ఆల్‌టైం హైకి సెన్సెక్స్‌

దేశీయ స్టాక్‌ మార్కెట్లు రికార్డులతో హోరెత్తించాయి. గురువారం బాంబే స్టాక్‌ ఎక్సేంజ్‌ ప్రధాన సూచీ సెన్సెక్స్‌ 762.1 పాయింట్లు లేదా 1.24 శాతం ఎగబాకి మునుపెన్నడూ లేనివిధంగా 62,272.68 వద్ద స్థిరపడింది.

• 762 పాయింట్లు ఎగిసిన సూచీ
• 217 పాయింట్లు ఎగబాకిన నిఫ్టీ

ముంబై, నవంబర్‌ 24: దేశీయ స్టాక్‌ మార్కెట్లు రికార్డులతో హోరెత్తించాయి. గురువారం బాంబే స్టాక్‌ ఎక్సేంజ్‌ ప్రధాన సూచీ సెన్సెక్స్‌ 762.1 పాయింట్లు లేదా 1.24 శాతం ఎగబాకి మునుపెన్నడూ లేనివిధంగా 62,272.68 వద్ద స్థిరపడింది. ఒకానొక దశలో 901.75 పాయింట్లు ఎగిసి 62,412.33 స్థాయిని తాకడం గమనార్హం. నేషనల్‌ స్టాక్‌ ఎక్సేంజ్‌ సూచీ నిఫ్టీ సైతం 216.85 పాయింట్లు లేదా 1.19 శాతం పుంజుకొని 18,484.1 వద్ద నిలిచింది. ఒక దశలో 52 వారాల గరిష్ఠాన్ని నమోదు చేస్తూ 18,529.7 వద్దకు చేరింది. దీంతో వరుసగా మూడు రోజుల్లో సెన్సెక్స్‌ 1,167 పాయింట్లు, నిఫ్టీ 324 పాయింట్లు పెరిగినైట్టెంది. ఇకపోతే హెచ్‌డీఎఫ్‌సీ బ్యాంక్‌, హెచ్‌డీఎఫ్‌సీ, ఇన్ఫోసిస్‌, టీసీఎస్‌, రిలయన్స్‌ తదితర షేర్లు మదుపరులను అమితంగా ఆకట్టుకున్నాయి.

లాభాలకు కారణాలివే..

• ఐటీ, బ్యాంకింగ్‌, చమురు రంగాల షేర్ల కొనుగోళ్లకు క్యూ కట్టిన మదుపరులు
• కీలక వడ్డీరేట్ల పెంపు వేగాన్ని ఫెడ్‌ రిజర్వ్‌ తగ్గిస్తుందన్న అంచనాలు
• అంతర్జాతీయ మార్కెట్‌లో ముడి చమురు ధరల్లో భారీ పతనం
• మెజారిటీ ఆసియా, ఐరోపా దేశాల స్టాక్‌ మార్కెట్లు లాభాల్లో కదలాడటం
• అమెరికా డాలర్‌ సూచీ పడిపోవడం.. బాండ్‌ ఈల్డ్స్‌ క్షీణత