాయి?

మ్యూచువల్‌ ఫండ్‌ ఇన్వెస్టర్లు తరచూ అసెట్‌ మేనేజ్‌మెంట్‌ కంపెనీ (ఏఎంసీ) అని వింటూ ఉంటారు. అయితే కొద్దిమందికే వాటి పాత్ర ఏంటి? అనేది తెలుసు. అసలు ఈ కంపెనీలు తమ దగ్గరకు వచ్చిన నిధులను ఏం చేస్తాయి? వాటిని సంపద సృష్టికి ఎలా నిర్వహిస్తాయో తెలుసుకుందాం.

ఏఎంసీ అంటే..

అసెట్‌ మేనేజ్‌మెంట్‌ కంపెనీ అనేది సెబీ నియంత్రణలోని సంస్థ. మ్యూచువల్‌ ఫండ్‌ పోర్ట్‌ఫోలియో సేవల ద్వారా మదుపరుల నుంచి వచ్చే నగదును నిర్వహిస్తూ ఉంటుంది. దేశంలోని ప్రధాన ఏఎంసీలలో ఇప్పుడు ఎస్బీఐ మ్యూచువల్‌ ఫండ్‌, హెచ్‌డీఎఫ్‌సీ మ్యూచువల్‌ ఫండ్‌, ఐసీఐసీఐ ప్రుడెన్షియల్‌ మ్యూచువల్‌ ఫండ్‌, నిప్పాన్‌ ఇండియా మ్యూచువల్‌ ఫండ్‌ వంటివి ఉన్నాయి.

ఏఎంసీల ముఖ్య విధులు

• మదుపరుల సంపద వృద్ధికి ఈక్విటీ, డెట్‌, హైబ్రిడ్‌, ఈటీఎఫ్‌ కేటగిరీలలో మ్యూచువల్‌ ఫండ్‌ స్కీముల నిర్వహణ, డిజైనింగ్‌.
• ఆశావహ పెట్టుబడిదారుల నుంచి మేనేజ్‌మెంట్‌ ఫీజును వసూలు చేస్తాయి. దీనివల్లే టోటల్‌ ఎక్స్‌పెన్స్‌ రేషియో (టీఈఆర్‌) నిర్మితమవుతుంది.
• సెబీ మ్యూచువల్‌ ఫండ్‌ నియమ, నిబంధనలకు అనుగుణంగా పనిచేయడం.
• పరిచయం చేసే ప్రతి స్కీమ్‌కు అయ్యే ఖర్చులు, చెల్లించే చార్జీలను వివరించడం.
• తెలివైన పెట్టుబడి నిర్ణయాలకు వీలుగా పరిశోధనలతోపాటు పోర్ట్‌ఫోలియో నిర్మాణం, రిస్క్‌ మేనేజ్‌మెంట్‌.
• మదుపరుల సందేహాలను తీర్చడం, వారి సమస్యలను పరిష్కరించడం, సెబీకి కావాల్సిన సమాచారం అందించడం.

గుర్తుంచుకోండి..

ఏఎంసీల ద్వారా ఏవైనా మ్యూచువల్‌ ఫండ్స్‌ లో పెట్టుబడులకు వెళ్లే ముందు మదుపరులు ఆ ఫండ్‌ చరిత్ర, ట్రాక్‌ రికార్డ్‌, ఎక్స్‌పెన్స్‌ రేషియో, దీర్ఘకాల లక్ష్యాలు, ఇతర అంశాలను తప్పక పరిశీలించాలి. అలాగే యాంఫీలో ఏఎంసీ రిజిస్ట్రేషన్‌ను ధ్రువీకరించుకోవాలి. ఇందుకు యాంఫీ అధికారిక వెబ్‌సైట్‌ (www.amfi india.com) లేదా సెబీ మ్యూచువల్‌ ఫండ్‌ పోర్టల్‌ను సంప్రదించవచ్చు.