Adani-Nikkei Asia | అదానీ గ్రూప్‌లో 40 శాతం రుణాలు భార‌తీయ బ్యాంకుల‌వే.. నిగ్గు తేల్చిన నిక్కీ ఏషియా..!

Adani-Nikkei Asia | అదానీ గ్రూప్ సంస్థల రుణాల్లో 40 శాతం భారతీయ బ్యాంకులవేనని నిక్కీ ఏషియా తేల్చింది. అందులో 30 శాతం ప్రభుత్వ రంగ బ్యాంకులు రుణాలు పెట్టాయని పేర్కొన్నది.

Adani-Nikkei Asia |యూఎస్ షార్ట్ షెల్ల‌ర్ కంపెనీ `హిండెన్‌బ‌ర్గ్ రీసెర్చ్‌` నివేదిక‌తో అదానీ గ్రూప్ మార్కెట్ క్యాపిట‌లైజేష‌న్ రోజురోజుకు ప‌త‌న‌మ‌వుతున్న‌ది. హిండెన్‌బ‌ర్గ్ రీసెర్చి నివేదిక ద‌రిమిలా అదానీ గ్రూప్ బాండ్ల తాక‌ట్టుకు స‌సేమిరా అన్నాయి క్రెడిట్ సూయిజ్‌, సిటీ గ్రూప్ వంటి అంత‌ర్జాతీయ ఆర్థిక సంస్థ‌లు. అదానీ సంస్థ‌ల నుంచి నార్వే సావ‌రిన్ వెల్త్ ఫండ్ పూర్తిగా బ‌య‌ట‌కొచ్చేసింది. నాలుగు సంస్థ‌ల‌కు మూడీస్ నెగెటివ్ రేటింగ్ ఇచ్చింది. మోర్గాన్ స్టాన్‌లీ వెయిటేజీ త‌గ్గించింది. ఈ నేప‌థ్యంలో అదానీ గ్రూప్ సంస్థ‌ల ఆస్తులు, రుణాల‌పై నిక్కీ ఆసియా విశ్లేషించింది. అదానీ గ్రూప్ సంస్థ‌ల రుణాల్లో 40 శాతం భార‌త బ్యాంకుల‌వేన‌ని పేర్కొంది.

అదానీ గ్రూప్ రుణాల‌పై నిక్కీ ఆసియా విశ్లేష‌ణ ముఖ్యాంశాలు..

• అదానీ గ్రూప్ సంస్థ‌ల మొత్తం రుణాలు రూ.3.39 ల‌క్ష‌ల కోట్లు (41.1 బిలియ‌న్ డాల‌ర్లు. ఇది భార‌త జీడీపీలో క‌నీసం ఒక‌శాతం. గ‌తేడాది కొనుగోలు చేసిన ఏసీసీ సిమెంట్స్‌, అంబుజా సిమెంట్స్‌, ఎన్డీటీవీ (న్యూఢిల్లీ టెలివిజ‌న్‌)తో క‌లిపి మొత్తం 10 సంస్థ‌ల రుణ భారం ఇది.

• అంత‌ర్జాతీయ ద్ర‌వ్య‌నిధి సంస్థ (ఐఎంఎఫ్‌) అంచ‌నా ప్ర‌కారం గ‌తేడాది అక్టోబ‌ర్ నాటికి భార‌త జీడీపీ రూ.273 ల‌క్ష‌ల కోట్లు. దీని ప్ర‌కారం భార‌త్ జీడీపీలో అదానీ గ్రూప్ రుణాలు 1.2 శాతం.

• ప‌ది అదాని గ్రూప్ సంస్థ‌ల్లో ఉమ్మ‌డి ఈక్విటీ నిష్ప‌త్తి 25 శాతం. 2022 మార్చి నాటికి వాటిల్లో అదానీ గ్రీన్ ఎన‌ర్జీ వాటా కేవ‌లం రెండు శాత‌మే.

• అదానీ గ్రూప్ సంస్థ‌ల ఆస్తులు రూ.4.8 ల‌క్ష‌ల కోట్ల పై చిలుకే. కానీ, ప‌రిమితికి మించిన రుణ భారంపై ఇన్వెస్ట‌ర్ల‌లో పెరుగుతున్న ఆందోళ‌న‌. అదానీ సంస్థ‌ల‌కు చెందిన‌ ప‌లు ప్రైవేట్ కంపెనీల రుణ భారం క‌లిపితే మొత్తం గ్రూప్ రుణ భారం ఎక్కువే.

• ఇటీవ‌లి సీఎల్ఎస్ఏ నివేదిక ప్ర‌కారం మొత్తం అదానీ గ్రూప్ సంస్థ‌ల రుణాలు దాదాపు రూ.2 ల‌క్ష‌ల కోట్లు. అందులో కేంద్ర ప్ర‌భుత్వ రంగ బ్యాంకుల రుణాలు రూ.80వేల కోట్లు. మొత్తం గ్రూపు రుణాల్లో 40 శాతం ప్ర‌భుత్వ రంగ బ్యాంకుల‌దే.

• అదానీ గ్రూప్ సంస్థ‌ల రుణాల్లో భార‌తీయ బ్యాంకుల రుణాలు 30 శాతం. అందులో ఎస్బీఐ వాటా నాలుగింట మూడొంతులు. భార‌త ప్రైవేట్ బ్యాంకుల రుణ వాటా 10 శాతం. అదానీ గ్రూప్ టేకోవ‌ర్ చేసిన ప‌లు సంస్థ‌ల‌కు విదేశీ బ్యాంకుల నిధుల సాయం.

• హిండెన్‌బ‌ర్గ్ రీసెర్చ్ నివేదిక‌తో అదానీ గ్రూప్ సంస్థ‌ల మార్కెట్ క్యాపిట‌లైజేష‌న్ స‌గానికి పైగా హ‌రించుకుపోయింది. ప్ర‌స్తుతం అదానీ గ్రూప్ మార్కెట్ క్యాపిట‌లైజేష‌న్ 100 బిలియ‌న్ డాల‌ర్ల లోపే. స్వ‌ర్గ‌ధామాల దుర్వినియోగాన్ని, అదానీ గ్రూప్ సంస్థ‌ల రుణాల స్థాయిని ప్ర‌శ్నించిన హిండెన్‌బ‌ర్గ్‌.

• ఇటీవ‌లి కాలంలో శ‌ర‌వేగంగా పెరిగిన గౌతం అదానీ ఆస్తులు. ఎఫ్‌పీవో ద్వారా రూ.20 వేల కోట్ల నిధుల సేక‌ర‌ణ‌కు అదానీ ఎంట‌ర్‌ప్రెజెస్ ప్ర‌క‌ట‌న‌. విజ‌య‌వంతంగా స‌బ్‌స్క్రిప్ష‌న్ పొందినా.. అనూహ్యంగా ఎఫ్‌పీవో ఉప‌సంహ‌రిస్తున్న‌ట్లు గౌతం అదానీ ప్ర‌క‌ట‌న‌.

• ఎఫ్‌పీవో ఉప‌సంహ‌ర‌ణ‌పై గౌతం అదానీ ప్ర‌క‌ట‌న‌ను విశ్వ‌సించ‌ని ఇన్వెస్ట‌ర్లు.. మ‌రింత‌గా స్టాక్స్ ప‌త‌నం.