HDFC | ఆకట్టుకున్న హెచ్‌డీఎఫ్‌సీ.. క్యూ4లో 20 శాతం పెరిగిన లాభం

దేశంలో అతిపెద్ద ప్రైవేట్‌ బ్యాంకైన హెచ్‌డీఎఫ్‌సీ బ్యాంక్‌ ఆకర్షణీయ ఆర్థిక ఫలితాలు ప్రకటించింది. మార్చితో ముగిసిన త్రైమాసికానికిగాను రూ.12,594.5 కోట్ల కన్సాలిడేటెడ్‌ నికర లాభాన్ని గడించింది.

HDFC |  ముంబై, ఏప్రిల్‌ 15: దేశంలో అతిపెద్ద ప్రైవేట్‌ బ్యాంకైన హెచ్‌డీఎఫ్‌సీ బ్యాంక్‌ ఆకర్షణీయ ఆర్థిక ఫలితాలు ప్రకటించింది. మార్చితో ముగిసిన త్రైమాసికానికిగాను రూ.12,594.5 కోట్ల కన్సాలిడేటెడ్‌ నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.10,443.01 కోట్ల లాభంతో పోలిస్తే 20.6 శాతం పెరిగింది. సమీక్షకాలంలో బ్యాంక్‌ స్టాండ్‌లోన్‌ ఆదాయం రూ.41,086 కోట్ల నుంచి రూ.53,850 కోట్లకు చేరుకున్నట్టు బీఎస్‌ఈకి సమాచారం అందించింది.

• నికర వడ్డీ ఆదాయం ఏడాది ప్రాతిపదికన 23.7 శాతం పెరిగి రూ.23,351.8 కోట్లకు చేరుకున్నది.
• అడ్వాన్స్‌లు 16.9 శాతం పెరగగా..నికర వడ్డీ మార్జిన్లు 4.1 శాతంగా నమోదయ్యాయి.
• బ్యాంక్‌కు ఇతర మార్గాల ద్వారా వచ్చే ఆదాయం రూ.7,637.1 కోట్ల నుంచి రూ.8,731.2 కోట్లకు పెరిగాయి.
• రిటైల్‌ రుణాల్లో 19.3 శాతం వృద్ధిని కనబరిచిన బ్యాంక్‌..కార్పొరేట్‌ 12.6 శాతం, కమర్షియల్‌ 30 శాతం చొప్పున పెరిగాయి.
• మొండి బకాయిలను పూడ్చుకోవడానికి బ్యాంక్‌ నిధుల కేటాయింపులు రూ.2,685.37 కోట్లకు తగ్గాయి.
• మార్చి 31 నాటికి దేశవ్యాప్తంగా బ్యాంక్‌కు 7,821 శాఖలు ఉండగా..వీటిలో 52 శాతం శాఖలు గ్రామీణ, సెమీ-అర్బన్‌ ప్రాంతాల్లో ఉన్నాయి.
• 2022-23 ఆర్థిక సంవత్సరానికిగాను ప్రతిషేరుకు రూ.19 డివిడెండ్‌ను బోర్డు ప్రతిపాదించింది. క్రితం ఏడాది రూ.15.5 గా చెల్లించింది.
• బ్యాంక్‌ స్థూల నిరర్థక ఆస్తుల విలువ 1.17 శాతం నుంచి 1.12 శాతానికి దిగొచ్చింది. డిసెంబర్‌ త్రైమాసికంలో 1.23 శాతంగా ఉన్నది.
• గడిచిన ఆర్థిక సంవత్సరం మొత్తానికి రూ. 45,997.10 కోట్ల నికర లాభాన్ని గడించింది.