ఒక్కసారి చార్జింగ్‌తో 528 కిలోమీటర్లు.. కియా ఈవీ ఆగయా

న్యూఢిల్లీ, జూన్‌ 2: కొరియాకు చెందిన ప్రముఖ ఆటోమొబైల్‌ దిగ్గజం కియా ఇండియా..ఈవీ రంగంలోకి ప్రవేశించింది.  ఈ సందర్భంగా కియా ఇండియా ఎండీ, సీఈవో తే-జిన్‌ పార్క్‌ మాట్లాడుతూ..విద్యుత్‌ వాహన రంగంలో మా పరిధిని మరింత విస్తరించడానికి రానున్న రోజుల్లో భారీగా పెట్టుబడులు పెట్టాలనుకుంటున్నట్లు తెలిపారు. 2025 నాటికి ఇక్కడే తయారైన ఈవీ మోడల్‌ను విడుదల చేయడానికి ప్రయత్నిస్తున్నట్లు తెలిపారు. కియా అనుబంధ సంస్థయైన కియా కార్పొరేషన్‌ ఈవీ రంగంలో 22.22 బిలియన్‌ డాలర్ల మేర పెట్టుబడులు పెట్టబోతున్నట్లు ప్రకటించిన విషయం తెలిసిందే. ఈవీ జర్నీలో భాగంగా పలు రకాల మోడళ్ళను ఇక్కడి మార్కెట్‌కు పరిచయం చేయనున్నట్లు, వచ్చే ఐదేండ్లలో 14 సరికొత్త మోడళ్ళను పరిచయం చేయాలని సంస్థ సంకల్పించిందన్నారు. ఈ మోడల్‌కు ఇప్పటికే 355 బుకింగ్‌లు వచ్చాయి. ఈవీ6 పేరుతో విడుదల చేసిన ఈ కారు ప్రారంభ ధర రూ.59.95 లక్షలుగా నిర్ణయించింది. రెండు రకాల్లో లభించనున్న ఈ మోడల్‌ రూ.59.95 లక్షలు కాగా, మరొకటి రూ.64.95 లక్షలని పేర్కొంది.

ఈవీ6 ప్రత్యేకతలు

• పూర్తిస్థాయి చార్జింగ్‌తో 528 కిలోమీటర్లు ప్రయాణించనున్నది.
• కేవలం 5.2 సెకండ్లలో 100 కిలోమీటర్ల వేగాన్ని అందుకోనున్నది ఈ మోడల్‌.
• 350 కేడబ్ల్యూహెచ్‌ చార్జర్‌తో కేవలం 18 నిమిషాల్లోనే 10 శాతం నుంచి 80 శాతం వరకు బ్యాటరీ రీచార్జి కానున్నది.
• ఆల్‌-వీల్‌ డ్రైవ్‌ సిస్టమ్‌ కలిగిన ఈ మోడల్‌లో సన్‌రూఫ్‌, మల్టీైప్లె డ్రైవ్‌ మోడ్స్‌, 60 సరికొత్త ఫీచర్స్‌తో తీర్చిదిద్దింది.
• భద్రత ప్రమాణాలు మెరుగుపరుచడానికి ఈ కారులో 8 ఎయిర్‌బ్యాగ్‌లను ఏర్పాటు చేసింది.