రెడ్డీస్‌ లాభం 1,405 కోట్లు

రాష్ర్టానికి చెందిన ప్రముఖ ఫార్మా సంస్థ డాక్టర్‌ రెడ్డీస్‌ ఆకర్షణీయ ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసిక లాభంలో 18 శాతం వృద్ధిని కనబరిచింది.

• తొలి త్రైమాసికంలో 18 శాతం వృద్ధి

హైదరాబాద్‌, జూలై 26(బిజినెస్‌ బ్యూరో): రాష్ర్టానికి చెందిన ప్రముఖ ఫార్మా సంస్థ డాక్టర్‌ రెడ్డీస్‌ ఆకర్షణీయ ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసిక లాభంలో 18 శాతం వృద్ధిని కనబరిచింది. ఏడాది క్రితం రూ.1,189 కోట్లుగా ఉన్న పన్నులు చెల్లించిన తర్వాత లాభం గత త్రైమాసికానికిగాను రూ.1,405 కోట్లకు చేరుకున్నట్లు వెల్లడించింది. సమీక్షకాలంలో కంపెనీ ఆదాయం ఏడాది ప్రాతిపదికన 29 శాతం ఎగబాకి రూ.6,757.90 కోట్లకు చేరుకున్నది. గతేడాది ఇది రూ.5,232.90 కోట్లుగా ఉన్నది.

• కంపెనీ విక్రయాల్లో ఉత్తర అమెరికా వాటా 47 శాతంగా ఉండగా..యూరప్‌ 8 శాతం, భారత్‌ 17 శాతం వాటా కలిగివున్నాయి.
• తొలి త్రైమాసికంలో అంతర్జాతీయంగా జనరిక్‌ ఔషధాలను విక్రయించడంతో సంస్థకు రూ.6,101 కోట్ల ఆదాయం సమకూరింది. గతేడాదితో పోలిస్తే ఇది 36 శాతం అధికం.
• ఉత్తర అమెరికా నుంచి రూ.3,200 కోట్లు, యూరప్‌ నుంచి రూ.510 కోట్లు, భారత్‌ నుంచి రూ.1,150 కోట్ల ఆదాయం లభించింది.
• ప్రస్తుతం సంస్థ వద్ద రూ.670 కోట్ల నగదు నిల్వలు ఉన్నాయి.
• నిర్వహణ ఖర్చులు రూ.4,628.2 కోట్ల నుంచి రూ.5,086.2 కోట్లకు చేరుకున్నాయి.

‘తొలి త్రైమాసికంలో అమ్మకాలు భారీగా పెరగడం, మార్జిన్లు అధికంగా ఉండటం వల్లనే లాభాల్లో భారీ వృద్ధి నమోదైంది. అమెరికా, రష్యాలో పలు జనరిక్‌ ఉత్పత్తులు విడుదల చేయడం కూడా కలిసొచ్చింది. భవిష్యత్తులో పరిశోధనలు, నూతన ఉత్పత్తుల కోసం మరిన్ని పెట్టుబడులు పెట్టబోతున్నాం’
– జీవీ ప్రసాద్‌, రెడ్డీస్‌ కో-చైర్మన్‌, ఎండీ