హైదరాబాద్‌ నుంచి సింగపూర్‌, కొలంబోలకు..

హైదరాబాద్‌ విమానాశ్రయం మరో రెండు అంతర్జాతీయ రూట్లలో విమాన సేవలు అందుబాటులోకి తీసుకొచ్చింది. హైదరాబాద్‌ నుంచి సింగపూర్‌, కొలంబోలకు డైరెక్ట్‌ విమాన సర్వీసులు ప్రారంభించబోతున్నట్టు ఇండిగో శుక్రవారం ప్రకటించింది.

• డైరెక్ట్‌ విమాన సర్వీసులు ప్రారంభించనున్న ఇండిగో

హైదరాబాద్‌, అక్టోబర్‌ 27:హైదరాబాద్‌ విమానాశ్రయం మరో రెండు అంతర్జాతీయ రూట్లలో విమాన సేవలు అందుబాటులోకి తీసుకొచ్చింది. హైదరాబాద్‌ నుంచి సింగపూర్‌, కొలంబోలకు డైరెక్ట్‌ విమాన సర్వీసులు ప్రారంభించబోతున్నట్టు ఇండిగో శుక్రవారం ప్రకటించింది. రాష్ట్రం నుంచి సింగపూర్‌, కొలంబోలను సందర్శించేవారి సంఖ్య గణనీయంగా పెరుగుతుండటం వల్లనే ఈ నూతన సర్వీసులను అందుబాటులోకి తీసుకోస్తున్నట్టు తెలిపింది. వీటిలో హైదరాబాద్‌-సింగపూర్‌ల మధ్య సర్వీసులు ఈ నెల 29 నుంచి అందుబాటులోకి రానున్నది. హైదరాబాద్‌ నుంచి అర్ధరాత్రి 2.50 గంటలకు బయలుదేరనున్న 6ఈ-1027 విమాన సర్వీసు సింగపూర్‌కు ఉదయం 10 గంటలకు(సింగపూర్‌ కాలమాన ప్రకారం) చేరుకోనున్నది.

తిరుగు ప్రయాణంలో సింగపూర్‌లో రాత్రి 23.25 గంటలకు(సింగపూర్‌ కాలమాన ప్రకారం) బయలుదేరి హైదరాబాద్‌కు అర్ధరాత్రి 1.30 గంటలకు చేరుకోనున్నది. అలాగే వచ్చే నెల 3 నుంచి హైదరాబాద్‌-కొలంబోల మధ్య డైరెక్ట్‌ ఫ్లైట్‌ సర్వీసు అందుబాటులోకి రానున్నది. 6ఈ-1181 నంబర్‌ కలిగిన ఇండిగో విమాన సర్వీసు హైదరాబాద్‌ నుంచి ఉదయం 11.50 గంటలకు బయలుదేరి కొలంబోకు మధ్యాహ్నాం 2 గంటలకు చేరుకోనున్నది. తిరుగు ప్రయాణంలో కొలంబోలో మధ్యాహ్నాం 3 గంటలకు బయలుదేరి హైదరాబాద్‌కు సాయంత్రం 5 గంటలకు చేరుకోనున్నది. ఈ నాన్‌-స్టాప్‌ ఫ్లైట్‌ సర్వీసు వారానికి నాలుగు రోజులు సోమ, మంగళ, శుక్ర, ఆదివారాల్లో మాత్రమే ఉంటుందని తెలిపింది.