ట్యాక్స్‌పేయర్స్‌.. ఇది తెలుసా!

ఆదాయ పన్ను రిటర్న్స్‌ (ఐటీఆర్‌) దాఖలుకు సంబంధించి దేశంలో పన్ను చెల్లింపుదారులకు కొత్త, పాత పన్ను విధానాలు అందుబాటులో ఉన్న విషయం తెలిసిందే. పాత పన్ను విధానానికి అంతా గుడ్‌బై చెప్పేలా చేయాలని కేవలం కొత్త పన్ను విధానాన్ని కేంద్రంలోని నరేంద్ర మోదీ సర్కారు ఏటేటా బడ్జెట్‌లో ఆకర్షణీయంగా మారుస్తున్న సంగతీ విదితమే.

• హెచ్‌ఆర్‌ఏ, సెక్షన్‌ 80సీ, 24బీ క్లెయిమ్‌లు కఠినతరం
• పాత పన్ను విధానం ఎంపికదారులపై కొత్త ఐటీఆర్‌ నిబంధనలు

ఆదాయ పన్ను రిటర్న్స్‌ (ఐటీఆర్‌) దాఖలుకు సంబంధించి దేశంలో పన్ను చెల్లింపుదారులకు కొత్త, పాత పన్ను విధానాలు అందుబాటులో ఉన్న విషయం తెలిసిందే. పాత పన్ను విధానానికి అంతా గుడ్‌బై చెప్పేలా చేయాలని కేవలం కొత్త పన్ను విధానాన్ని కేంద్రంలోని నరేంద్ర మోదీ సర్కారు ఏటేటా బడ్జెట్‌లో ఆకర్షణీయంగా మారుస్తున్న సంగతీ విదితమే. ఈ క్రమంలోనే ఈ ఆర్థిక సంవత్సరానికి (2025-26)గాను ఈ ఏడాది ఫిబ్రవరి 1న పార్లమెంట్‌లో ప్రవేశపెట్టిన బడ్జెట్‌లో వార్షిక ఆదాయంపై పన్ను మినహాయింపు పరిమితుల్ని గణనీయంగా పెంచారు. అయినప్పటికీ ఇంకా కొందరు ట్యాక్స్‌పేయర్స్‌ పాత పన్ను విధానంలోనే తమ ఐటీఆర్‌లను దాఖలు చేసేందుకు సిద్ధమవుతున్నారు. అయితే 2024-25 ఆర్థిక సంవత్సరానికి (2025-26 మదింపు సంవత్సరం) సంబంధించి ఇప్పుడు ఐటీఆర్‌లు దాఖలుచేసేవారు పాత పన్ను విధానాన్ని ఎంచుకుంటే వివిధ క్లెయిమ్‌ల కోసం కఠిన నిబంధనల్నే ఎదుర్కోవాల్సి వస్తుంది. పన్ను మినహాయింపుల కోసం సవివరంగా సమాచారం ఇవ్వాలని కొత్త నిబంధనలు చెప్తున్నాయి మరి.

ఇదీ సంగతి..

ఐటీఆర్‌లకు సంబంధించి ఆదాయ పన్ను (ఐటీ) శాఖ నిబంధనల్ని మరింత కఠినతరం చేసింది. పన్ను మినహాయింపుల కోసం చేసే క్లెయిములపై నిఘా పెంచింది. ఇందులోభాగంగానే తప్పుడు క్లెయిములకు కళ్లెం వేసేలా చర్యలు చేపట్టింది. అంతేగాక తప్పులు లేకుండా ఐటీ రిటర్న్స్‌ ప్రక్రియను వేగవంతం చేయడానికి వెరిఫికేషన్‌ ప్రక్రియను ఆటోమెటిక్‌ చేసింది. మరోవైపు కేంద్ర ప్రత్యక్ష పన్నుల బోర్డు (సీబీడీటీ) ఐటీఆర్‌ దాఖలుకున్న గడువును ఈ ఏడాది సెప్టెంబర్‌ 15దాకా పొడిగించింది. సెక్షన్‌ 80సీ, 80డీ, 24బీ వంటి వాటికింద పన్ను మినహాయింపులను కోరేవారు అందు కు కావాల్సిన అన్ని ధ్రువపత్రాలను సిద్ధం

చేసుకోవాలనే ఈ పొడిగింపు. దీంతో పాత పన్ను విధానంలో పన్ను మినహాయింపులను క్లెయిమ్‌ చేసుకోవాలనుకొనే ట్యాక్స్‌పేయర్స్‌ ముందే డాక్యుమెంట్లను సరిచూసుకోవడం చాలాచాలా అవసరం. లేకపోతే పన్ను పోటు తప్పదని ఆర్థిక నిపుణులు కూడా చెప్తున్నారు.

• ఐటీ చట్టంలోని సెక్షన్‌ 24బీ కింద గృహ రుణాలపై వడ్డీ చెల్లింపుల వంటి వాటికి పన్ను మినహాయింపులను కోరేవారు.. రుణం తీసుకున్న బ్యాంక్‌ లేదా బ్యాంకింగేతర సంస్థ పేరు, లోన్‌ అకౌంట్‌ నెంబర్‌, రుణం మంజూరైన తేదీ, పొందిన మొత్తం రుణం, ఇంకా మిగిలిన బకాయి తదితర వివరాలను సమర్పించాల్సిందే.
• సెక్షన్‌ 80డీ కింద ఆరోగ్య బీమా క్లెయిములకు బీమా సంస్థ పేరు, పాలసీ నెంబర్‌ వివరాలు ఇవ్వాలి. ఒకవేళ సెక్షన్‌ 80డీడీబీ కింద తీవ్ర అనారోగ్య సమస్యల్ని చూపు తూ పన్ను మినహాయింపులను పొందాలనుకుంటే సంబంధించిన వ్యాధి పూర్తి వివరాలనూ అందించాలి.
• పన్ను చెల్లింపుల్లో ఇంటి అద్దె అలెవెన్స్‌ (హెచ్‌ఆర్‌ఏ) మినహాయింపుల కోసం ట్యాక్స్‌పేయర్స్‌ వారి వేతన వివరాలు, చెల్లిస్తున్న అద్దె, ఉద్యోగం చేస్తున్న సంస్థ వివరాలు ఇవ్వాలి.
• గతంలో కొందరు పన్ను చెల్లింపుదారులు ఒకే నగరంలో సొంతిల్లు ఉన్నదని, అద్దెకు ఉంటున్నామని చెప్తూ హెచ్‌ఆర్‌ఏ, గృహ రుణ వడ్డీరేటు మినహాయింపులకు క్లెయిమ్‌ చేసినట్టు ఐటీ శాఖ గుర్తుచేస్తున్నది. కొత్త నిబంధనల ప్రకారం అలాం టి క్లెయిమ్‌లను నిశితంగా గమనిస్తారు.
• విద్యా రుణాలు, లోన్‌పై విద్యుత్తు ఆధారిత వాహనాల కొనుగోళ్లు వంటి వాటికి సంబంధించీ పూర్తి వివరాలను అందించాల్సి ఉంటుంది. దీనివల్ల అనర్హులను గుర్తించవచ్చని తప్పుడు క్లెయిమ్‌లకూ చెక్‌ పెట్టవచ్చని భావిస్తున్నారు.
• పన్ను మినహాయింపుల కోసం ట్యాక్స్‌పేయర్స్‌ సమర్పించిన డాటాను పాన్‌, ఆధార్‌ సాయంతో థర్డ్‌-పార్టీ డాటాబేసెస్‌తో అధికారులు పునఃపరిశీలిస్తారు. ఈ నేపథ్యంలోనే బీమా సంస్థలు, బ్యాంకులు, ఇతర ప్రభుత్వ రికార్డుల నుంచి సమాచారాన్ని సేకరించి అసలు ఆదాయంపై నిజానిజాలను తేలుస్తారు.

ఫామ్‌ 16లో మార్పులు

మదింపు సంవత్సరం 2025-26 కోసం ఉద్యోగులు తీసుకునే తమ ఫామ్‌ 16లో పలు మార్పులు చోటుచేసుకోబోతున్నాయి. వేతనాలు, వాటిలోని కోతలు, పన్ను మినహాయింపులకు సంబంధించిన మరింత సమాచారంతో ఇది ఉండనున్నది. వ్యక్తిగత ఆదాయ పన్ను రిటర్న్స్‌ను దాఖలు చేసేవారికి ఫామ్‌ 16 తప్పనిసరి.

• ఒకే ఆర్థిక సంవత్సరంలో ఉద్యోగులు ఎన్ని ఉద్యోగాలు మారితే అన్ని సంస్థల నుంచి ఫామ్‌ 16లను తీసుకోవాల్సిందే.
• ఫిక్స్‌డ్‌ డిపాజిట్‌ (ఎఫ్‌డీ) వడ్డీరేటు, విదేశీ ప్రయాణ ఖర్చులు తదితర నిర్ధిష్ట వివరాలపై ట్యాక్స్‌ కలెక్షన్‌ ఎట్‌ సోర్స్‌ (టీసీఎస్‌)తోపాటు ఇతర ఆదాయ వనరుల నుంచి ట్యాక్స్‌ డిడక్షన్‌ ఎట్‌ సోర్స్‌ (టీడీఎస్‌) కూడా ఫామ్‌ 16లో కనిపించనున్నది. అయితే 12బీబీఏ ఫామ్‌ ద్వారా యాజమాన్యానికి సదరు సమాచారం ఉద్యోగి అందిస్తేనే ఇవి ఉంటాయి.
• పెంచిన స్టాండర్డ్‌ డిడక్షన్‌ పరిమితి ప్రకారం ఉంటుంది. ఈసారి బడ్జెట్‌లో రూ.50వేల నుంచి 75వేలకు పెంచిన విషయం తెలిసిందే.
• ఉద్యోగి నేషనల్‌ పెన్షన్‌ సిస్టమ్‌ (ఎన్‌పీఎస్‌) ఖాతాకు కంపెనీ నుంచి 14 శాతం విరాళం అందితే సెక్షన్‌ 80సీసీడీ(2) కింద బేసిక్‌ సాలరీలో 14 శాతం పన్ను ప్రయోజనం సదరు ఉద్యోగికి అందుబాటులో ఉంటుంది. ఇది కొత్త పన్ను విధానంలోనే ఉంటుంది.
• ఐటీ శాఖ ఆన్‌లైన్‌ వేదిక టీఆర్‌ఏసీఈఎస్‌ పోర్టల్‌ ద్వారా ఫామ్‌ 16ను డౌన్‌లోడ్‌ చేసుకోవచ్చు. ఉద్యోగులు తమ పాన్‌ కార్డు వివరాలతో లాగిన్‌ కావచ్చు. ఆ తర్వాత ఫామ్‌ 16 పార్ట్‌ ఏ, బీలను డౌన్‌లోడ్‌ చేసుకుని ఐటీఆర్‌లను దాఖలు చేయవచ్చు.