ఐటీ ఆదాయ వృద్ధి 3 శాతమే

భారత ఐటీ సర్వీసుల రంగం ఆదాయ వృద్ధి మందగిస్తుందని రేటింగ్‌ ఏజెన్సీ ఇక్రా వెల్లడించింది. గత ఆర్థిక సంవత్సరంలో దేశీయ ఐటీ రంగం ఆదాయం 9.2 శాతం పెరగ్గా, ప్రస్తుత ఆర్థిక సంవత్సరంలో 3 శాతానికి పరిమితమవుతుందని ఇక్రా రేటింగ్స్‌ అంచనా వేసింది.

• ప్రస్తుత ఆర్థిక సంవత్సరానికి ఇక్రా అంచనా

న్యూఢిల్లీ, ఆగస్టు 29: భారత ఐటీ సర్వీసుల రంగం ఆదాయ వృద్ధి మందగిస్తుందని రేటింగ్‌ ఏజెన్సీ ఇక్రా వెల్లడించింది. గత ఆర్థిక సంవత్సరంలో దేశీయ ఐటీ రంగం ఆదాయం 9.2 శాతం పెరగ్గా, ప్రస్తుత ఆర్థిక సంవత్సరంలో 3 శాతానికి పరిమితమవుతుందని ఇక్రా రేటింగ్స్‌ అంచనా వేసింది. అలాగే ఐటీ కంపెనీల లాభదాయకత కూడా నెమ్మదిస్తుందని, నిర్వహణా లాభాల మార్జిన్‌ 1 శాతం తగ్గుదలతో 20-21 శాతానికి దిగివస్తుందని పేర్కొంది. ఐటీ సేవలకు డిమాండ్‌ మందగిస్తున్నందున 2023-24లో ఐటీ కంపెనీల టర్నోవర్‌ వృద్ధి 3-5 శాతానికి పడిపోతుందని ఇక్రా ఐటీ రంగ హెడ్‌ దీపక్‌ జొత్వాని తెలిపారు. ఇక్రా రిపోర్ట్‌ వివరాలు&

• సాఫ్ట్‌వేర్‌ సర్వీసులకు కీలక మార్కెట్లయిన ఉత్తర అమెరికా, యూరప్‌ల్లో అనిశ్చితి కొనసాగుతున్నందున, అత్యవసరంకాని ప్రాజెక్టుల్ని కార్పొరేట్లు వాయిదా వేసుకుంటాయి.
• కీలక మార్కెట్లయిన యూఎస్‌, యూరప్‌ల్లో స్థూల ఆర్థిక పరిస్థితుల కారణంగా నిరుడు క్యూ3, ఈ ఏడాది క్యూ1 మధ్య ఐటీ కంపెనీల వృద్ధి గణనీయంగా తగ్గింది.
• తాజాగా ముగిసిన క్యూ1లో 3.8 శాతం ఆదాయ వృద్ధిని మాత్రమే నమోదయ్యింది. గత 10 త్రైమాసికాల్లో ఇదే కనిష్ఠ వృద్ధి.
• వృద్ధి మందగించడంతో గత మూడు త్రైమాసికాల్లో ఐటీ కంపెనీలు నియామకాల్ని తగ్గించాయి. సమీప భవిష్యత్‌లో ఇదే ట్రెండ్‌ కొనసాగుతుంది.
• వచ్చే కొద్ది త్రైమాసికాల్లో వలసల రేటు దీర్ఘకాలిక సగటు 13-15 శాతానికి తగ్గుతుంది.
• యూరప్‌తో పోలిస్తే యూఎస్‌ నుంచి ఆదాయాలు బాగా తగ్గాయి. ఇతర రంగాలతో పోలిస్తే బీఎఫ్‌ఎస్‌ఐ, కమ్యూనికేషన్‌ల నుంచి ఆదాయం మందగించింది.
• బ్యాంకింగ్‌, ఫైనాన్షియల్‌ సర్వీసులు, ఇన్సూరెన్స్‌ (బీఎఫ్‌ఎస్‌ఐ), రిటైల్‌, టెక్నాలజీ, కమ్యూనికేషన్‌ తదితర కీలక రంగా లు ఐటీ వ్యయాల్ని తగ్గించుకుంటాయి.
• ఐటీ కంపెనీలు నిర్వహణా వ్యయాల్ని అదుపుచేసుకుంటున్నందున, ఆదాయ వృద్ధి తగ్గుదల ప్రభావం లాభదాయకత మీద పడకుండా చూసుకుంటాయి.
• ఆన్‌షోర్‌-ఆఫ్‌షోర్‌ మిక్స్‌ పాటించడం, ఉద్యోగి వినియోగ సామర్థ్యాన్ని గరిష్ఠపర్చుకోవడం ద్వారా పలు కంపెనీలు ఈ మందగమనాన్ని అధిగమిస్తాయి.
• కంపెనీల వద్దనున్న ఆర్డర్లు ఆదాయంగా మారడం తగ్గినప్పటికీ, పలు కంపెనీల ఆర్డర్‌ బుక్‌, డీల్‌ పైప్‌లైన్‌ పటిష్టంగా ఉంది.
• ఆదాయం తగ్గినా మెజారిటీ ఐటీ కంపెనీల బ్యాలెన్స్‌ షీట్స్‌ బలంగానే ఉంటాయి. క్యాష్‌ ఫ్లో బాగుండటం, రుణాలు తక్కువగా ఉండటం, పటిష్టమైన లిక్విడిటీ ఇందుకు కారణం.
• ప్రస్తుత ఆర్థిక సంవత్సరం చివరినాటికి పశ్చిమ దేశాల ఆర్థిక వ్యవస్థలు మెరుగుపడి, ఐటీ వృద్ధి తిరిగి జోరు అందుకుంటుందని ఇక్రా అంచనా వేసింది.