దేశంలోకి తగ్గిన ఎఫ్‌డీఐలు

విదేశీ ప్రత్యక్ష పెట్టుబడులు తగ్గుముఖం పట్టాయి. గడిచిన ఆర్థిక సంవత్సరంలో దేశంలోకి 44.42 బిలియన్‌ డాలర్ల ఎఫ్‌డీఐలు మాత్రమే వచ్చాయి. 2022-23లో వచ్చిన 46.03 బిలియన్‌ డాలర్లతో పోలిస్తే 3.49 శాతం తగ్గాయి.

• గత ఆర్థిక సంవత్సరంలో 3.5 శాతం క్షీణత

న్యూఢిల్లీ, మే 30: విదేశీ ప్రత్యక్ష పెట్టుబడులు తగ్గుముఖం పట్టాయి. గడిచిన ఆర్థిక సంవత్సరంలో దేశంలోకి 44.42 బిలియన్‌ డాలర్ల ఎఫ్‌డీఐలు మాత్రమే వచ్చాయి. 2022-23లో వచ్చిన 46.03 బిలియన్‌ డాలర్లతో పోలిస్తే 3.49 శాతం తగ్గాయి. సేవలు, కంప్యూటర్‌ హార్డ్‌వేర్‌ అండ్‌ సాఫ్ట్‌వేర్‌, టెలికం, ఆటో, ఫార్మా రంగాల్లోకి వచ్చే ఎఫ్‌డీఐలు తగ్గుముఖం పట్టడం ఇందుకు కారణమని కేంద్ర ప్రభుత్వం తాజాగా విడుదల చేసిన నివేదికలో వెల్లడించింది. అయినప్పటికీ జనవరి-మార్చి త్రైమాసికంలో ఎఫ్‌డీఐలు మాత్రం ఏడాది ప్రాతిపదికన 33.4 శాతం ఎగబాకి 12.38 బిలియన్‌ డాలర్లకు చేరుకున్నాయి. ఏడాది క్రితం ఇది 9.28 బిలియన్‌ డాలర్లుగా ఉన్నాయి. అలాగే ఈక్విటీలు, ఇతర క్యాపిటల్‌ రంగాల్లోకి వచ్చే ఎఫ్‌డీఐలు కూడా 71.35 బిలియన్‌ డాలర్ల నుంచి 70.95 బిలియన్‌ డాలర్లకు దిగొచ్చాయి.

• గడిచిన ఆర్థిక సంవత్సరంలో మారిషస్‌, సింగపూర్‌, అమెరికా, బ్రిటన్‌, యూఏఈ, జర్మనీ దేశాల నుంచి వచ్చే ఎఫ్‌డీఐలు తగ్గుముఖం పట్టగా.. నెదర్లాండ్‌, జపాన్‌ దేశాల నుంచి పెరిగాయి.
• రంగాలవారీగా చూస్తే సర్వీసులు, కంప్యూటర్‌ సాఫ్ట్‌వేర్‌ అండ్‌ హార్డ్‌వేర్‌, ట్రేడింగ్‌, టెలికమ్యూనికేషన్‌, ఆటోమొబైల్‌, ఫార్మా, కెమికల్స్‌ రంగాల్లో తగ్గుముఖం పట్టాయి. కానీ, నిర్మాణ, డెవలప్‌మెంట్‌, పవర్‌ రంగాలు అత్యధికంగా ఎఫ్‌డీఐలను ఆకట్టుకున్నాయి.
• రాష్ర్టాల వారీగా చూస్తే మహారాష్ట్ర అత్యధికంగా 15.1 బిలియన్‌ డాలర్ల విలువైన ఎఫ్‌డీఐలను ఆకట్టుకున్నది. అలాగే గుజరాత్‌లోకి 7.3 బిలియన్‌ డాలర్లు రాగా, తమిళనాడు, తెలంగాణ, జార్ఖండ్‌ రాష్ర్టాలు కూడా అత్యధికంగా ఆకట్టుకున్నాయి. కానీ, కర్ణాటక, ఢిల్లీ, రాజస్థాన్‌, ఉత్తరప్రదేశ్‌, హార్యానా రాష్ర్టాల్లోకి వచ్చిన ఎఫ్‌డీఐలు తగ్గుముఖం పట్టాయి.